Tag: gas pipe line

اسلام آباد : اسلام آباد چیمبر آف کامرس اینڈ انڈسٹری کے قائم مقام صدر محمد شکیل منیر نے کہا ہے کہ حکومت تاجر رہنماؤں سمیت تمام اسٹیک ہولڈرز کو اعتماد میں لے کر گیس بحران سے نمٹنے کیلئے توانائی کا ایک جامع منصوبہ تشکیل دے۔

ایک تقریب سے خطاب کرتے ہوئے انہوں نے کہا کہ حکومت فوری طور پر قطر سے ایل این جی درآمد کرنے کی کوشش کرے، اس کے علاوہ ایران، پاکستان گیس پائپ لائن اور ترکمانستان ، افغانستان، پاکستان ، انڈیا گیس پائپ لائن منصوبوں کو جلد عملی جامہ پہنانے کیلئے ضروری اقدامات اٹھائے کیونکہ یہ منصوبے کافی عرصے سے زیر غور ہیں لیکن ان پر عمل درآمد کیلئے ابھی تک کوئی ٹھوس اقدامات نہیں اٹھائے گئے۔

آئی سی سی آئی فاؤنڈر گروپ کے چیئرمین عبدالرؤف نے اپنے خطاب میں کہا کہ گیس کا بحران معیشت پر منفی اثرات مرتب کر رہا ہے کیونکہ اس سے کاروباری اور صنعتی سرگرمیاں بہت متاثر ہو رہی ہیں ،حکومت گیس بحران پر قابو پانے کیلئے تمام وسائل بروئے کار لائے۔