کراچی : شہرکے مختلف علاقوں میں فائرنگ سے دو پولیس اہلکاروں سمیت پانچ افراد جاں بحق، لانڈھی میں رینجرز نے کارروائی کے دوران پانچ افراد کو گرفتار کرلیا۔
پولیس کے مطابق ناظم آباد نمبر تین کے قریب موٹر سائیکل سوارملزمان نے پولیس اہلکاروں پر فائرنگ کردی جس کے نتیجے میں مسجد کے باہر سیکیورٹی ڈیوٹی دیتے دوپولیس اہلکارجاں بحق ہوگئے ۔
مقتول پولیس اہلکار ناظم آباد تھانے میں تعینات تھے جن کی شناخت ہیڈ کانسٹبل عبدالغفور اور سپاہی فاروق کے ناموں سے ہوئی ہے ، گلبرگ بلاک بارہ میں کلینک بند کرکے گھر جانے والے ڈاکٹر فاروق احمد شیخ کو نامعلوم موٹر سائیکل سواروں نے فائرنگ کرکے قتل کردی۔
پولیس کے مطابق مقتول ڈاکٹر فاروق گلبرگ بلاک تیرہ کے رہائشی تھے اور انہیں گھر واپسی پر ٹارگٹ کلنگ کا نشانہ بنایا گیا،پاپوش نگر ریلوے پھاٹک کے قریب نامعلوم افراد نے پینتالیس سالہ ریحان کو فائرنگ کرکے قتل کردیا۔
گذشتہ روزقائد آباد کے علاقے میں فائرنگ سے زخمی ہونے والے حنیف نے رات گئے زخموں کی تاب نہ لاتے ہوئے دم توڑ دیا، دوسری جانب لانڈھی 89 میں رینجرز نے چھاپہ مار کارروائی کے دوران پانچ افراد کو حراست میں لے لیا۔
زیر حراست افراد میں سے تین کا تعلق سیاسی جماعت سے ہے، زیر حراست افراد کو تفتیش کے لئے نامعلوم مقام پر منتقل کردیا ہے۔
