امریکا میں ایک ماں اپنے شیر خوار بچے کو زبردستی کچی سبزیاں اور پھل کھلاتی رہی جس سے بچہ شدید غذائی قلت کا شکار ہو کر دم توڑ گیا، عدالت نے ماں کو مجرم قرار دے دیا۔
بین الاقوامی میڈیا رپورٹ کے مطابق امریکا میں ایک ماں کو عدالت نے سزا سنائی جس نے اپنے نوزائیدہ بیٹے کو سبزی خوروں کا کھانا کھلانے پر اصرار کیا یہاں تک کہ غذائی قلت کی وجہ سے بچے کی موت ہوگئی۔
39 سالہ امریکی خاتون کو اپنے 18 ماہ کے بیٹے کے قتل کا مجرم قرار دیا گیا جو کہ صرف سبزی خور خوراک کھانے کی وجہ سے غذائیت کی قلت کا شکار تھا، ماں اسے صرف کچی سبزیاں اور پھل زبردستی کھلا رہی تھی۔
شیلا اولیری، جسے کیپ کورل، فلوریڈا میں عدالت نے ایک ہفتے تک جاری رہنے والے مقدمے کی سماعت کے بعد سزا سنائی، اب عمر قید کی سزا کا سامنا کر رہی ہے۔
ڈاکٹروں کا کہنا ہے کہ بچہ شدید غذائی قلت کا شکار تھا اور بہت کمزور تھا، 18 ماہ کی عمر میں اس کا وزن صرف 7 کلو گرام تھا جبکہ اس عمر میں بچے کا معمول کا وزن 12 کلو گرام ہوتا ہے۔
واقعے کے دن شیلا اور اس کے شوہر نے، جن پر قتل کا الزام ہے بچے کی سانس بند ہونے کے وجہ سے 911 پر کال کی تاہم جائے وقوعہ پر پہنچنے پر پیرا میڈیکس نے بچے کی موت کی تصدیق کردی۔
جوڑے کے دو اور بچے بھی تھے جن کی عمر 5 سال اور دوسرے کی 3 سال ہے، وہ دونوں بچے بھی غذائی قلت کا شکار تھے، ان کی جلد زرد تھی اور ان میں سے ایک کے دانت بالکل سیاہ تھے۔
پولیس کے مطابق جس دن بچے کی موت ہوئی اس دن اسے سانس لینے میں دشواری ہو رہی تھی، والدین بچے کی مدد کرنے کے بجائے سوگئے، جب تک وہ بیدار ہوئے تب تک بچے کی سانس بالکل بند ہو چکی تھی اور وہ دم توڑ چکا تھا۔
