جدہ : سعودی ایوی ایشن اتھارٹی (گاکا) نے مسافروں پر مقرر کردہ حد سے زیادہ سامان لانے اور لے جانے پر سخت پابندی عائد کردی ہے، خلاف ورزی پر کارروائی کی جائے گی۔
سعودی عرب جانے والی تمام ایرلائنز کو نئی ہدایات جاری کرتے ہوئے کہا گیا ہے کہ سعودی عرب کیلئے آپریٹ کرنے والی تمام ائیرلائنز مسافروں کا مقرر کردہ حد سے زیادہ سامان لوڈ کرنے سے اجتناب کریں۔
سعودی ایوی ایشن کا کہنا ہے کہ چیک ان کرتے وقت صرف مقررہ حد کے وزن کے سامان والے بیگیج کو جہاز میں بھیجا جائے، ہمارے مشاہدے میں آیا ہے کہ کچھ ایرلائنز مسافروں کا مقررہ حد سے زیادہ سامان وصول کرتی ہیں۔
گاکا کے حکم نامے کے مطابق ٹکٹ جاری کرتے وقت سامان کے وزن کی مقررہ حد کی پالیسی واضح لکھی ہوتی ہے، زیادہ سامان والے بیگیج سے جہاز کو تیکنیکی طور پر مشکلات درپیش ہوتی ہیں۔
سعودی ایوی ایشن نے متنبہ کیا ہے کہ تمام ایرلاینز مذکورہ ہدایات پر سختی سے عمل کی پابندی کریں، ہدایات نامے کی خلاف ورزی کی صورت میں ایرلائنز کے خلاف سخت کارروائی کی جائے گی۔
