ARYNews.tv | Urdu – Har Lamha Bakhabar

Tag: First Hajj Flight

  • پاکستان سے حج آپریشن کا آغاز، پروازوں کی روانگی شروع

    پاکستان سے حج آپریشن کا آغاز، پروازوں کی روانگی شروع

    اسلام آباد: پاکستان سے حج آپریشن کا باقاعدہ آغاز ہوگیا، اسلام آباد ایئرپورٹ سے پہلی حج پرواز عازمین حج کو لیکر مدینہ منورہ روانہ ہوگئی، وفاقی وزیرمذہبی امورسردار محمد یوسف اور سعودی سفیر نے عازمین حج کو رخصت کیا۔ اس موقع پر وفاقی وزیر کو روڈ ٹو مکہ امیگریشن منصوبے پر بریفنگ دی گئی۔

    اے آر وائی نیوز کے مطابق اسلام آباد سے پی آئی اے کی پرواز 713 آج صبح 393 عازمین کو لے کر روانہ ہوئی جبکہ کوئٹہ سے پی آئی اے کی پرواز 7201 صبح ساڑھے نو بجے 150 مسافروں کے ساتھ روانہ ہوئی۔

    ملتان سے پی آئی اے کی پرواز پی کے 715 رات کو 393 عازمین کو لے کر روانہ ہوگی جبکہ کراچی سے پرواز ای آر 1611 رات ساڑھے نو بجے 285 عازمین کو لے کر روانہ ہوئی۔

    لاہور سے حج کی پہلی پرواز پی ایف 7700 ڈیڑھ سو عازمین کو لیکر مدینہ منورہ روانہ ہوئی، وزیر صحت خواجہ سلمان رفیق نے عازمین حج کو مقدس سفر پر روانہ کیا۔

    لاہور سے دوسری پرواز پی کے 747 تین سوانتیس عازمین کے ساتھ رات سوا 10 بجے روانہ ہوگی۔ حج آپریشن کے پہلے روز 6 پروازوں کے ذریعے عازمین کو حجازمقدس پہنچایا جائے گا۔ حج ڈیپارٹمنٹ کے ڈائریکٹر حج سینٹرل پنجاب محمد رضوان شریف اور دیگر عہدیداران بھی موجود تھے۔

    واضح رہے کہ سرکاری حج اسکیم کے تحت 342 پروازوں کے ذریعے عازمین کو حجاز مقدس پہنچایا جائے گا۔

    سرکاری حج اسکیم کے تحت 89 ہزار عازمین کو مدینہ منورہ اور مکہ مکرمہ لے جایا جائے گا، پاکستان سے آخری حج پرواز 31 مئی کو روانہ ہوگی۔

    عازمین حج کی پروازیں کب روانہ ہوں گی؟ شیڈول جاری

    وزارت مذہبی امور کے مطابق عازمین حج کو حجاز مقدس پہنچانے کا حج آپریشن 33 روز جاری رہے گا، اسلام آباد ائیر پورٹ سے100پروازوں میں 28 ہزار 400 عازمین حجاز مقدس روانہ ہونگے۔

  • پی آئی اے حج آپریشن: 9 ہزار عازمین سفر مقدس کے لیے روانہ

    پی آئی اے حج آپریشن: 9 ہزار عازمین سفر مقدس کے لیے روانہ

    لاہور: صوبہ پنجاب کے دارالحکومت لاہور سے پاکستان انٹرنیشنل ایئر لائن (پی آئی اے) کی رواں برس کی پہلی حج پرواز 327 عازمین کو لے کر مدینہ منورہ کے لیے روانہ ہوگئی۔

    تفصیلات کے مطابق پاکستان انٹرنیشنل ایئر لائن (پی آئی اے) کا قبل از حج آپریشن جاری ہے، ہفتہ 27 مئی کی صبح تک 33 پروازوں کے ذریعے 9 ہزار عازمین حج کو سعودی عرب پہنچا دیا گیا۔

    لاہور سے پہلی حج پرواز پی کے 743 کے ذریعے 327 عازمین حج مدینہ منورہ کے لیے روانہ ہوئے، لاہور ایئرپورٹ پر عازمین حج کو رخصت کرنے کے موقع پر ایک سادہ پروقار تقریب کا اہتمام کیا گیا۔

