ARYNews.tv | Urdu – Har Lamha Bakhabar

Tag: Football

  • فٹبال کا بخار، ایرانی حکومت نے 39 برس بعد خواتین کے لیے قانون میں‌ نرمی کردی

    فٹبال کا بخار، ایرانی حکومت نے 39 برس بعد خواتین کے لیے قانون میں‌ نرمی کردی

    تہران: ایران کی حکومت نے فٹبال ٹیم کی پہلے میچ میں کامیابی کے بعد خواتین کو  بڑا تحفہ دینے کا اعلان کردیا۔

    ایرانی میڈیا کے مطابق ایران اور اسپین کے مابین 20 جون کی رات ساڑھے دس بجے کھیلے جانے والے میچ کو دیکھنے کے لیے آزادی اسٹیڈیم میں خصوصی انتظامات کیے جائیں گے۔

    ایران میں 1979 کو  آنے والے اسلامی انقلاب کے بعد یہ پہلا موقع ہوگا کہ خواتین بھی اسٹیڈیم جاکر میچ دیکھ سکیں گی، انتظامیہ کی جانب سے گراؤنڈ میں بڑی اسکرین نصب کی جائے گی جبکہ ایک لاکھ شرکاء کے بیٹھنے کے لیے بھی انتظامات کیے جائیں گے۔

    صوبائی حکومت نے یہ فیصلہ پہلے میچ میں فتح کے بعد کیا، فیفا ورلڈ کپ کا آغاز ہونے کے دوسرے روز ایران اور مراکش کی ٹیمیں مدمقابل تھیں جس میں تہران نے 1 گول سے مقابلہ اپنے نام کیا تھا۔

    مزید پڑھیں: فیفا ورلڈ کپ 2018: یوروگوائے اور ایران کا فاتحانہ آغاز

    ٹیم کی کامیابی کے بعد ایران کے مختلف علاقوں میں فٹبال کے مداح گلیوں میں نکل گئے تھے اور انہوں نے فتح پر خوب جشن منایا تھا، حیران کُن طور پر اس میں خواتین کی بھی بڑی تعداد شامل تھی جو اپنی ٹیم کی جیت پر خوشی سے نہال نظر آرہی تھی۔

    مقامی انتظامیہ کی جانب سے پہلے میچ کے لیے اسٹیڈیم میں اسکرین لگانے کا اعلان کیا گیا تھا تاہم بعد میں مذہبی جماعتوں کی تنقید کے بعد حکومت نے اسے واپس لے لیا تھا جس کے بعد سینیما گھروں میں بڑی تعداد میں شائقین نے مقابلہ دیکھا تھا۔

    اسے بھی پڑھیں: ایران: مردوں کے بھیس میں فٹبال میچ دیکھنے والی 8 خواتین گرفتار

    ایرانی میڈیا کے مطابق بدھ 20 جون کو ہونے والے میچ کو دیکھنے کے لیے ایک لاکھ افراد کی آمد متوقع ہے جس کے لیے سیکیورٹی کے بھی خصوصی اقدامات کیے جائیں گے۔

    ایران میں خواتین کے حقوق کے لیے کام کرنے والی رکن پارلیمنٹ طیبیہ سیوشی کا کہنا ہے کہ ’حکومت کی جانب سے یہ اعلان خوش آئند ہے اور امکان ظاہر کیا جاسکتا ہے کہ اب ہمارے یہاں پالیسی تبدیل ہونے جارہی ہے’ْ

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • فیفا ورلڈ کپ 2018: اسپین اور پرتگال کا میچ 3-3 گول سے برابر

    فیفا ورلڈ کپ 2018: اسپین اور پرتگال کا میچ 3-3 گول سے برابر

    ماسکو: فیفا ورلڈ کپ 2018 کے دوسرے دن اسپین اور پرتگال کے درمیان کھیلا جانے والا میچ 3-3 گول سے برابر ہوگیا۔

