ریاض : سعودی حکومت نے حج آپریشن کے تمام انتظامات مکمل کرلیے، عازمین حج کی حجاز مقدس روانگی کا مرحلہ آن پہنچا۔
اس حوالے سے سعودی وزارت حج و عمرہ کا کہنا ہے کہ عازمین حج کی پروازیں اگلے ہفتے سے سعودی عرب پہنچنا شروع ہوجائیں گی۔
سعودی ترجمان کے مطابق مختلف ممالک سے عازمین کی آمد کا سلسلہ مرحلہ وار ہوگا، 28اپریل کو جنوبی افریقا سے پہلی پرواز سعودی عرب پہنچے گی۔
دوسرے مرحلے میں 29اپریل کو پاکستان، بھارت اور بنگلادیش سے پروازیں پہنچیں گی، جبکہ 2مئی کو انڈونیشیا سے عازمین حجاج کی آمد ہوگی۔
سعودی وزارت حج وعمرہ کا کہنا ہے کہ عازمین کے استقبال کے لیے مملکت میں تمام انتظامات مکمل کرلیے گئے ہیں۔
مزید پڑھیں : پاکستانی عازمین حج کیلیے ضروری ہدایات
یاد رہے کہ وزارت مذہبی امور پاکستان نے عازمین کیلیے ضروری ہدایات جاری کرتے ہوئے کہا ہے کہ سعودی عرب روانگی سے قبل لازمی ویکسین لگانی ضروری ہیں۔
وزارت مذہبی امور نے ہدایت کی کہ حج پر جانے والے لازمی طور پر گردن توڑ بخار، فلو اور پولیو کی ویکسین نزدیکی حاجی کیمپ سے مفت لگوائیں، ویکسینیشن کے بعد حاجی کیمپ سے پیلا کارڈ لازمی حاصل کریں کیونکہ سرٹیفیکیٹ کے بغیر سعودی عرب میں داخلہ ممکن نہیں۔
ہدایت کی گئی کہ 65 سال سے زائد عمر کے عازمین حج اپنا پرانا کورونا ویکسین کارڈ لازمی ہمراہ رکھیں، کارڈ نہ ہونے کی صورت میں صرف وہی افراد نزدیکی حاجی کیمپ سے کورونا ویکسین لگوا کر کارڈ حاصل کریں۔