    پی آئی اے کے چیف آپریٹنگ آفیسر امان اللہ قریشی اور جنرل مینیجر پیسنجر ہینڈلنگ ذوالقرنین مہدی نے عازمین حج کو رخصت کیا۔

    عازمین کو ہر ممکن سہولیات کی فراہمی کے لیے ملک بھر کے ایئر پورٹس پر خصوصی انتظامات کیے گئے۔

    ترجمان پی آئی اے کا کہنا ہے کہ لاہور سے 41 پروازوں کے ذریعے 11 ہزار سے زائد عازمین حج کو مدینہ منورہ اور جدہ پہنچایا جائے گا۔

    پی آئی اے کا روانگی حج آپریشن 22 جون کو مکمل ہوگا جبکہ سعودی عرب سے حجاج کی واپسی 2 جولائی سے شروع ہوگی جو 2 اگست تک جاری رہے گی۔

  • پی آئی اے کی پہلی ہی حج پرواز 5 گھنٹے تاخیر کا شکار

    پی آئی اے کی پہلی ہی حج پرواز 5 گھنٹے تاخیر کا شکار

    کوئٹہ: پاکستان سے حج پروازوں کا آغاز ہوچکا ہے تاہم کوئٹہ سے جانے والی پہلی پاکستان انٹرنیشنل ایئر لائنز (پی آئی اے) حج پرواز 5 گھنٹے تاخیر کا شکار ہوگئی۔

    تفصیلات کے مطابق صوبہ بلوچستان کے دارالحکومت کوئٹہ سے حج کے لیے روانہ ہونے والی پہلی پرواز تاخیر کا شکار ہوگئی۔

    عازمین کو پی آئی اے کی پرواز سے کوئٹہ سے پہلے کراچی لے جایا جانا تھا، کراچی سے عازمین نے دوسرے جہاز میں مدینہ منورہ کے لیے روانہ ہونا تھا۔

    عازمین کو روانگی کے لیے صبح 8 بجے کا وقت دیا گیا تھا تاہم جہاز پہنچنے میں تاخیر کے باعث روانگی کا وقت تبدیل کر کے پہلے پونے 12 بجے کیا گیا۔

    تاہم پونے 12 بجے بھی پرواز روانہ نہ ہوسکی، کراچی کے لیے پرواز نے دوپہر 1 بج کر 40 منٹ پر ٹیک آف کیا۔

    ذرائع کا کہنا ہے کہ کوئٹہ سے پہلی 6 پروازیں براہ راست مدینہ منورہ نہیں جائیں گی تاہم ساتویں پرواز براہ راست مدینہ منورہ جا سکے گی۔

  • حجاج کرام کی وطن واپسی کا عمل آج رات سے شروع ہوگا، پی آئی اے کی تیاریاں مکمل

    حجاج کرام کی وطن واپسی کا عمل آج رات سے شروع ہوگا، پی آئی اے کی تیاریاں مکمل

    کراچی / پشاور : سعودی عرب سے پاکستانی حجاج کرام کی وطن واپسی کا آغاز آج رات سے ہوگا، پی آئی اے کی پہلی حج پرواز جدہ سے لاہور کیلئے علی الصبح روانہ ہوگی۔

    تفصیلات کے مطابق فریضہ حج کی ادائیگی کے بعد پاکستانی حجاج کرام کی وطن واپسی کا عمل آج سے شروع ہو رہا ہے، جدہ کے حج ٹرمینل پر رش اور سیکیورٹی کی وجہ سے حجاج کرام کو10گھنٹہ پہلے ایئرپورٹ پہنچنے کی ہدایت کی گئی ہے جس کے بعد حجاج کو پہنچانے کا انتظامات کردیئے گئے ہیں۔

    اس حوالے سے چیف حج کوآرڈنیٹر عامر بشیر کا کہنا ہے کہ پی آئی اے پرواز کی روانگی سے6گھنٹے قبل مسافروں کی بورڈنگ شروع کردے گی۔

    پہلی حج پروازپی کے760جدہ سے لاہورکیلئے علی الصبح روانہ ہوگی، مذکورہ پرواز100سے زائد حجاج کرام کو لے کر ہفتے کی صبح10بج کر40منٹ پر لاہور پہنچے گی، دوسری حج پروازپی کے764جدہ سے فیصل آباد کیلئے روانہ ہوگی، پرواز فیصل آباد شام4بج کر40منٹ پرپہنچے گی۔