    تفصیلات کے مطابق آج روس میں منعقد فٹبال کے عالمی مقابلے کے گروپ بی میں اسپین اور پرتگال مدمقابل آئیں تاہم میچ فتح یا شکست کے بغیر تین تین گول سے برابر ہوگیا۔

    پرتگال کی جانب سے عالمی شہرت یافتہ کھلاڑی کرسٹیانو رونالڈو نے عمدہ کارکردگی کا مظاہرہ کیا اور اپنی ٹیم کی طرف سے تینوں گول خود ہی داغے لیکن پھر بھی ٹیم فتح نہ سمیٹ سکی۔

    فیفا ورلڈ کپ 2018: یوروگوائے اور ایران کا فاتحانہ آغاز

    علاوہ ازیں آج ہی دن کھیلے گئے فیفا ورلڈ کپ کے دیگر دو میچز میں یوروگوائے اور ایران نے فاتحانہ آغاز کیا، میچز میں یوروگوائے نے مصر کو شکست دے دی، جب کہ ایران نے مراکش کو ہرا کر فتح اپنے نام کرلی۔

    خیال رہے کہ آج گروپ اے میں مصر اور یوروگوائے کی ٹیمیں آمنے سامنے تھیں، مصر کی جانب سے بہترین کھیل کا مظاہرہ کرنے کے باوجود کھیل کے آخری لمحات میں ہونے والے شان دار گول کے باعث یوروگوائے فاتح قرار پایا۔

    واضح رہے کہ گروپ اے میں شامل روس اور سعودی عرب گذشتہ روز مدمقابل آئے تھے، اس یک طرفہ میچ میں‌ روس نے پانچ سفر سے کامیابی حاصل کی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • فٹبال کا جنون، سپرمارکیٹ میں بھی نظر آنے لگا، ویڈیو دیکھیں

    فٹبال کا جنون، سپرمارکیٹ میں بھی نظر آنے لگا، ویڈیو دیکھیں

    برازیلیا: برازیل میں فٹبال کا جنون لوگوں میں کس حد تک موجود ہے اس بات کا اندازہ سوشل میڈیا پر وائرل ہونے والی ویڈیو  سے لگایا جاسکتا ہے۔

    تفصیلات کے مطابق برازیل وہ ملک ہے جہاں فٹبال کو قومی کھیل کا درجہ حاصل ہے یہی وجہ ہے کہ برازیل کی ٹیم اب تک 5 بار فیفا چیمپئن بن کر ابھری ہے۔

    برازیل نے دنیائے فٹبال کے نامور کھلاڑی پیدا کیے جن میں ورنالڈو، رونالڈینیو اور روبٹا کارلوس ودیگر قابل ذکر ہیں علاوہ ازیں ایسے بھی نوجوان پلیئرز سامنے آئے جن کی مہارت کو دیکھ کر دنیا دنگ رہ جاتی ہے۔

    سوشل میڈیا پر وائرل ہونے والی ویڈیو میں دیکھاجاسکتا ہے کہ ایک نوجوان سپرمارکیٹ میں موجود ہے اور اُس نے ہاتھوں میں بہت سارا سامان تھاما ہوا ہے کہ اچانک ڈبا اُس کی گود سے نیچے گرنے لگا۔ ویڈیو میں دیکھا جاسکتا ہے کہ نوجوان نے فٹبال کی طرح ڈبے کو  نہ صرف گرنے سے بچایا بلکہ اُسے دوبارہ اپنی گود میں کامیابی سے رکھ لیا۔

    انٹرنیٹ پر وائرل ہونے والی ویڈیو کو اب تک لاکھوں صارفین دیکھ چکے ہیں جنہوں نے مذکورہ شخص کی مہارت کو خوب سراہا اور اُسے اپنی داد سے بھی نوازا، کچھ صارفین نے تو مشورہ دیا کہ اسے قومی فٹبال ٹیم میں جگہ دی جائے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • میسی نے مخالفین کے لیے خطرے کی گھنٹی بجا دی، ورلڈ کپ وارم اپ میچ میں‌ شان دار ہیٹ ٹرک

    میسی نے مخالفین کے لیے خطرے کی گھنٹی بجا دی، ورلڈ کپ وارم اپ میچ میں‌ شان دار ہیٹ ٹرک

    لابوکا: ارجنٹینی سپراسٹار لائنل میسی نے شان دار ہیٹ ٹریک اسکور کرکے مخالفین کے لیے خطرے کی گھنٹی بجا دی.

