پشاور: وزیر اعلیٰ خیبر پختونخوا علی امین گنڈاپور نے پشاور کے پبلک پارکوں میں مفت وائی فائی سہولت فراہم کرنے کا فیصلہ کیا ہے۔
وزیر اعلیٰ علی امین گنڈاپور کی زیر صدارت پشاور کی بیوٹی فکیشن سے متعلق اجلاس منعقد ہوا، جس میں عوام کی سہولت کے لیے شہر کے پبلک پارکوں میں مفت وائی فائی فراہم کرنے کا فیصلہ کیا گیا، وزیر اعلیٰ نے متعلقہ حکام کو معاملات کو حتمی شکل دے کرمنظوری کے لیے پیش کرنے کی ہدایت کی، انھوں نے کہا اگلے مرحلے میں یہ سہولت دیگر شہروں میں بھی فراہم کی جائے گی۔
اجلاس میں شہریوں کی سہولت کے لیے ناصر باغ روڈ پر جلد بی آر ٹی سروس شروع کرنے کا بھی فیصلہ کیا گیا، وزیر اعلیٰ نے شہر کی تزئین و آرائش کے لیے پی ڈی اے کو مفصل پلان تیار کرنے کی ہدایت کی۔
انھوں نے ہدایت کی کہ تزئین کے لیے پائیدار اقدامات کیے جائیں، سڑکوں کے اطراف کھمبوں پر خوب صورت گملوں میں مصنوعی پودے لگائے جائیں، ہیڈ پلوں اور عمارتوں پر خطاطی اور نقش و نگار بنائے جائیں، جس سے صوبے کی ثقافت اجاگر ہو، اور اس مقصد کے لیے نجی کمپنیوں کی خدمات حاصل کی جائیں۔
وزیر اعلیٰ نے ہدایت کی کہ پشاور میں اسٹریٹ لائٹس کو شمسی توانائی پر منتقل کرنے پر بھی کام کیا جائے، جہاں ضرورت ہو ہیڈ پلوں کی بجائے انڈر پاسز تعمیر کیے جائیں، ورسک روڈ تا ناصر باغ رنگ روڈ کے باقی ماندہ حصے کی تعمیر جلد شروع کی جائے، اور یونیورسٹی روڈ پر بی آر ٹی کوریڈور کے اطراف سڑک بحالی پر بھی کام کا آغاز کیا جائے۔