    چیف حج کوآرڈنیٹر کے مطابق تیسری حج پروازپی کے8702جدہ سے کراچی کیلئے روانہ ہوگی، یہ پرواز شام6 بجے کراچی پہنچے گی جبکہ پی آئی اے کی چوتھی پرواز پی کے716مدینہ سے اسلام آبا دکیلئے روانہ ہوگی، یہ پرواز شام 7بجے اسلام آباد پہنچے گی۔

    ترجمان پی آئی اے کا کہنا ہے کہ پی آئی اے اپنے حج آپریشن کے پہلے روز900سے زائد حجاج کرام کو وطن پہنچائے گی، فیصل آباد، لاہور، کراچی اور اسلام آباد حجاج کرام پہنچیں گے۔

    پی آئی اے کراچی کے لئے 20766،اسلام آباد کیلئے16095،لاہور سے کیلئے15272،ملتان کیلئے4707،فیصل آباد کیلئے1889،سیالکوٹ کیلئے4607،پشاور کیلئے10609اور کوئٹہ کیلئے8324حجاج کرام کو وطن پہنچایا جائے گا۔

    ترجمان پی آئی اے کے مطابق پی آئی اے حج آپریشن میں290پروازوں کے ذریعے82ہزارسے زائد حجاج کرام کووطن پہنچا ئے گی، حج آپریشن ملک کے10بڑے شہروں کیلئے کیا جارہاہے، پی آئی اے حج آپریشن میں بوئنگ777 اورایئربس320طیارے استعمال کررہی ہے، پی آئی اے کا حج آپریشن14ستمبر تک جاری رہے گا۔

    دوسری جانب سول ایوی ایشن اتھارٹی نے بھی لاہور، اسلام آباد، کوئٹہ، سیالکوٹ، فیصل آباد اور پشاور ایئر پورٹ پر انتظامات مکمل کر لئے ہیں، کراچی اور پشاور ائرپورٹ پر حجاج کرام کی وطن واپسی کے حوالے سے انتظامات مکمل کر لئے گئے۔

    ائیر پورٹ ذرائع کے مطابق نجی ائیر لائنز کے ذریعے213 حجاج کرام دوپہر دو بجے پشاور پہنچیں گے، باچا خان انٹرنیشنل ائیرپورٹ کے سی ای او عبید الرحمان عباسی، پی ٹی آئی ایم پی اے نظیر عباسی حجاج کرام کا استقبال کریں گے۔

    باچا خان انٹرنیشنل ائیر پورٹ پر73 پروازوں کے ذریعے25000 حجاج کرام کو وطن لایا جائے گا۔
    علاوہ ازیں سی ای او ایئرمارشل ارشد ملک نے ہدایات جاری کی ہیں کہ بعد از حج آپریشن کے دوران حجاج کرام کو ہر ممکن سہولیات کی فراہمی کو یقینی بنایا جائے۔

  • حجاج کرام کی پہلی حج پرواز 17 اگست کو وطن واپس پہنچے گی

    حجاج کرام کی پہلی حج پرواز 17 اگست کو وطن واپس پہنچے گی

    کراچی : فریضہ حج کی ادائیگی کے بعد پاکستانی حاجیوں کو لے کر پہلی حج پرواز17اگست کو پاکستان پہنچے گی، ایئر پورٹس پر حجاج کرام کی وطن واپسی کیلئے خصوصی انتظامات کیے گئے ہیں۔

    تفصیلات کے مطابق حجاج کرام کی وطن واپسی کے لئے پی آئی اے سمیت دیگر ائیر لائن کا آپریشن17 اگست سے شروع ہوگا، حجاج کرام کی پہلی حج پرواز17اگست کو کراچی پہنچے گی۔

    حجاج اکرام کی پہلی سعودی ائیرلائن کی پرواز ایس وی 706 ہفتہ کی دوپہر جدہ سے کراچی پہنچے گی، اس حوالے سے وزارت مذہبی امور کا کہنا ہے کہ ایئر پورٹ پر حجاج اکرام کا شاندار استقبال کیا جائے گا۔