    تفصیلات کے مطابق ارجنٹینا نے لائنل میسی کی ہیٹ ٹرک کی بدولت ورلڈ‌ کپ وارم اپ میچ میں ہیٹی کو چار صفر سے شکست دے دی۔

    گذشتہ ورلڈ کپ کا فائنل کھیلنے والی ارجنٹینی ٹیم اس وقت زبردست فارم ہے، جس کی قیادت سپراسٹار لائنل میسی کر رہے ہیں.

    ورلڈ کپ وارم اپ میچ میں بارسلونا کے سپراسٹار بھرپورفارم میں نظر آئے. ہیٹی کے خلاف ارجنٹینا کی گول مشین میسی نے ہیٹ ٹرک اسکور کی۔

    میسی نے پہلا گول پینالٹی پر کیا، دوسرے ہاف میں‌ بھی ہیٹی کے دفاعی کھلاڑی میسی کو روکنے میں‌ ناکام رہے. سپراسٹار نے مزید دو گول بنائے اور ٹیم کو کامیابی دلائی۔

    یاد رہے کہ کھیلوں کا سب سے بڑا میلہ ’فٹبال ورلڈ کپ‘ فقط چند روز دور ہے، عالمی مقابلہ چودہ جون سے روس میں شروع ہوگا۔

    تجزیہ کار ارجنٹینا کو فیورٹ قرار دے رہے ہیں، جس کے کپتان میسی نے ورلڈ کپ سے پہلے ٹیموں کے لئے خطرے کی گھنٹی بجادی۔

    سپراسٹا میسی پانچویں مرتبہ یورپین گولڈن شو کا ایوارڈ لے اڑے

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • سپراسٹا میسی پانچویں مرتبہ یورپین گولڈن شو کا ایوارڈ لے اڑے

    سپراسٹا میسی پانچویں مرتبہ یورپین گولڈن شو کا ایوارڈ لے اڑے

    میڈرڈ: لائنل میسی نے ایک اور حیران کن ریکاڈ اپنے نام کر لیا، اسٹار فٹ بالر نے پانچویں مرتبہ یورپین گولڈن شو کا ایوارڈ جیت لیا۔

    تفصیلات کے مطابق ممتاز ارجنٹینی کھلاڑی نے ایک اور بڑا اعزاز پنے نام لیا، وہ پہلے بھی چار بار یورپین گولڈن شو ایوارڈ اپنے نام کر چکے ہیں اور یہ ایک ریکارڈ ہے۔

    یاد رہے کہ بارسلونا کے اسٹار فٹ بالر لائنل میسی اس وقت کیریر کے عروج پر ہیں. انھوں نے اس برس اپنی ٹیم کو اسپینش لالیگا جتوانے میں‌ اہم ترین کردار ادا کیا، میسی نے رواں‌ سیزن میں سب سے زیادہ یعنی 34 گولز داغے۔

    یہ لائنل میسی کے کیرئیر کا یہ پانچواں یورپین شو ایوارڈ ہے، وہ اس سے قبل دوہزار دس، دوہزار بارہ، دوہزار تیرہ اور سترہ میں بھی یہ ایوارڈ اپنے نام کرچکے ہیں۔

    میسی رواں سیزن سب سے زیادہ پیسہ کمانے والے کھلاڑیوں میں بھی سرفہرست رہے، انھوں نے اپنے روایتی حریف کرسٹیانو رونالڈو کو شکست دے کر یہ اعزاز اپنے نام کیا تھا۔

