کراچی : سی این جی فورم نے گیس کی قیمتوں میں اضافے کو مسترد کردیا، ٹرانسپورٹ اتحاد نے احتجاجاً ہڑتال کا اعلان کردیا۔
تفصیلات کے مطابق سی این جی فورم نے حکومت کی جانب سے گیس کی حالیہ قیمتوں میں اضافے کو مسترد کردیا ہے جبکہ کراچی ٹرانسپورٹ اتحاد نے گیس مہنگی ہونے پر ہڑتال کا اعلان کر دیا۔
کراچی میں مشترکہ پریس کانفرنس سے خطاب کرتے ہوئے ارشاد بخاری کا کہنا تھا کہ ہم ٹرانسپورٹ بند کردیں گے تو سی این جی اسٹیشنز بھی بند ہوجائیں گے۔
سی این جی فورم کے رکن عبدالسمیع خان نے کہا کہ حکومت نے سی این جی سیکٹر کی گیس کی قیمت میں 40 فیصد کا اضافے کے تجویز دی ہے گیس مہنگی ہوئی تو سی این جی 22 روپے تک مہنگی ہوجائے گی۔
ان کا کہنا تھا کہ70 فیصد ٹرانسپورٹ سی این جی چلتی ہے، گیس مہنگی ہونے کے بعد سندھ اور بلوچستان میں فی کلو سی این جی82سے بڑھ کر105روپے فی کلو تک ہوجائے گی جس سے ٹرانسپورٹ کے کرایوں میں بھی اضافہ ہو جائے گا۔
کراچی چیمبر کے صدر جنید ماکڈا نے کہا کہ وزیر اعظم پاکستان سے اپیل کرتے ہیں کہ جب تک قیمت کا تعین نہیں ہوتا گیس کی قیمت میں اضافہ نہ کیا جائے۔
اس موقع پر آل پاکستان سی این جی ایسوسی ایشن سندھ کے صدرشبیر سلیمان جی نے کہا کہ15سال میں پہلی بار گیس 15روپے کلو مہنگی ہونے جارہی ہے، انہوں نے کہا کہ ہمارا گیس کی قیمت کا تعین اوگرا کرتی ہے لیکن حکومت نے گیس کی قیمتوں میں 40فیصد اضافہ کیا ہے۔
