کراچی میں سحری و افطار کے دوران گیس کی بندش سے لوگ شدید ذہنی اذیت میں مبتلا ہیں، لوڈ شیڈنگ کے باوجود ہزاروں روپے کے بلز ملنے پر شہریوں نے گورنرسندھ سے رجوع کرلیا۔
گورنر سندھ کامران ٹیسوری نے معاملے کا نوٹس لیتے ہوئے ایم ڈی سوئی سدرن سے2دن میں پلان طلب کرلیا،
اے آر وائی نیوز سے خصوصی گفتگو کرتے ہوئے گورنر سندھ کا کہنا تھا کہ اب تک گورنر ہاؤس میں12ہزار گیس کے بلز شہریوں نے جمع کرائے ہیں، لوگ روزانہ کی بنیاد پر سحری و افطاری میں گیس کے بلز بھجوا رہے ہیں۔
اپنی شکایات میں شہریوں کا کہنا ہے کہ بل باقاعدگی سے آرہا ہے لیکن کھانا بنانے کیلئے گیس نہیں مل رہی، گورنرسندھ نے کہا کہ میری ایم ڈی سوئی سدرن گیس سے اس مسئلے پر بات ہوئی ہے۔
انہوں نے کہا کہ ایم ڈی سوئی سدرن کو واضح طور پر کہا ہے کہ پلان بتائیں وہ چاہتے کیا ہیں، ان کو پابند کیا ہے کہ ایک سے دو روز میں آکر بتائیں، سحری اور افطاری میں گیس کی فراہمی کو یقینی کیسے بنائیں گے؟
گورنرسندھ نے کہا کہ اگر کراچی کے شہریوں کو گیس کی فراہمی نہیں ہوتی تو میں اپنے اعلان پر قائم ہوں، ایم ڈی سوئی سدرن کو کہا ہے کہ جب گیس نہیں تو سب کے بلز زیرو کیے جائیں۔
انہوں نے مزید کہا کہ جب سوئی گیس ہی نہیں تو بل کس بات کے؟۔ اگر2دن میں ایم ڈی سوئی گیس کا پلان سامنے نہیں آیا تو آئندہ کا لائحہ عمل بناؤں گا۔