    اب ممتاز ارجنٹینی کھلاڑی نے ایک اور بڑا ایوارڈ اپنے نام کر لیا ہے، جس سے ان کے مداحوں میں خوشی کی لہر دوڑ گئی۔

    تجزیہ کاروں کے مطابق اس وقت لائنل میسی اپنے کیریر کے عروج پر ہیں، وہ رواں برس روس میں ہونے والے ورلڈ کپ میں اپنی قومی ٹیم کی قیادت کریں گے۔

    واضح رہے کہ لائنل میسی کی شان دار کارکردگی کے طفیل گذشتہ دس برس میں بارسلونا نے ساتویں بار لالیگا کا ٹائٹل اپنے نام کیا ہے۔

    لائنل میسی کی ہیٹ ٹرک، بارسلونا نے لالیگا کا ٹائٹل اپنے نام کر لیا

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • اسپینش فٹ بال کلب ایٹلیٹکو میڈرڈ نے یورپا لیگ جیت لی

    اسپینش فٹ بال کلب ایٹلیٹکو میڈرڈ نے یورپا لیگ جیت لی

    میڈرڈ: معروف اسپینش فٹ بال کلب ایٹلیٹکو میڈرڈ نے یورپا لیگ جیت کر ایک بار پھر یورپ میں‌ اپنی حکمرانی قائم کر لی.

    تفصیلات کے مطابق اسپینش کلبس نے عالمی فٹ بال میں‌ برتی ثابت کر دی، ایٹلیٹکو میڈرڈ نے فرینچ کلب مارسے کو تین صفر سے شکست دے کر یورپا لیگ کی ٹرافی اٹھا لی.

    یورپ میں فٹ بال کے چیمپئن بننے کے لیے اسپینش کلب کا فرینچ کلب مارسے سے ٹاکرا ہوا۔ میچ کی ابتدا ہی میں‌ ایٹلیٹکو کے کھلاڑی چھا گئے، اکیسویں منٹ میں اسٹرائیکر گرزمین نے گول داغ کر حریف ٹیم کو پہلا جھٹکا دیا.

    پہلے ہاف میں ایٹلیٹکو کا گیم پر مکمل کنٹرول رہا، دوسرے ہاف میں ایٹلیٹکو کے مضبوط ڈیفنس نے اپنا کام کردیا، انچاسویں منٹ میں گرزمین نے دوسرا گول کرکے جیت پر تصدیق کی مہر ثبت کر دی۔

    آخری لمحات میں ایٹلیکٹو نے تیسرا گول کرتے ہوئے نو سال میں تیسری مرتبہ یورپا لیگ کا ٹائٹل جیت لیا، میچ کے بعد نیٹ میڈرڈ میں منچلے سڑکوں پر نکل آئے اور ٹیم کی کامیابی پر بھرپور جشن منایا۔

    دل چسپ امر یہ ہے کہ یورپی سطح پر ہونے والے نو میں سے آٹھ فٹ بال  ٹورنامینٹس میں اسپینش کلبس نے اپنی برتری ثابت کی، جس سے اندازہ لگایا جاسکتا ہے کہ دنیا میں بہترین فٹ بال کہاں کھیلی جارہی ہے۔

    یاد رہے کہ رواں ماہ کے آخر میں چیمپیئنز لیگ کا فائنل کرسٹیانو رونالڈ کی ٹیم ریال میڈرڈ اور محمد صلاح کے انگلش کلب لیورپول کے مابین ہوگا، جس میں کانٹے دار مقابلہ متوقع ہے۔

    چیمپیئنز لیگ فائنل: لیورپول اور ریال میڈرڈ مدمقابل، کرسٹیانو رونالڈو اور محمد صلاح میں مقابلہ

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیاپر شیئر کریں۔  

  • اسپینش لالیگا، میسی اور رونالڈو میں‌ ٹاکرا، سنسنی خیز مقابلہ دو دو گول سے برابر

