راولپنڈی کے علاقے بھابڑا بازار میں گیس لیکج کے باعث ہونے والے دھماکے میں دو بچے جان کی بازی ہار گئے، جبکہ دو افراد جھلس کر شدید زخمی ہوگئے۔
تفصیلات کے مطابق راولپنڈی میں گیس لیکج دھماکوں اور آتشزدگی کے پے در پے تین مختلف واقعات میں دو بچے جاں بحق جبکہ 8 افراد زخمی ہوگئے۔
اس حوالے سے ریسکیو ذرائع کا کہنا ہے کہ پہلے واقعے میں بھابڑا بازار میں گیس لیکج کے باعث دھماکا ہوا جس میں دو بچے موقع پر ہی جاں بحق ہوگئے، حادثے میں 2افراد بھی جھلس کر زخمی ہوئے۔
ریسکیو حکام نے میڈیا کو بتایا کہ آتشزدگی کے باعث گیس کی پائپ لائن میں آگ لگ گئی، کمرے میں گیس جمع ہونے کےبعد بجلی کا سوئچ آن کرتے ہی دھماکا ہوا، جاں بحق ہونے والے بچوں کی شناخت8سالہ ارہم ،7 سالہ آیت کے نام سے ہوئی ہے، جبکہ بدقسمت بچوں کی ماں بھی پچاس فیصد تک جھلس گئی۔
دوسرا واقعہ وارث خان کے علاقے آریہ محلہ میں پیش آیا جہاں گیس لیکج دھماکہ سے جھلس کر 5 افراد زخمی ہوگئے، زخمی ہونے والے دو مرد اور تین لڑکیوں کی حالت خطرے سے باہر ہے۔
تیسرا واقعہ ٹینچ آبادی نمبر 2 میں واقع ایک گھر میں پیش آیا،گیس لیکج دھماکہ سے عبداللہ اور حسن نامی دو افراد زخمی ہوگئے جنہیں بی بی ایچ اسپتال منتقل کردیا گیا ہے۔
