سکھر: سابق چیف جسٹس افتخارچوہدری نے کہا ہے کہ وزیراعظم نوازشریف پاناما فیصلے کے بعد بےنقاب ہوگئے، انہیں مستعفی ہوجانا چاہیئے، عمران خان کےجلسے عدلیہ پردباؤ نہیں۔
ان خیالات کا اظہار انہوں نے سکھر میں پریس کانفرنس سے خطاب کرتے ہوئے کیا، افتخارچوہدری کا کہنا تھا کہ خود کو رہبرکہنے والے راہزن بن چکے ہیں، ایسی کرپشن کی دنیا میں کہیں مثال نہیں ملتی۔
انہوں نے کہا کہ وزیراعظم نواز شریف پاناما کیس کے فیصلے کے بعد بے نقاب ہوگئے، وزیراعظم نوازشریف کواستعفیٰ دے دیناچاہئیے۔
وزیراعظم کوسوچناچاہیے کہ جےآئی ٹی سنگین ملزمان کیلئےبنا کرتی ہیں، حکومت نے میرٹ کی دھجیاں اڑائی ہیں۔ افتخارچوہدری نے کہا کہ عوام اپنے ووٹ کے ذریعےحقیقی رہبرکو سامنے لائیں، عمران خان کےجلسے عدلیہ پردباؤ نہیں۔
اسلام آباد : سابق چیف جسٹس آف پاکستان افتخار محمد چوہدری نے کہا ہے کہ پاناما فیصلے کے بعد وزیراعظم صادق اور امین نہیں رہے، مقدمے میں نواز شریف ہار گئے وہ مستعفی ہوجائیں۔
ان خیالات کا اظہار انہوں نے اسلام آباد میں پریس کانفرنس سے خطاب کرتے ہوئے کیا، سابق چیف جسٹس افتخار محمد چوہدری کا کہنا تھا کہ وزیراعظم بطور ممبر اوروزیراعظم اپنا تشخص برقرار نہیں رکھ سکتے، پانامہ فیصلے میں پانچ میں سے دو ججز نے پٹیشن کی استدعا تسلیم کرلی۔
سپریم کورٹ کے تین ججز نے وزیر اعظم کو کلین چٹ نہیں دی۔ انہوں نے کہا کہ ججز نے قطری خطوں کو کسی صورت تسلیم نہیں کیا، انصاف ہونا چاہیےاور انصاف ہوتا نظر بھی آنا چاہیے، کیا وزیر اعظم کے ہوتے ہوئے جے آئی ٹی آزادانہ فیصلہ کرسکتی ہے؟
افتخار چوہدری نے کہا کہ جو شخص صادق و امین کی تعریف پرپورانہیں اترتا وہ آزادانہ تحقیقات کیسے کرنے دے گا۔ وزیر اعظم جے آئی ٹی کی آزادانہ تحقیقات میں سب سے بڑ ی رکاوٹ ہیں، اصغرخان کیس کا حشر آپ سب کے سامنے ہے۔
وزیر اعظم پاکستان اپنے اثر ورسوخ کی بنیاد پر جے آئی ٹی کی تحقیقات پر اثر انداز ہوسکتے ہیں۔ شفاف تحقیقات کیلئے وزیراعظم نوازشریف اپنے عہدے سے استعفیٰ دیں۔
ایک سوال کے جواب میں انہوں نے کہا کہ حکمران ملک قرضوں پرچلا رہے ہیں اور ان کا اپنا کاروبار دنیا بھر میں پھیلایا ہوا ہے، نام نہاد نعر ے لگائےجارہے ہیں، کہ ملک ترقی کر رہا ہے۔
ملتان : سابق صدراورپیپلزپارٹی کے شریک چیئرمین آصف علی زرداری نے کہا ہے کہ پورے پنجاب میں جلسے ضرور کریں گے، چاہے سیکیورٹی ملے یا نہ ملے، سابق چیف جسٹس افتخار چوہدری کا نام لیے بغیر ان کی سوشل میڈیا پر جاری ویڈیو پر شدید تنقید کرتے ہوئے کہنا تھا کہ شرم کرو۔
تفصیلات کے مطابق جنوبی پنجاب میں پیپلزپارٹی نے دبنگ انٹری دے دی۔ شریک چیئرمین پیپلزپارٹی آصف زرداری نے ملتان آمد کے بعد سابق وفاقی وزیر حامد سعید کاظمی کو ان کی رہائش پر جاکر رہائی کی مبارکباد دی۔
ملتان میں پریس کانفرنس کرتے ہوئے آصف علی زرداری نے تخت لاہور کو چیلنج کردیا۔ انہوں نے پنجاب کو پیپلزپارٹی کی سیاسی سرگرمیوں کا گڑھ بنانے کا اعلان کرتے ہوئے کہا کہ ہم پورا پنجاب لیں گے، سیکیورٹی ملے نہ ملے ہم عوام میں جائینگے اور جلسے ضرور کریں گے۔
انہوں نے کہا کہ ہم الیکشن کیلئے تیار رہتے ہیں چاہے آج ہو یا کل، مجھے ایسا لگتا ہے کہ نواز لیگ نہیں چاہتی کہ الیکشن ہوں۔ ان کا کہنا تھا کہ حامد سعید کاظمی کو اللہ نے عزت کے ساتھ بری کیا۔
سابق چیف جسٹس افتخار چوہدری کا نام لیے بغیر ان کا کہنا تھا کہ میں نے پہلے ہی کہا تھا کہ یہ جج سیاسی ہے اور بعد میں سیاسی جماعت بنا کر جج نے میری بات ثابت کر دی۔ ان کی ایک سوشل میڈیا پر چلنے والی ویڈیو کے حوالے سے انہوں نے کہا کہ شرم کرو، شرم کرو۔