    اسپینش لالیگا، میسی اور رونالڈو میں‌ ٹاکرا، سنسنی خیز مقابلہ دو دو گول سے برابر

    بارسلونا: دنیا کے دو بڑے فٹ بال کلب بارسلونا اور ریال میڈرڈ کا کانٹے دار مقابلہ دو دو گولز سے برابر رہا۔

    تفصیلات کے مطابق ہزاروں تماشائیوں سے بھر کیمپ نو اسٹیڈیم میں روایتی حریفوں میں سنسنی خیز مقابلہ ہوا، جس میں دونوں نے ایک دوسرے کی گول پوسٹ پر تابڑ توڑ حملے کیے۔

    دسویں منٹ میں بارسلونا کے اسٹرائیکر لوئس سواریز نے گول اسکور کرکے اپنے مداحوں کو جشن منانے کا موقع فراہم کیا، مگر ریال میڈرڈ سپراسٹار کرسٹیانو رونالڈو چار منٹ بعد ہی خوب صورت گول اسکور کرکے اپنی ٹیم کو میچ میں واپس لے آئے۔

    پہلے ہاف کے اختتامی لمحات میں بارسلونا کی مشکلات بڑھ گئیں، جب ریفری نے سرگیو رابرٹو کو ریڈ کارڈ دکھا کر میچ سے باہر کردیا۔

    دوسرے ہاف میں بارسلونا پوری قوت سے واپس آئی، ریال کے ڈیفینڈرز لائنل میسی کو نہ روک پائے اور ارجنٹینی سپراسٹارنے گول داغ کو اپنی ٹیم کو برتری دلا دی۔

    ریال میڈرڈ نے تیز کھیل کھیلا، 72 ویں منٹ میں گیرتھ بیل نے شاندا ہٹ لگائی اور گیند جال میں پہنچا دی، یوں مقابلہ برابر ہوگیا، میچ کے اختتام تک کوئی ٹیم گول نہ کرسکی۔

    یاد رہے کہ بارسلونا لالیگا کا موجودہ سیزن جیت چکی ہے، دوسری جانب ریال میڈرڈ نے چیمپینز لیگ کے فائنل تک رسائی حاصل کر لی ہے، جہاں اس کا مقابلہ انگلش کلب لیورپول سے ہے۔

    میچ کی اہم بات یہ تھی کہ بارسلونا اس سیزن میں تاحال ناقابل شکست ہے۔ اگر بارسلونا آخری تین میچز میں شکست سے دامن بچانے میں کامیاب رہی، تو یہ اسپیشن لالیگا میں ریکارڈ ہوگا۔

    چیمپیئنز لیگ فائنل: لیورپول اور ریال میڈرڈ مدمقابل، کرسٹیانو رونالڈو اور محمد صلاح میں مقابلہ

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیاپر شیئر کریں۔  

  • جنوبی افریقہ میں آسمانی بجلی گرنے سے فٹبالر ہلاک

    جنوبی افریقہ میں آسمانی بجلی گرنے سے فٹبالر ہلاک

    کیپ ٹاؤن : جنوبی افریقہ میں آسمانی بجلی کی زد میں آکر جھلس کر زخمی ہونے والے فٹبالر لوینڈا اسپتال میں دم ٹور گئے۔

    تفصیلات کے مطابق دو ماہ قبل گرنے والی آسمانی بجلی کی زد میں آکر جھلسنے والے جنوبی افریقہ کی فٹبال کی ٹیم کے کھلاڑی گذشتہ روز اسپتال میں دم ٹور گئے۔

    غیر ملکی خبر رساں اداروں کا کہنا تھا کہ جنوبی افریقہ کے ماریٹزبرگ یونائٹڈ فٹبال کلب کے 21 سالہ کھلاڑی لوینڈا نٹشانگاسی دوران میچ آسمانی بجلی کی زد میں آکر جھلسنے کے باعث دو ماہ اسپتال میں زیرعلاج تھے۔

