واشنگٹن: امریکی ریاست فلوریڈا میں مسلح شخص نے بینک میں گھس کر فائرنگ کردی جس کے باعث پانچ افراد ہلاک ہوگئے۔
تفصیلات کے مطابق فلوریڈا میں قائم ایک نجی بینک میں فائرنگ کرنے والے شخص کو پولیس نے گرفتار کرلیا، حملے میں 5 افراد ہلاک ہوئے۔
غیر ملکی خبر رساں ادارے کے مطابق پولیس حکام کا کہنا ہے کہ فائرنگ کا یہ واقعہ فلوریڈا کے شہر سیبرنگ کے نجی بینک میں پیش آیا۔
فائرنگ کی اطلاع ملتے ہی پولیس نے بینک کا محاصرہ کرکے اکیس سالہ مشتبہ حملہ آور کو گرفتا کرلیا، فائرنگ کی وجوہات فوری طور پر سامنے نہیں آسکی ہیں، پولیس واقعے کی مزید تفتیش کررہی ہے۔
’سن ٹرسٹ‘ نامی نجی بینک میں گھس کر فائرنگ کرنے والا 21 سالہ ‘زیپن زیور‘ کو گرفتار کرکے پولیس قانونی کارروائی کررہی ہے، جلد حملے کی وجوہات سامنے آجائیں گی۔
پولیس حکام کا کہنا ہے کہ اسی واقعے سے متعلق جلد اہم پریس کانفرنس کی جائے گی جس میں مکمل تفصیلات سے آگاہ کیا جائے گا۔
عوام کا تحفظ ہماری ذمہ داری ہے، ہر ممکن اقدامات کررہے ہیں۔
امریکا: شاپنگ مال میں فائرنگ، 2 افراد زخمی، حملہ آور ہلاک
خیال رہے کہ گذشتہ سال نومبر میں امریکی ریاست الاباما کے شاپنگ مال میں فائرنگ کا واقعہ پیش آیا تھا جس کے نتیجے میں 2 افراد زخمی ہوئے تھے، جبکہ پولیس اہلکار نے بروقت کارروائی کرتے ہوئے 18 سالہ حملہ آور کو ہلاک کردیا تھا۔
یاد رہے کہ امریکا کی مختلف ریاستوں میں گزشتہ کئی ماہ سے پرتشدد واقعات میں اضافہ دیکھا گیا ہے، گذشتہ سال نومبر میں ہی ایک سفید فام امریکی شہری نے یہودی عبادت گاہ پر حملہ کیا تھا جس کے نتیجے میں متعدد لوگ ہلاک ہوگئے تھے۔