مخالفین پر کڑی تنقید کرتے ہوئے آصف زرداری نے کہا کہ بے نظیر بھٹو ہمیشہ کہتی تھیں کہ عدالتوں سے میاں صاحب کے خلاف اور پیپلزپارٹی کے حق میں کبھی فیصلہ نہیں آیا۔
سابق صدر آصف زرداری نے الزام لگایا کہ حکومت سڑکیں اور پل بنا کرکمیشن کھارہی ہے، ان کا یہی دھندہ ہے، انہیں قبرمیں یہ لے کر جانا ہے ہمیں قبرمیں کچھ اورلے جانا ہے، انہوں نے کہا کہ ہم نے پاکستان اورجمہوریت کی خاطر دھاندلی والا الیکشن قبول کیا۔
اسلام آباد : سابق چیف جسٹس افتخارچوہدری نے وزیراعظم نواز شریف کونااہل قرار دینے کے لیے ریفرنس اسپیکر قومی اسمبلی کو ارسال کرنے کا اعلان کیا ہے ، ان کا کہنا ہے کہ نواز شریف صادق اور امین نہیں رہے وہ بطور وزیر اعظم اپنا اخلاقی جواز کھو چکے ہیں انہیں نااہل قرار دیا جائے۔
وزیراعظم پاکستان میاں محمد نواز شریف کے خلاف ریفرنس دائر کرنے کا اعلان کرتے ہوئے سابق چیف جسٹس نے کہا کہ ’’میاں محمد نواز شریف نے یہ نہیں بتایا کہ بیرون ملک رقم منتقل کیسے کی گئی یا پھر بیرون ملک میں سرمایہ کاری کیسے کی گئی جبکہ شریف برادران نے دبئی میں موجود فیکٹری 2005 میں فروخت کردی تھی‘‘۔
انہوں نے کہا کہ ’’وزیر اعظم نوازشریف کا پاناما لیکس اور بیرونِ ملک اثاثوں کے متعلق بیان اعتراف جرم کی مترادف ہے اور عدالت اسے اعترافِ جرم اور قانونِ شہادت کے طور پر تسلیم کرسکتی ہے‘‘۔
افتخار محمد چوہدری کا مزید کہنا تھا کہ ’’اگر حکمران جماعت نے بیرونِ ملک سرمایہ کاری قانونی طریقے سے کی ہے تو اسے چھپانے کی کیا ضرورت ہے۔ انہوں نے اعلان کیا کہ وزیراعظم کی نااہلی سے متعلق ریفرنس اسپیکر ایاز صادق کو بھجوایا جارہا ہے۔
واضح رہے کہ پاناما لیکس میں حکمران خاندان کا نام سامنے آنے کے بعد حکومت اور اپوزیشن کے درمیان ٹی او آرز کی تشکیل کے لیے ایک کمیٹی قائم کی گئی تھی جو تاحال ڈیڈ لاک کا شکار ہے۔ اسپیکر قومی اسمبلی نے اس ڈیڈ لاک کو ختم کروانے کے لیے دونوں فریقین کے درمیان ایک اور نشست بٹھانے کا اعلان کیا ہے۔
اپوزیشن کی دو بڑی جماعتوں پیپلزپارٹی اور تحریک انصاف کی جانب سے وزیر اعظم پاکستان کی نااہلی سے متعلق پہلے ہی الیکشن کمیشن میں درخواستیں دائر کروادی گئی ہیں جو تاحال التوا کا شکار ہیں جبکہ حکومتی اراکین نے بھی تحریک انصاف کے لیے چیئرمین عمران خان کے خلاف اسپیکر قومی اسمبلی کے پاس نااہلی سے متعلق ریفرنس دائر کردیا ہے۔
اسلام آباد: سابق چیف جسٹس آف پاکستان افتخار چوہدری نے کہا ہے کہ فوجی عدالتوں کی آئین میں کوئی گنجائش نہیں۔
اٹک میں میڈیا سے گفتگو کرتےہوئےسابق چیف جسٹس افتخار چوہدری کا کہنا تھا کہ آزاد عدلیہ کی موجودگی میں فوجی عدالتوں کاقیام غیر آئینی ہے۔ عدلیہ کو کمزو کرنے والے کامیاب نہیں ہو سکتے۔ سابق چیف جسٹس افتخار چوہدری کا کہنا تھا کہ فوج کا اپناکام ہے، عدلیہ کا اپنا کام ہے، سب آئین کے اندر رہ کر کام کرے۔ یہ کوئی طریقہ نہیں کہ پارلیمنٹ کمیٹی اور جرنیلوں کو ساتھ بٹھا کر فیصلہ کریں۔
اسلام آباد: سابق چیف جسٹس افتخار محمد چوہدری نے عمران خان کے الزامات کو مسترد کردیا ہے۔
اسلام آباد ایئر پورٹ پر میڈیا سے گفتگو میں افتخارمحمد چوہدری کا کہنا تھا کہ عمران خان بلاجواز الزام تراشی کر رہے ہیں، میرے بھیجے گئے نوٹس کا اب تک جواب نہیں دیا۔
سابق چیف جسٹس افتخارچوہدری نے کہا کہ عمران خان کے الزامات کھسیانی بلی کھمبا نوچے کے مترادف ہے، سابق چیف جسٹس کا کہنا تھا کہ عمران خان کی طرف سے جواب نہ آنے پر جلدعدالت سے رجوع کریں گے۔
