اسلام آباد: وزیراعظم کے مشیرِخارجہ سرتاج عزیز کا کہنا ہے کہ پاکستان امریکی صدر باراک اوباما کے دورہ بھارت کا جائزہ لے رہا ہے۔
مشیرِخارجہ سرتاج عزیزنے میڈیا سے گفتگو میں کہا کہ پاکستان نے امریکی وزیرخارجہ جان کیری کوبھارت سے متعلق خدشات سے آگاہ کردیا تھا۔
انہوں نے کہا کہ مشترکہ اعلامیہ کے آنے کے بعد ہی کوئی ردعمل دیں گے۔ سرتاج عزیز کا کہناتھاکہ جنوبی ایشیا میں استحکام کے بغیر کوئی ملک اپنے اہداف حاصل نہیں کر سکتا۔
انہوں نے یہ بھی کہاکہ پاکستان اورامریکہ کے تجارتی تعلقات مستحکم ہورہے ہیں۔
اسلام آباد: سپریم کورٹ نے حکومت کو ہدایت کی ہے کہ تمام کالعدم تنظیموں کے ناموں کی فہرست اور متعلقہ قوانین کی تشہیر ویب سائٹ پر کی جائے۔
قانونی کتب سے متعلق مقدمے کی سماعت کےدوران جسٹس جواد ایس خواجہ کو ان کے معاون نے بتایا کہ وزارت قانون اور وزارت داخلہ کی ویب سائٹس پر کالعدم تنظیموں کی حوالے سے کسی قسم کی معلومات دستیاب نہیں۔
عدالت کا کہنا تھا کہ کل کسی صحافی پر مقدمہ ہوجائے تو وہ یہ کہے گا کہ اسے معلوم ہی نہیں تھا کہ فلاں تنظیم کالعدم ہے، اگر تمام تنظیموں کے نام اور ان کے خلاف قوانین تمام بڑی زبانوں میں ترجمہ کرکے ویب سائٹ پر جاری کردی جائیں تو نہ صرف دنیا ان سے باخبر ہوجائے گی بلکہ پاکستان پر سے ان کی سرپرستی کا الزام بھی ختم ہوسکتا ہے۔
واضح رہے کہ دفترخارجہ کی ترجمان نے میڈیا بریفنگ میں بتایا ہے کہ جماعت الدعوۃ سمیت دیگرتنظیمیں اقوام متحدہ کی پابندیاں عائد کرنے والی کمیٹی کی فہرست میں شامل ہیں، رکن کی حیثیت سے پاکستان اقوام متحدہ کی قراردادوں پر عملدرآمد کاپابند ہے۔
ترجمان کا کہنا تھا کہ دہشتگردی کےخلاف کارروائیاں بین الاقوامی قوانین کےمطابق ہونی چاہئیں،پاکستان تمام دہشت گردگروپوں کے خلاف کارروائی کررہاہے۔
اسلام آباد: ترجمان دفترخارجہ تسنیم اسلم نے کہا کہ کالعدم اور دیگرتنظیموں کو ملنے والی امداد کو مانیٹر کیا جا رہا ہے، اس حوالے سے وزیراعظم ہاؤس سے بیان جاری ہوچکا ہے۔
اسلام آباد میں میڈیا بریفنگ سے خطاب میں دفترخارجہ کی ترجمان تسنیم اسلم نے بتایا کہ جماعت الدعوۃ سمیت دیگر تنظیمیں اقوام متحدہ کی پابندیاں عائد کرنے والی کمیٹی کی فہرست میں شامل ہیں۔
انھوں نے کہا کہ رکن کی حیثیت سے پاکستان اقوام متحدہ کی قراردادوں پرعملدرآمد کا پابند ہے، دہشتگردی کے خلاف کارروائیاں بین الاقوامی قوانین کےمطابق ہونی چاہئیں، پاکستان تمام دہشت گرد گروپوں کے خلاف کارروائی کررہا ہے۔
تسنیم اسلم نے کہا کہ کنٹرول لائن پر کشیدگی دہشت گردی کے خلاف جنگ میں پاکستان کی توجہ ہٹانے کی کوشش ہے۔
پاکستان سے متعلق امریکی صدر براک اوباما کے بیان کا خیرمقدم کرتے ہوئے ترجمان نے امید ظاہرکی کہ اوباما دورۂ بھارت میں سرحدی فائرنگ پربات کریں گے، پاکستان گستاخانہ خاکوں اور فرانسیسی جریدے پر حملے کی مذمت کرتا ہیں۔