    فٹبال کلب کی انتظامیہ نے گذشتہ روز سماجی رابطے کی ویب سائٹ ٹویٹر پر پیغام دیا کہ ’ماریٹزبرگ یونائٹڈ فٹبال کلب کا بہترین کھلاڑی اب اس دنیا میں نہیں رہا، فٹبال ٹیم غم میں ہے‘۔

    واضح رہے کہ ماریٹزبرگ یونائٹڈ جنوبی افریقہ کی پریمئر لیگ رینکنگ میں چوتھے نمبر ہے۔

    فٹبال کلب کے چیئرمین فاروک کڈوڈیا کا کہنا تھا کہ ’ہم لوینڈا کی موت پر بہت زیادہ افسردہ ہیں، کیوں کہ ہمارا بہترین کھلاڑی ہم سے جدا ہوگیا ہے‘۔

    فٹبال کلب کے چیئرمین کا کہنا تھا کہ لوینڈا ایسا کھلاڑی تھا جس نے اپنی محنت اور ٹیلنٹ سے ماریٹز برگ کلب کو پریمئر لیگ کی رینکنگ میں چوتھے نمبر پر لیکر آیا تھا۔

    جنوبی افریقہ کے خبر رساں اداروں کا کہنا تھا کہ آسمانی بجلی کی زد میں آکر لوینڈا کا جسم بری طرح جھلس گیا تھا۔

    خیال رہے کہ لوینڈا کی موت ماریٹز برگ فٹبال کلب کے ساتھ پیش آنے والا تیسرا حادثہ ہے، اس سے قبل سنہ 2016 اور 2017 27 سالہ مونڈی کیلے اور 20 سالہ ملونڈی ڈالمینی تیز رفتار کار کی زڈ میں آکر ہلاک ہوگئے تھے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • دنیا کے تیز ترین ایتھلیٹ فٹبال کے میدان میں اتر گئے

    دنیا کے تیز ترین ایتھلیٹ فٹبال کے میدان میں اتر گئے

    برلن: جمیکا سے تعلق رکھنے والے دنیا کے مقبول اور تیز ترین ایتھلیٹ یوسین بولٹ نے اپنے نئے سفر کا آغاز کرتے ہوئے فٹبال کی دنیا میں قدم رکھ دیا ہے۔

    تفصیلات کے مطابق عالمی شہرت یافتہ کھلاڑی یوسین بولٹ اب جرمن فٹبال کلب بوروسیا ڈورٹمنڈ کے کھلاڑیوں کو ٹریننگ دیتے نظر آئیں گے، فٹبال کلب کی جانب سے نوٹیفکیشن جاری کر دیا گیا۔

    جرمن فٹبال کلب بوروسیا ڈورٹمنڈ نے جاری کردہ بیان میں کہا ہے کہ کلب کی جانب سے ایک خصوصی ٹریننگ سیشن کا آغاز کیا گیا ہے، جس میں اولمپئین ایتھیٹ یوسین بولٹ بحیثیت ٹرینر اپنے خدمات انجام دے رہے ہیں۔

    یوسین بولٹ نے برطانوی شہزادے ہیری کا دوڑنے کا چیلنج قبول کر لیا

    بیان میں مزید کہا گیا تھا کہ ڈورٹمنڈ اور یوسین بولٹ کی مشترکہ اسپانسر کمپنی ’پوما‘ کی مدد سے اس پبلک ٹریننگ سیشن کا انعقاد عمل میں آیا، مذکورہ خصوصی سیشن کے پہلے مرحلے میں یوسین بولٹ کو دیکھنے کے لیے ان کے شائقین کی ایک بڑی تعداد موجود تھی۔

    خیال رہے کہ گذشتہ روز سماجی رابطے کی ویب سائٹ ٹوئیٹر پر جاری اپنے بیان میں یوسین بولٹ نے سیشن سے متعلق انتہائی خوشی کا اظہار کیا اور اگلے مرحلے کے لیے فٹبال کھلاڑیوں کو تیار رہنے کی بھی تلقین کی۔

