اسمارٹ فون کی اسکرین پر اسکریچز آجانا جہاں ایک طرف تو فون کو جلد خراب کرنے کا سبب بنتا ہے، تو دوسری طرف اس کی مرمت پر بھی خطیر رقم خرچ ہوسکتی ہے۔
تاہم اب جنوبی کوریا کے ماہرین نے ایسی تحقیق پیش کی ہے جس کے ذریعے اس اسکریچز کی مرمت کی جاسکتی ہے۔
کوریا انسٹی ٹیوٹ آف سائنس اینڈ ٹیکنالوجی کے ماہرین نے السی کے تیل سے محلول تیار کیا ہے جو فون کے اسکریچز کی مرمت کرسکتا ہے۔
السی کا تیل کرکٹ بیٹس اور مصوری کے فن پاروں کو محفوظ رکھنے کے لیے بھی استعمال کیا جاتا ہے کیونکہ یہ بے رنگ ہوتا ہے۔
ماہرین نے لیبارٹری میں کیے جانے والے تجربے میں دیکھا کہ جب موبائل فون کی اسکرین کے اسکریچز پر یہ محلول ڈالا گیا تو کچھ وقت کے بعد اسکرین سے اسکریچز غائب ہوگئیں۔
ماہرین کے مطابق یہ محلول 20 منٹ کے اندر اسکریچز کو 95 فیصد تک درست کردیتا ہے۔