اسلام آباد: دفترِخارجہ نے بھارتی ہائی کمشنر کو طلب کرکے بھارتی فوج کی جانب سے ظفروال سیکٹر میں بلااشتعال فائرنگ کے واقعے میں رینجرزاہلکاروں کے قتل پرشدید احتجاج کیا ہے۔
دفترِ خارجہ نے فائرنگ اوررینجرز اہلکاروں کی شہادت کے خلاف احتجاجی مظاہرہ بھی ہائی کمشنر کے حوالے کیا جس میں معاملے کی فوری تفتیش کا مطالبہ کیا گیا ہے۔
وزیرِاعظم کے مشیر برائے خارجہ امور سرتاج عزیز کی جانب سے لکھے گئے خط میں کہا گیا کہ فائرنگ کا واقعہ جنگ بندی معاہدے کی کھلی خلاف ورزی ہے۔ خط میں بھارت سے مطالبہ کیا گیا کہ واقعے کی تفتیش کرکے ذمے داروں کو قرار واقعی سزا دی جائے اور لائن آف کنٹرول اور ورکنگ باؤنڈری پرقیام امن کو یقینی بنایا جائے۔
اس سے قبل بدھ کو بھی بھارتی ہائی کمشنر کو دفترِخارجہ طلب کرکے بھارتی افواج کی جانب سے فائرنگ کے واقعے کی شدید مذمت کی گئی تھی۔
اسلام آباد: گزشتہ روز بھارتی فوج نے دھوکے سے رینجرز کے دو اہلکار شہید کر دیئے تھے، جس کے بعد اسلام آباد میں بھارتی ڈپٹی ہائی کمشنر کو دفتر خارجہ میں طلب کرکے سخت احتجاج کیا گیا۔
شکر گڑھ سیکٹر پر شہید دونوں جوانوں کی نماز جنازہ ادا کردی گئی ہے، پاکستان نے ورکنگ باونڈری پر بھارتی فورسز کی فائرنگ پر شدید احتجاج کرتے ہوئے بھارتی ڈپٹی ہائی کمشنر کو دفتر خارجہ طلب کرلیا اور رینجرز کے دو اہلکاروں کی شہادت پر اپنا احتجاج ریکارڈ کرایا۔
ترجمان دفترِ خارجہ کا کہنا تھا کہ بھارتی حکومت تحقیقات کراکے ذمہ داروں کو قانون کے کٹہرے میں لائے اور جنگ بندی معاہدے کو یقینی بنائے، شکر گڑھ ورکنگ باؤنڈری پر بھارتی سیکیورٹی فورسز کے سیکٹر کمانڈر نے فلیگ میٹنگ کی درخواست کی تھی۔
رینجرز اہلکار لانس نائیک ریاض شاکر اور لانس نائیک محمد صفدر ورکنگ باؤنڈری پر موجود تھے کہ بھارتی فورسز نے اچانک بلااشتعال فائرنگ شروع کردی، جو کئی گھنٹے تک جاری رہی فائرنگ سے زخمی ہونے والے رینجرز اہلکار وں کو شکر گڑھ سیکٹر سے اٹھانے تک نہیں دیا گیا اور خون زیادہ بہہ جانے کے باعث دونوں رینجرز اہلکار جام شہادت نوش کرگئے، ان کی نماز جنازہ ادا کردی گئی ہے۔
ترجمان دفتر خارجہ نے کہا ہے کہ مشیر خارجہ سرتاج عزیز کے برطانوی نشریاتی ادارے کو دیے گئے انٹرویو کو تاریخی تناظر میں دیکھا جائے۔ آپریشن ضرب عضب تمام گروہوں کے خلاف بلا امتیاز جاری ہے۔
مشیر خارجہ سرتاج عزیز کےبیان کی وضاحت کرتے ہوئے ترجمان دفتر خارجہ تسنیم اسلم کا کہنا تھا، آپریشن ضرب عضب کسی مخصوص گروہ کے خلاف نہیں بلکہ بلا امتیاز تمام دہشت گرد گروہوں کے خلاف کیا جارہا ہے۔
