گاجر کا حلوہ موسم سرما کی خاص سوغات ہے، یہ لذیذ ہونے کے ساتھ نہایت صحت بخش بھی ہوتا ہے جو سرد موسم میں بے حد فائدہ مند ہے۔
گاجر خود اور حلوے میں شامل کیے جانے والے تمام اجزا سردیوں کے موسم میں نہایت فائدہ پہنچاتے ہیں۔
یہ جسم کو درکار صحت مند چکنائی، وٹامن اے، وٹامن سی اور پروٹین وغیرہ سے بھرپور ہوتا ہے جو سردیوں کے ساتھ آنے والی جسمانی تکالیف اور درد وغیرہ سے نجات دلاتا ہے۔
اجزا
کچی اور چھوٹی گاجریں: 2 کلو
چینی: 400 گرام
ثابت الائچی: 3 سے 4 دانے
دودھ: 2 کلو
دیسی گھی: 200 گرام
زعفران: 1 چٹکی
عرق گلاب: 1 چائے کا چمچ
ترکیب
سب سے پہلے گاجروں کو کدوکش کرلیں، کدوکش کرنے سے پہلے اور بعد میں انہیں اچھی طرح دھو لیں۔
گاجروں کو چولہے پر چڑھائیں اور چینی ڈال دیں، جب چینی پانی چھوڑنا شروع کرے تو اسے ڈھک کر ہلکی آنچ پر چھوڑ دیں۔
50 منٹ تک ہلکی آنچ پر رہنے دیں اور اس دوران تھوڑی تھوڑی دیر بعد ایک بار چمچہ چلا لیں۔
ثابت الائچی بھی اسی دوران شامل کردیں۔
چینی کا پانی خشک ہوجائے تو اس میں دیسی گھی شامل کریں اور اس کو 5 منٹ تک بھونیں۔
اس دوران دودھ سے کھویا بنا لیں، 2 کلو دودھ سے 400 گرام کھویا بنے گا، کھویا بناتے ہوئے اس میں چند قطرے دیسی گھی کے ڈال دیں اس سے کھویا برتن میں نہیں لگے گا۔
گاجر کو بھوننے کے بعد اس میں کھویا شامل کردیں، بعد ازاں عرق گلاب میں زعفران ملائیں اور اسے حلوے میں شامل کردیں۔
پستہ، بادام چھڑک کر مزیدار گرما گرم حلوہ سرو کریں۔