    ائیرپورٹ پر حجاج کرام کو تمام سہولتیں فراہم کی جائیں، اس سلسلے میں تمام ائیرپورٹ مینجرز کو وزارت مذہبی امور کی جانب سے ہدایت جاری کی گئی ہے کہ ملک بھر کے دیگر ائیرپورٹس پر بھی حجاج اکرام کی وطن واپسی کے حوالے سے خصوصی انتظامات کئے جائیں۔

    مزید پڑھیں: پی آئی اے کا قبل از حج آپریشن مکمل،82300 عازمین سعودی عرب پہنچ گئے

    واضح رہے کہ پی آئی اے نے کامیابی سے قبل از حج آپریشن مکمل کیا تھا، پی آئی اے نے ایک ماہ طویل قبل ازحج آپریشن میں292 پروازوں کے ذریعے82300 عازمین کو سعودی عرب پہنچایا۔

    پی آئی اے کی آخری حج پرواز لاہور سے جدہ روانہ ہوئی تھی، پرواز پی کے739 کے400 سے زائد عازمین کو رخصت کیا گیا تھا۔

  • روڈ ٹو مکہ پروجیکٹ کا باقاعدہ آغاز ، عازمین حج کی مشکلات ختم

    روڈ ٹو مکہ پروجیکٹ کا باقاعدہ آغاز ، عازمین حج کی مشکلات ختم

    اسلام آباد : حج پروازوں کا آغاز کر دیا گیا، روڈ ٹومکہ پراجیکٹ کے تحت اسلام آباد ایئرپورٹ سے سعودی ائیرلائن کی پرواز عازمین حج کو لے کر روانہ ہوگئی ، پہلی مرتبہ 22000 حج کی بائیومیٹرک امیگریشن اسلام آباد ایئرپورٹ پر ہورہی ہے۔

    تفصیلات کے مطابق اسلام آباد ایئرپورٹ پر پروجیکٹ روڈ ٹو مکہ کا باقاعدہ آغاز ہوگیا ، ،ساڑھے تین سو عازمین امیگریشن کےبعد سعودی ائیرلائن کی پرواز ایس وی 719 کے زریعے حجازمقدس روانہ ہوگئے۔

    پہلی پرواز کو الوداع کرنے کے لئے سعودی امیگریشن عملہ سعودی سفیر وفاقی وزیر مذہبی امور اور ایوی ایشن کے وزیر بھی ائیرپورٹ پر موجود رہے۔

    پی آئی اے بھی کل سے باضابطہ طور پر اسلام آباد سے اپنی پہلی حج پرواز کا آغاز کرے گی۔

    دوسری جانب روڈ ٹو مکہ منصوبہ کے تحت وزیر اعظم کے مشیر ارباب شہزاد اور سعودی ڈی جی امیگریشن میجر جنرل یحیی نے انتظامات کاجائزہ لیا ، اس موقع پر وفاقی سیکرٹری مذہبی امور میاں مشتاق، سیکرٹری سول ایوی ایشن اور سعودی سفیر بھی ہمراہ تھے۔

    سعودی اور پاکستانی حکام کو سعودی اور پاکستانی امیگریشن عملہ نے ائیرپورٹ پر تفصیلی بریفنگ دی، سعودی حکام کاکہناتھا کہ روڈ ٹو مکہ، سعودی حکومت کے ویژن 2030 میں شامل ایک اہم اقدام ہے، سعودی عرب آنے والوں کے لئے ای ویزہ، کسٹم اور ایمیگریشن کے تمام مراحل ان کے اپنے ملک میں ہی طے پائیں گے۔

    مزید پڑھیں : اسلام آباد ایئرپورٹ پر روڈ ٹو مکہ منصوبے کا کامیاب تجربہ

    سعودی حکام نے کہا وزیراعظم عمران خان کی دلچسپی کی بنا پر سعودی ولی عہد شہزادہ محمد بن سلیمان نے پاکستان کو منصوبے میں شامل کیا، اسلام آباد انٹرنیشنل ایئرپورٹ کو پائلٹ پراجیکٹ کے طور پرمنتخب کیاگیا ۔ منصوبے کے تحت عازمینِ حج کا سامان براہ راست ان کی رہائش گاہوں تک پہنچایا جائے گا، بعدازاں پراجیکٹ کا دائرہ کار بتدریج دوسرے پاکستانی ایئرپورٹس تک بھی بڑھایاجائے گا۔

