نئی دہلی: بھارت میں چند منچلوں نے دوست کی سالگرہ منانے کے لیے پورا فلائی اوور بلاک کردیا، پولیس نے متعدد افراد کو گرفتار کر کے بقیہ کی تلاش شروع کردی۔
بھارتی میڈیا کے مطابق مذکورہ واقعہ بھارتی شہر پٹنہ میں پیش آیا جہاں 20 سے زائد نوجوانوں نے پاٹلی فلائی اوور بلاک کردیا۔
نوجوانوں نے 2 لین فلائی اوور کے ایک طرف درجن بھر گاڑیاں پارک کیں اور ایک گاڑی کے بونٹ پر کیک رکھ کر دوست کی سالگرہ منانی شروع کردی۔
— The Moon I Could See (@TheMoonICouldS) May 13, 2022
اس دوران کچھ لڑکوں نے ہوائی فائرنگ بھی گئی، تیز آواز میں میوزک بجایا اور رقص بھی کیا۔
تمام لڑکوں نے گاڑی کے بونٹ پر کیک کاٹ کر خوب جشن منایا، ’تقریب‘ کو ایک شخص کے انسٹاگرام پر لائیو نشر بھی کیا گیا۔
سوشل میڈیا پر ویڈیو وائرل ہونے کے بعد پولیس نے مذکورہ لڑکوں کی تلاش شروع کردی، جس لڑکے کی سالگرہ تھی اس لڑکے سمیت 4 افراد کو گرفتار کرلیا گیا جبکہ دیگر کی تلاش جاری ہے۔
پولیس کا کہنا ہے کہ آدھے گھنٹے تک فلائی اوور پر پارٹی کرنے والے تمام لڑکوں کی شناخت کرلی گئی ہے اور جلد سب کے سب جیل کی سلاخوں کے پیچھے ہوں گے۔
