مشترکہ مفادات کونسل (سی سی آئی) کی منظوری کے بعد ادارہ شماریات نے ڈیجیٹل مردم شماری کے تفصیلی اعداد و شمار جاری کر دیے۔
تفصیلات کے مطابق مشترکہ مفادات کونسل نے پہلی ڈیجیٹل مردم شماری کے حتمی نتائج کی منظوری دے دی جس بعد ادارہ شماریات کی رپورٹ میں بتایا گیا ہے کہ اس وقت ملک کی کل آبادی 24کروڑ 14 لاکھ 90 ہزار ہوگئی ہے۔
ترجمان ادارہ شماریات کا کہنا ہے کہ ساتویں مردم شماری کے مطابق ملک کی آبادی میں اضافے کی شرح 2.55 فیصد ہے، صوبوں کی آبادی کے حوالے سے رپورٹ میں بتایا گیا ہے کہ پنجاب کی کل آبادی 12 کروڑ 76 لاکھ 80 ہزار ہے۔
اس کے علاوہ سندھ کی کل آبادی 5کروڑ 56 لاکھ 90 ہزار، خیبر پختونخوا کی کل آبادی 4کروڑ 8لاکھ 50 ہزار اور بلوچستان کی کل آبادی ایک کروڑ 48 لاکھ 90 ہزار ہوچکی ہے۔
ترجمان کا کہنا ہے کہ پنجاب میں آبادی کے اضافے کی شرح 2.53 فیصد ہے، سندھ میں آبادی کے اضافے کی شرح 2.57فیصد اور بلوچستان میں 3.20فیصد ہے۔
پہلی ڈیجیٹل مردم شماری کے مطابق کے پی میں آبادی میں اضافے کی شرح 2.38فیصد ہے، پہلی ڈیجیٹل مردم شماری کے مطابق اسلام آباد کی آبادی 23لاکھ 60 ہزار ہے۔
رپورٹ کے مطابق پاکستان کی دیہی آبادی 61.18 فیصد جبکہ شہری آبادی 38.82 فیصد ہے، خیبرپختونخوا کی 84.99فیصد آبادی دیہی جبکہ 15.01فیصد شہری ہے، پنجاب کی59.3فیصد آبادی دیہی جبکہ 40.70فیصد شہری ہے، بلوچستان کی 64فیصد آبادی دیہی جبکہ 30.96فیصد شہری آبادی ہے۔