    یاد رہے وزیراعظم عمران خان روڈ ٹو مکہ پراجیکٹ کا افتتاح کل اسلام آباد ایئرپورٹ پر کریں گے جبکہ پہلی حج پرواز اسی روز عازمین کو لے کر روانہ ہوگی، روڈ ٹو مکہ پراجیکٹ کے تحت پاکستانی عازمین کو سعودی عرب پہنچ کر امیگریشن نہیں کرانا پڑے گی۔

    خیال رہے وزیراعظم عمران خان نے سعودی ولی عہد سے پاکستان کو روڈ ٹو مکہ میں شامل کرنے کی درخواست کی تھی، روڈ ٹو مکہ منصوبہ کے تحت رواں سال 90 فیصد پاکستانی عازمین حج کی امیگریشن پاکستان میں ہو گی۔

  • پشاور ایئرپورٹ سے پہلی حج پرواز5جولائی کو روانہ ہوگی

    پشاور ایئرپورٹ سے پہلی حج پرواز5جولائی کو روانہ ہوگی

    کراچی : پشاور ایئرپورٹ سے پہلی حج پرواز5جولائی کو روانہ ہوگی, پی آئی اے کی14حج پرواز وں کے ذریعے دس ہزار سے زائد عازمین حجاز مقدس روانہ ہوں گے۔

    تفصیلات کے مطابق باچا خان انٹر نیشنل ایئرپورٹ پر حج آپریشن سے متعلق تیاریاں مکمل کرلی گئیں، عازمین کی حجاز مقدس روانگی کے حوالے سے اعلیٰ سطح کا اجلاس چیف آپریٹنگ آفیسر عبید الرحمان کی سربراہی میں منعقد ہوا۔

    اجلاس میں ڈائریکٹر حج شکیل سیٹھی، ایف آئی اے، اے ایس ایف اور دیگر سیکیورٹی اداروں نے افسران نے شرکت کی، اجلاس میں فیصلہ کیا گیا کہ پشاور ایئرپورٹ سے پہلی حج پرواز5جولائی کو عازمین کو لیکر مدینہ روانہ ہوگی۔

    سعودی ایئرلائن کی پرواز سے200سے زائد عازمین مدینہ روانہ ہوں گے، اس موقع پر گورنر کے پی کے، ڈائریکٹر حج اور سی اے اے کے اعلیٰ افسران عازمین کو الوداع کہیں گے، پشاور ایئرپورٹ سے31پروازوں کے ذریعے مجموعی طور پر24ہزار سے زائد عازمین کو حجاز مقدس روانہ کیا جائے گا۔

    پی آئی اے کی14حج پرواز وں کے ذریعے دس ہزار سے زائد عازمین حجاز مقدس روانہ ہوں گے، اس کے علاوہ نجی ایئر لائن ائیر بلو کی چھ پروازوں کے ذریعے تین ہزار سے زائد عازمین حجاز مقدس روانہ ہوں گے جبکہ سعودی ائیر کی پرواز سے8ہزار سے زائد عازمین حجاز مقدس روانہ ہوں گے۔

    مذکورہ حج آپریشن5اگست تک جاری رہے گا۔ ڈائریکٹر حج نے اجلاس کو بریفنگ دیتے ہوئے بتایا کہ حاجی کیمپ سے عازمین کو چار گھنٹے قبل ایئرپورٹ پہنچایا جائے گا۔

    ایئرپورٹ منیجرعبیدالرحمان عباسی نے کہا کہ عازمین کو سہولت کیلئے تمام تر انتظامات مکمل ہیں، باچا خان انٹرنیشنل ایئرپورٹ پرعازمین کی سہولت کیلئے تین ایمیگریشن کاؤنٹرز مختص کئے گئے ہیں۔

    ایئرپورٹ پر کسی بھی قسم کی کوتاہی برداشت نہیں کی جائے گی، اجلاس میں سی او او نے ہدایت کی کہ باچا خان ایئرپورٹ پر تمام ادارے اپنی افرادی قوت میں مزید اضافہ کریں۔