بالی ووڈ کی سینئر اداکارہ نیتو سنگھ نے شوہر و آنجہانی اداکار رشی کپور سے ہونے والی پہلی ملاقات کو خوفناک قرار دیا۔
سینئر اداکارہ نیتو سنگھ نے حال ہی میں ایک ریڈیو شو میں شرکت کی جہاں انہوں نے اپنی زندگی سے متعلق گفتگو کی ساتھ ہی رشی کپور سے پہلی ملاقات کا احوال بھی بتایا۔
اداکارہ نے شوہر رشی کپور سے ہونے والی پہلی ملاقات کے حوالے سے بات کرتے ہوئے کہا کہ رشی سے میری پہلی ملاقات خوفناک تھی کیونکہ انہیں مذاق اڑانے کی عادت تھی، پہلی ملاقات میں رشی نے میرے میک اپ اور کپڑوں پر تبصرہ کیا جس پر مجھے بہت غصہ آیا تھا۔
اداکارہ کا کہنا تھا کہ فلم بوبی کے سپرہٹ ہونے کے بعد اداکارہ ڈمپل نے شادی کرلی اور رشی کے پاس کوئی اور ہیروئن نہیں تھی کیونکہ ہر کوئی ان سے عمر میں بڑی لگتی تھی، میں واحد نوجوان اداکارہ تھی اور فلم رکشہ والا کے بعد رشی کی تمام فلمیں میرے پاس آنے لگیں تھی۔
نیتو سنگھ کا کہنا تھا کہ جب ہم نے منگنی کرنے کا فیصلہ کیا تو میں نے سائن کی ہوئی فلموں کی رقم واپس کردی تھی اور ساتھ ہی ہدایت کاروں کو تمام زیر التوا فلموں کو مکمل کرنے کا نوٹس بھی دیا۔
واضح رہے کہ اداکارہ نیتو سنگھ اور رشی کپور کی منگنی 13 اپریل 1979 کو ہوئی تھی جب کہ دونوں اداکاروں نے سال 1980 میں شادی کی، نیتو سنگھ نے شادی کے بعد فلمی کیرئیر کو خیرباد کہہ دیا تھا، ان کے 2 بچے رنبیر اور ریدھیما کپور ہیں۔
اداکار رشی کپور خون کے سرطان میں مبتلا تھے اور وہ ممبئی میں سال 2020 میں انتقال کرگئے۔
