Tag: food authority

کراچی : وزیراعلیٰ سندھ مراد علی شاہ کو مضر صحت کھانا کھانے سے 5 بچوں کی موت سے متعلق ابتدائی رپورٹ پیش کردی گئی ، وزیراعلیٰ سندھ نے کمشنرکراچی کو ہدایت کی کہ بچوں کےوالدین سےخودجاکر ملیں، اگروہ واپس کوئٹہ جاناچاہتےہیں توان کے لیے بندوبست کیاجائے۔

تفصیلات کے مطابق سندھ فوڈ اتھارٹی نے وزیراعلیٰ سندھ مراد علی شاہ کو5 بچوں کی موت سے متعلق ابتدائی رپورٹ پیش کردی ہے، رپورٹ میں بتایا گیا ہے کہ پولیس کے مطابق متعلقہ خاندان کوئٹہ سےآیاتھا، خاندان کوئٹہ سے پہنچنے کے بعدقصرنازمیں ٹھہراتھا، سفرکےدوران متاثرہ خاندان نے خضدار اور حب  میں کھاناکھایا، جب وہ کراچی پہنچے تو پارسل بریانی لی جو اپنے کمرے میں کھائی۔

رپورٹ میں کہا گیا بریانی کھانے کے بعد خاتون نےالٹیاں کیں، شوہر نے خاتون کو نجی اسپتال منتقل کی، صبح واپس قصرناز پہنچے تو 5 بچے، رشتہ دار کمرے میں بیہوش پڑے تھے، وہ فوراً ان کواسپتال لےگئے لیکن وہ اسپتال میں مردہ تصدیق کئےگئے۔

سندھ فوڈاتھارٹی نے وزیراعلیٰ سندھ کو آگاہ کیا نوبہارریسٹورنٹ سےکھانےکےنمونے حاصل کیے جبکہ قصرناز روم سے بھی کھانے کے نمونے حاصل کیےگئے ہیں، تمام نمونے ٹیسٹ کیلئے بھیجے جارہے ہیں۔

مزید پڑھیں : مضر صحت کھانا کھانے سے 5 بچوں کی اموات، ریسٹورنٹ عملے کوحراست میں لے لیا گیا

وزیراعلیٰ سندھ نے کمشنرکراچی کو ہدایت کی کہ بچوں کےوالدین سےخودجاکر ملیں، اگروہ واپس کوئٹہ جاناچاہتےہیں توان کے لیے بندوبست کیاجائے۔

مراد علی شاہ نے کہا مجھے اس واقعہ سےدلی صدمہ ہوا، والدین کی تکلیف محسوس کررہاہوں، ان کےساتھ باقاعدہ انصاف ہوگا۔

یاد رہے شہر قائد میں میں ریسٹورنٹ کا مضرصحت کھاناکھانےسےایک ہی خاندان کے5 بچےجاں بحق ہوگئے تھے ، پولیس نے ریسٹورنٹ عملے کوحراست میں لے لیا ہے جبکہ بچوں کی لاشوں کوپوسٹ مارٹم کیلئےسول اسپتال منتقل کردیاگیا۔