قاہرہ : مصر میں ایک گارمنٹ فیکٹری میں آگ لگنے کا ہولناک واقعہ پیش آیا ہے جس میں 20افراد شعلوں کی لپیٹ میں آکر جان کی بازی ہار گئے۔
مذکورہ واقعہ مصر کے دارالحکومت قاہرہ کے شمال میں ایک گارمنٹ فیکٹری میں پیش آیا، آگ لگنے سے ہلاک ہونے والوں کی تعداد بیس ہوگئی ہے، حکام کا کہنا ہے کہ آتشزدگی کے اس واقعے میں دو درجن سے زیادہ افراد زخمی بھی ہوئے ہیں۔
غیر ملکی خبر رساں ادارے کے مطابق قاہرہ میں سرکاری حکام کی جانب سے جاری کردہ ایک بیان میں کہا گیا ہے کہ چار منزلہ عمارت میں واقع اس فیکٹری میں آگ لگنے کی وجہ ابھی تک معلوم نہیں ہوسکی ہے۔
آتشزدگی کا یہ واقعہ قاہرہ سے 35 کلومیٹر شمال میں واقع عبور صنعتی زون میں واقع ایک فیکٹری میں پیش آیا۔ مقامی حکام کا کہنا ہے کہ آگ اس قدر شدید تھی کہ اس پر قابو پانے کے لیے پندرہ فائر بریگیڈ کی گاڑیوں کی مدد لی گئی، امدادی کارکنان کی کافی مشقت کے بعد آگ کو دیگر فیکٹریوں تک پھیلنے سے روکنے میں کامیابی ملی۔
واضح رہے کہ جمعرات کے روز پیش آنے والا آتشزدگی کا یہ واقعہ مصر میں آگ لگنے کے سلسلے کی تازہ ترین کڑی ہے، ملک میں حفاظتی اقدامات کے معیار اور آگ پر قابو پانے سے سے متعلق ضابطوں کے نفاذ پر خاطر خواہ توجہ نہیں دی جاتی ہے۔
گزشتہ ماہ ہی قاہرہ کے مصروف ترین شاہراہ کے کنارے ایک تیل پائپ لائن سے تیل رسنے کی وجہ سے ادھر سے گزرنے والی کاروں میں آگ لگ گئی تھی جس کے سبب کم از کم سترہ افراد زخمی ہو گئے تھے۔
