کراچی : قصبہ کالونی کٹی پہاڑی کے قریب فائرنگ کا واقعہ پیش آیا ہے مسلح ملزم نے میڈیکل اسٹور پر کھڑے ایک شخص کو گولیوں سے بھون ڈالا۔
اے آر وائی نیوز کی رپورٹ کے مطابق کٹی پہاڑی کے علاقے میں میڈیکل اسٹور پر فائرنگ سے احسان اللہ نامی شخص موقع پر ہی جاں بحق ہوگیا تھا۔
واقعے کی سی سی ٹی وی فوٹیج اے آر وائی نیوز نے حاصل کرلی، مقتول احسان اللہ میڈیکل اسٹور کے باہر فون پر کسی سے بات کر رہا تھا۔
اس دوران اچانک ایک مسلح شخص نے پیچھے سے فائرنگ کردی، گولی لگنے سے احسان اللہ موقع پر ہی گر کر پڑا ملزم اس کے گرنے باوجود اس پر دو گولیاں اور چلائیں جس سے وہ جاں بحق ہوگیا۔
پولیس حکام کا کہنا ہے کہ واردات کے بعد مسلح ملزم موقع سے فرار ہونے میں کامیاب ہوگیا، مقتول احسان اللہ کو 3 گولیاں ماری گئیں، آبائی تعلق سوات سے تھا۔
پولیس کے مطابق کٹی پہاڑی واقعہ کا مقدمہ نامعلوم شخص کیخلاف درج کرکے واقعے کی مزید تحقیقات کی جارہی ہیں۔
