Tag: Frizzy Hair

موسم سرما میں سر کے بال خشکی اور بے رونقی کا شکار ہوجاتے ہیں اور انہیں اضافی حفاظت کی ضرورت پڑتی ہے، سردیوں کے موسم میں بالوں کے تمام مسائل کا حل صرف ایک آمیزے سے نکل سکتا ہے۔

اے آر وائی ڈیجیٹل کے مارننگ شو گڈ مارننگ پاکستان میں ڈاکٹر ام راحیل نے سردیوں میں بالوں کے لیے شاندار نسخہ بتایا۔

ڈاکٹر ام راحیل نے کہا کہ سردیوں میں بال فریزی ہوجاتے ہیں اور جھڑنے لگتے ہیں، علاوہ ازیں وہ بے رونقی اور خشکی کا بھی شکار ہوجاتے ہیں۔

اس کے لیے ایلوا ویرا کا پورا پتہ لیں اور اسے چھلکے سمیت بلینڈ کرلیں، ہری میتھی لے کر اسے بھی بلینڈ کرلیں اور دونوں کو مکس کردیں۔

اب اس میں 2 چائے کا چمچ گلیسرین، 2 چائے کا چمچ دہی اور شہد ملائیں اور اچھی طرح یکجان کرلیں۔

پیسٹ بنانے کے بعد اسے بالوں میں اچھی طرح جڑوں سے سروں تک لگائیں، تھوڑی دیر تک مساج کریں اس کے بعد بال لپیٹ کر شاور کیپ سے ڈھانپ لیں۔

نصف گھنٹے بعد روزمرہ استعمال کے شیمپو سے بال دھو لیں۔

ڈاکٹر ام راحیل کے مطابق یہ آمیزہ بالوں میں نئی جان پیدا کردے گا، اس سے خشکی ختم ہوتی جائے گی جبکہ ایلو ویرا اور میتھی سے بال جھڑنے کم ہوجائیں گے۔

انہوں نے کہا کہ سردیوں میں دہی لگانا ٹھنڈ لگنے کا سبب بن سکتا ہے تاہم اس آمیزے کی خاص بات یہ ہے کہ اس میں شامل شہد اور میتھی سے دہی کی تاثیر ختم ہوجائے گی۔

ہفتے میں 2 بار اس نسخے کو استعمال کرنا بالوں کے تمام مسائل سے چھٹکارہ دلا دے گا۔