کیریئر پلاننگ زندگی میں کامیاب ہونے کا سب سے اہم مرحلہ ہے یہ ایک ایسا نقشہ ہے جو ان افراد کو آسانی فراہم کرتا ہے جنہوں نے اپنی تعلیم مکمل کرلی ہو اور مستقبل کے حوالے سے اپنے اہداف تک پہنچنے کے لئے بے چین ہوں۔
اپنی زندگی کامیابی کے ساتھ گزارنے کے لیے کسی پیشے کا انتخاب کرنا کیریئر کہلاتا ہے، اپنے لیے اچھا کیریئر منتخب کرنے کا مطلب یہ ہے کہ انسان ایسا ذریعہ معاش اختیار کرے جو اس کی صحت، صلاحیتوں اور رجحان کے مطابق ہو تاکہ وہ اس خاص پیشے میں زیادہ ترقی کرسکے اور کام کرنے سے اسے اکتاہٹ یا تھکن محسوس نہ ہو بلکہ تسکین، اطمینان اور مسرت حاصل ہو۔
اس حوالے سے اے آر وائی نیوز کے پروگرام باخبر سویرا میں کیریئر کونسلر یوسف الماس نے ناظرین خصوصاً نوجوانوں کو ان کے بہترین مستقبل کیلئے اپنے قیمتی مشوروں سے نوازا۔
انہوں نے بتایا کہ کسی بھی نوجوان کی زندگی تین مواقع ایسے آتے ہیں جہاں اسے مشوروں اور رہنمائی کی شدید ضرورت ہوتی ہے، جس پر عمل کرکے وہ آنے والی زندگی کیلئے اپنے اہداف مقرر کرسکتا ہے۔
یوسف الماس نے بتایا کہ جب بچہ آٹھویں کلاس پاس کرکے نویں میں جاتا ہے تو یہ پہلا مرحلہ ہے کہ جب اس کی بہترین انداز میں کاؤنسلنگ کی جائے اور اسے غیر نصابی سرگرمیوں کی جانب بھی راغب کیا جائے۔
اس کے بعد میٹرک پاس کرنے کے بعد کالج میں داخلے کے وقت دوسرا مرحلہ آتا ہے کہ جس میں اسے پھر آپ کی رہنمائی درکار ہے کہ اسے کاؤنسلنگ کی جائے۔
تیسرا مرحلہ جب آتا ہے جب وہ کالج سے نکل کر یونیورسٹی کیلئے قدم بڑھاتا ہے، وہاں بھی اسے ایک اچھے اور تجربہ کار شفیق اور مہربان اساتذہ اور سینئرز کی ضرورت ہوتی ہے۔
ہر شخص کو کوئی ایک یا چند کام آسان لگتے ہیں وہ انہیں دوسروں کے مقابلے میں جلد سیکھ جاتا ہے، ان کے تکنیکی پہلوﺅں کو فوری طور پر سمجھ لیتا ہے۔ دوسرے افراد کے مقابلے میں اسے یہ برتری اس لیے حاصل ہوتی ہے کہ اس کا رجحان اس خاص کام یاشعبے کی طرف ہوتا ہے۔
بعض نوجوانوں کو الیکٹرونکس کے آلات سے اس قدر دلچسپی ہوتی ہے کہ اس کے اسرار و رموز سے خود بہ خود واقف ہوجاتے ہیں۔ پیشے کے انتخاب میں اپنے رجحان کو لازماً مدِنظر رکھنا چاہیے اور اس کے مطابق اپنی ترجیحات میں سے کیریئر کا انتخاب کرنا چاہیے۔
