یوں تو مزیدار اور تازے فرنچ فرائز اگر سامنے آجائیں تو نہ چاہتے ہوئے بھی دل کھانے کی طرف مائل ہو ہی جاتا ہے، لیکن یاد رکھیں تندرستی ہزار نعمت ہے۔
اس حوالے سے ماہرین کا کہنا ہے کہ یہ فرنچ فرائز آپ کو سخت نقصان پہنچانے کا سبب بھی بن سکتا ہے۔ یہاں تک کہ فرنچ فرائز کا زیادہ استعمال ٹائپ 2 ذیابیطس کے خطرے کو بڑھا سکتا ہے۔
ماہرین کے مطابق آلو اور اس سے بنی ہوئی اشیا بلند فشار خون یعنی ہائی بلڈ پریشر کے خطرے میں اضافہ کرسکتی ہیں۔ جب کہ اُبلے یا بیک آلو صحت کے لیے کم نقصان دہ ثابت ہوتے ہیں۔
ایک تحقیق میں بتایا گیا ہے کہ ہفتے میں دو بار اس طرح کے چپس کھانے کی عادت مختلف امراض میں مبتلا کرتے ہوئے موت کا خطرہ بھی نمایاں حد تک بڑھا دیتی ہے۔
طبی ویب سائٹ پر شائع ہونے والی تحقیق میں بتایا گیا ہے کہ آلو کھانے سے ٹائپ 2 ذیابیطس کا خطرہ اُس وقت بڑھ جاتا ہے، جب انہیں فرنچ فرائز کی صورت میں کھایا جائے، لیکن اگر آلو کو اُبال کر، بیک کر کے یا میش کر کے کھایا جائے تو ایسا کوئی خاص نقصان نہیں ہوتا۔
تحقیق میں 30 سال سے زائد عرصے تک 2 لاکھ سے زیادہ افراد کی خوراک اور صحت کا جائزہ لیا گیا، نتائج سے معلوم ہوا کہ ہفتے میں 3 مرتبہ فرنچ فرائز کھانے سے ذیابیطس کا خطرہ 20 فیصد بڑھ سکتا ہے، جب کہ اُبلا ہوا، بیک یا میش آلو کھانے سے شوگر کا خطرہ نہیں بڑھتا۔
