اسلام آباد : وفاقی وزیر اطلاعات فواد چوہدری کا کہنا ہے کہ سابق جج نے جو حلف نامہ دیا اس کی فیس بھی شریف فیملی دےرہی ہے اور حسین نواز اس معاملے کو ڈیل کررہے ہیں۔
تفصیلات کے مطابق وفاقی وزیر اطلاعات فواد چوہدری نے الیکشن کمیشن کے باہر میڈیا سے گفتگو کرتے ہوئے کہا ذاتی طور پر ادارے کا احترام کرتاہوں، امید ہے الیکشن کمیشن میرے جواب کو مثبت لے گا۔
رانا شمیم کے الزامات کے حوالے سے فواد چوہدری کا کہنا تھا کہ توہین عدالت معاملے پرہائیکورٹ نے فریقین کو طلب کیاہے، مریم نواز اور نوازشریف کی پیشی سے پہلے ہی ایسی سازش ہوتی ہے۔
وفاقی وزیر نے کہا کہ ایک مکمل پلان کے تحت یہ معاملہ آگے بڑھ رہاہے ، ن لیگ نے پہلے فوج کیخلاف ایک مہم شروع کی تھی ، اب ن لیگ عدالتوں کیخلاف مہم چلارہی ہے، عدالتوں پر حملہ کیاگیا یہ ن لیگ کی روایت رہی ہے۔
ان کا کہنا تھا کہ سابق جج نے جو حلف نامہ دیا اس کی فیس بھی شریف فیملی دےرہی ہے، حسین نواز اس معاملے کو ڈیل کررہےہیں، منفرد شخص کو اداروں کیخلاف استعمال کرنے سے بحران کاخدشہ ہوتاہے۔
فواد چوہدری نے کہا کہ چیف جسٹس نےازخود نوٹس لیا جوخوش آئند ہے دیکھتے ہیں کیاہوتاہے ، جوڈیشری ،میڈیا ،سیاسی نظام میں بھی اصلاحات کی ضرورت ہے، ہم نے کھلےدل سے اپوزیشن کو اصلاحات پر بات چیت کی دعوت دی۔
وزیر اطلاعات کا کہنا تھا کہ مشترکہ پارلیمان کااجلاس کل طلب کرلیاگیاہے، ای وی ایم عمران خان کاذاتی ایجنڈانہیں بلکہ یہ قومی ایجنڈاہے، جب ہم اصلاحات کی طرف جارہےہیں تواپوزیشن شورمچارہی ہے۔
انھوں نے مزید کہا کہ اپوزیشن کوچاہیے ان تمام ترامیم پرکھلےدل سےغورکریں، ہم کل یہ بل پاس کرارہے ہیں اتحادیوں نے اعتماد کا اظہار کیا ہے۔