مشیر خارجہ نے جو کہا وہ تاریخی تناظر میں کہا، سرتاج عزیز نے بی بی سی کو انٹرویو دیے گئے ایک انٹرویو میں کہا تھا کہ پاکستان کے اندر ایسے گروہوں کو نشانہ نہیں بنایا جائے گا جو ملک کونقصان نہیں پہنچا رہے ہیں، افغان طالبان اور حقانی نیٹ ورک افغانستان کا مسئلہ ہیں۔
برلن: نواز شریف نے کہا ہے کہ دھرنے ترقی کا راستہ نہیں دکھاسکتے، جوڈیشل کمیشن میں ایم آئی،آئی ایس آئی کی شملویت کا مطالبہ عجیب ہے۔
جرمنی سے لندن پہنچنے پر وزیراعظم نواز شریف کا کہنا تھا کہ قومی اداروں کو سیاست میں نہیں گھیسٹنا چاہیئے، ان کا کہنا تھاکہ اقتصادی خوشحالی کی رفتار تیز کرنا حکومت کا فرض ہے، ملک کو اپنی منزل کی جانب چلنے دینا چاہئے، نواز شریف نے کہا کہ دھرنوں نے ملک کو نقصان پہنچایا ہے جس کے باعث کئی سربراہان مملکت پاکستان کو دورہ نہ کر سکے۔
دفترخارجہ کی جانب سے جاری کیےگئے بیان کے مطابق وزیراعظم جرمن چانسلر انجیلامرکل کی دعوت پرجرمنی جارہے ہیں۔
اپنےدو روزہ دورے کے دوران وزیراعظم جرمن تاجروں،سرمایہ کاروں سےبھی خطاب کریں گے دفترخارجہ کاکہنا ہے کہ وزیراعظم کےدورےسےپاک جرمنی تعلقات مضبوط ہوں گے۔
وزیراعظم نوازشریف چین کے سہ روزہ دورے کے بعد آج ہی وطن واپس پہنچے ہیں۔
اسلام آباد: ترجمان دفترِخارجہ تسنیم اسلم کا کہنا ہے کہ وزیرِاعظم نوازشریف کل چین کے دورے پر روانہ ہورہے ہیں، دورے میں دونوں ملکوں کے درمیان مفاہمتی یادداشتوں پردستخط ہوں گے۔
اسلام آباد میں ہفتہ وار پریس بریفنگ کے دوران دفتر خارجہ کی ترجمان تسنیم اسلم کا کہنا تھا کہ وزیرِاعظم نوازشریف کے چین کے دورے سے دوطرفہ تعلقات کو مزید فروغ ملے گا، پاکستان اور چین کے درمیان توانائی کے شعبے میں سمجھوتے کئے جائیں گے ۔
ترجمان دفتر خارجہ کا کہنا تھا کہ پاک بھارت مذاکرات خطے اور دونوں ممالک کی ضرورت ہیں۔
امریکی محکمہ دفاع کی رپورٹ کے بارے میں ان کا کہنا تھا کہ ہم نے اپنے تحفظات سے امریکی سفیر کو آگاہ کر دیا ہے، آپریشن ضربِ عضب جاری ر ہے گا، ان کا مزید کہا تھا کہ نومنتخب افغان صدر جلد پاکستان کا دورہ کریں گے۔
لندن: برطانیہ میں پاکستانی ہائی کمشنر سید ابن عباس کہتے ہیں کہ جنگ مسائل کا حل نہیں، بھارت لائن آف کنٹرول کی خلاف ورزی کر رہا ہے، اگر جنگ مسلط کی گئی تو منہ توڑ جواب دیا جائے گا۔
بھات کی لائن آف کنٹرول کی خلاف ورزی اور بلا اشتعال کی گونج اب برطانوی پارلیمنٹ بھی بھی سنائی دینے لگی، برطانوی پارلیمنٹ سے خطاب کر تے ہو ئے پاکستان کے ہائی کمشنر سید ابن عباس نے کہا کہ بھارت سے تمام تنازعات کا حل چاہتے ہیں، جنگ مسائل کا حل نہیں ہو تی، مسائل کے حل کے لئے بھارت کو مذاکرات کی میز پر آنا ہوگا۔
انہوں نے کہا کہ بھارتی فوج مسلسل لائن آف کنٹرول کی خلاف ورزی ، بلا اشتعال فائرنگ اور گولہ باری کر رہی ہے، اگر ہم پر جنگ مسلط کی گئی تو کسی بھی بیرونی جارحیت کا منہ توڑ جواب دیا جائے گا۔