Tag: Gallup Pakistan Survey

پاکستان کی نصف سے زیادہ آبادی کورونا ویکیسن لگوانا چاہتی ہے، یہ بات ایک سروے میں سامنے آئی ہے، اس سروے کا اہتمام گیلپ پاکستان کے تحت کیا گیا تھا۔

ایک تازہ سروے کے مطابق دنیا کے اس پانچویں سب سے بڑے ملک پاکستان کی نصف آبادی کورونا وائرس کا مقابلہ کرنے کیلئے تیار ہے جس کیلئے وہ ویکسین لگوانا چاہتی ہے۔

اے آر وائی نیوز کے پروگرام باخبر سویرا میں گیلپ پاکستان ایگزیکٹو ڈائریکٹر بلال گیلانی نے اس حوالے سے خصوصی گفتگو کی اور بتایا کہ ملک میں کتنے فیصد لوگ کورونا وائرس کی عالمی وبا سے مقابلے کیلئے تیار ہیں۔

انہوں نے بتایا کہ تازہ سروے کے مطابق 66فیصد لوگ چاہتے ہیں کہ وہ اینٹی کورونا ویکسین لگوائیں جبکہ اس سےچھ ماہ قبل ہونے والے سروے میں صرف 38فیصد شہری ویکیسن لگوانے کیلئے رضامند تھے۔

بلال گیلانی نے کہا کہ جب ہم نے لوگوں سے پوچھا کہ آپ کو ویکسین لگوانے کا طریقہ کار معلوم ہے جس میں 59فیصد لوگوں کا کہنا تھا کہ انہیں اس کا علم نہیں۔

انہوں نے بتایا کہ ملک میں دس فیصد لوگوں کے پاس موبائل فون نہیں ہے اور جن کے پاس موبائل فون ہے ان میں سے دس فیصد ایسے ہیں جن کو میسج کرنا یا میسج پڑھنا ہی نہیں آتا، یہ بھی ایک مسئلہ ہے حکومت اس پر بھیئ توجہ دے۔

ایک سوال کے جواب میں ایگزیکٹو ڈائریکٹر پاکستان بلال گیلانی نے بتایا کہ کورونا ویکسی نیشن کے حوالے سے تقریباً 76 فیصد پاکستانی اپنی حکومت کی کارکردگی سے مطمئن ہیں۔