واشنگٹن: امریکی نائب وزیرخارجہ برائے جنوبی ایشیا ایلس ویلز نے کہا ہے کہ افغان امن کے لیے وزیر اعظم عمران خان کے بیانات حوصلہ افزا ہیں، تعلقات میں بہتری آئی ہے۔
ان خیالات کا اظہار انہوں نے پریس کانفرنس کرتے ہوئے کیا، ایلس ویلز کا کہنا تھا کہ چند ماہ میں پاکستان اور افغانستان کے تعلقات میں بہتری آئی ہے، افغان امن بہت ضروری ہے۔
انہوں نے کہا کہ پاکستان طالبان رہنماؤں کو مذاکرات کی میز پر لانے میں کردار ادا کرے، مذاکرات کے ذریعے حل ممکن ہے، افغانستان میں امن چاہتے ہیں۔
امریکی نائب وزیر خارجہ برائے جنوبی ایشیا کا کہنا تھا کہ افغانستان میں امن کا قیام جنوبی ایشیا میں صدر ٹرمپ کی اولین ترجیح ہے، وہ چاہتے ہیں کہ امن کا سلسلہ شروع ہو۔
امریکی وزیر خارجہ ستمبر میں پاکستان کا دورہ کریں گے
ان کا مزید کہنا تھا کہ عیدالاضحیٰ پر طالبان اور افغان فورسز کے سیزفائر کا خیر مقدم کرتے ہیں۔خیال رہے کہ پریس کانفرنس کے دوران ایلس ویلز نے طالبان رہنماؤں سے براہ راست ملاقات پر تبصرہ کرنے سے گریز کیا۔
خیال رہے کہ امریکی وزیر خارجہ مائیک پومپیو کا رواں سال ستمبر میں دورہ پاکستان کا امکان ہے، اپنے دورے میں وہ نومنتخب وزیر اعظم عمران خان سے ملاقات کریں گے۔
واضح رہے کہ نومنتخب وزیر اعظم عمران خان اور چیف آف آرمی اسٹاف جنرل قمر جاوید باجوہ سے ملاقات کے لیے امریکی وزیر خارجہ مائیک پومپیو پاکستان کا دورہ کریں گے، اس دوران اہم موضوعات پر تبادلہ خیال کیا جائے گا۔