    یوسین بولٹ نےریو اولمپکس میں تیسرا طلائی تمغہ جیت لیا

    یاد رہے کہ ایک سو اور دو سو میٹر کی دوڑ میں عالمی ریکارڈز اپنے نام کرنے والے اولمپیئن ایتھلیٹ یوسین بولٹ گزشتہ سال ریس کے عالمی مقابلوں سے ریٹائرمنٹ لے چکے ہیں، واضح رہے کہ وہ کرکٹ کے مداح بھی ہیں جبکہ فٹبال میں وہ برطانوی کلب مانچینسٹر یونائیٹڈ کے پرستار ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • فیفا نے پاکستان فٹبال فیڈریشن پر عائد پابندی ختم کردی

    فیفا نے پاکستان فٹبال فیڈریشن پر عائد پابندی ختم کردی

    اسلام آباد: فٹبال کی عالمی تنظیم فیفا نے پاکستان فٹبال فیڈریشن (پی ایف ایف) پر سیاسی مداخلت کے باعث لگائی گئی پابندی اٹھاتے ہوئے پی ایف ایف کی رکنیت بحال کرنے کا اعلان کردیا۔

    تفصیلات کے مطابق فٹبال کی عالمی تنظیم فیفا نے پاکستان فٹبال فیڈریشن کی رکنیت بحال کر دی ہے۔ عدالت کی جانب سے فیصل صالح حیات گروپ کو پی ایف ایف کا چارج سنبھالنے کے حکم پر فیفا نے معطلی ختم کی، اب قومی ٹیم فٹبال کے انٹرنیشنل ٹورنامنٹ کھیل سکے گی۔

    عدالت کا فیصل صالح حیات گروپ کوپاکستان فٹبال فیڈریشن کا چارج سنبھالنےکا حکم

    پاکستان فٹبال فیڈریشن کئی برسوں سے فیصل صالح اور ظاہر شاہ گروپ میں تقسیم تھی۔فیڈریشن کے باہمی اختلافات کی وجہ سے قومی ٹیم 3 سال سے کوئی انٹرنیشنل میچ نہیں کھیل سکی جبکہ فیفا نے پاکستان کی رکنیت سیاسی مداخلت کے پیش نظر معطل کی تھی۔

    فیفا کی جانب سے جاری کردہ بیان میں کہا گیا ہے کہ پاکستان فٹبال فیڈریشن کی رکنیت فوری طور پر بحالی کی جاتی ہے اور فیفا قوانین کے مطابق ان کی رکنیت کے تمام تر حقوق بھی فوری طور پر بحال کیے جاتے ہیں جبکہ فیفا کے نمائندے اور کلب ٹیمیں عالمی مقابلوں میں دوبارہ حصہ لے سکتی ہیں۔

    فیفا نے پاکستان فٹبال فیڈریشن کی رکنیت معطل کردی

    فیفا کا مزید کہنا تھا کہ پاکستان فٹبال فیڈریشن کے اراکین اور آفیشلز اب فیفا اور ایشین فٹبال کنفیڈریشن کے ترقیاتی پروگراموں، کورسز اور ٹریننگ سے بھی مستفید ہو سکیں گے۔

    یاد رہے کہ پی ایف ایف میں مسلسل سیاسی مداخلت اور کئی برسوں سے جاری فٹ بال کے بحران کے باعث فٹبال کی عالمی تنظیم نے سال 2017 میں پاکستان کی رکنیت معطل کر دی تھی۔

    علاوہ ازیں گذشتہ دنوں لاہور ہائی کورٹ کے دو رکنی بینچ نے فٹبال فیڈریشن کے لیے فیصل صالح حیات کا الیکشن درست قرار دیتے ہوئے فیصل صالح حیات گروپ کو پاکستان فٹبال فیڈریشن کا چارج سنبھالنےکا حکم دیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