ARYNews.tv | Urdu – Har Lamha Bakhabar

Tag: Gas

  • وزیراعظم کی ہدایت پر گیس چوروں کے خلاف ایف آئی اے نے کارروائی شروع کردی

    وزیراعظم کی ہدایت پر گیس چوروں کے خلاف ایف آئی اے نے کارروائی شروع کردی

    شیخوپورہ: وزیراعظم عمران خان کی ہدایت پر وفاقی تحقیقاتی ادارے(ایف آئی اے) نے گیس چوروں کے خلاف کارروائی شروع کردی۔

    تفصیلات کے مطابق پنجاب کے شہر شیخوپورہ کے علاقے لاہورروڈ پر واقع اسٹیل مل پر ایف آئی اے نے چھاپہ مار کارروائی کرتے ہوئے کروڑوں روپے کی گیس چوری پکڑ لی۔

    ایف آئی اے حکام کا کہنا ہے کہ 2 سال سے زیرزمین پائپ لائن بچھا کر گیس چوری کی جارہی تھی، 2017 میں بھی مل مالکان پر گیس چوری کا مقدمہ درج ہوا تھا۔

    مل مالکان نے 20 کروڑ روپے جرمانہ بھی ادا کیا تھا، اسٹیل مل میں بجلی بھی چوری کی استعمال کی جارہی تھی۔

    خیال رہے کہ گذشتہ روز وزیرِ اعظم عمران خان نے گیس بحران کے تناظر میں گیس چوری کے خلاف ملک گیر کریک ڈاؤن کا حکم جاری کیا تھا، چوری میں معاونت پر عملے کیخلاف بھی سخت کارروائی عمل میں لانے کی ہدایت دی تھی۔

    واضح رہے کہ وزیرِ اعظم عمران خان کی زیرِ صدارت گیس کا ضیاع روکنے سے متعلق اجلاس منعقد ہوا جس میں گیس کی قلت کی وجوہ کا جائزہ لیا گیا، اجلاس میں وزیرِ اعظم نے غیر قانونی گیس کنکشنز اور گیس کی چوری کے خلاف کریک ڈاؤن کا حکم دیا۔

    وزیرِاعظم عمران خان نے گیس چوری کے خلاف ملک گیر کریک ڈاؤن کا حکم دے دیا

    چند روز قبل وزیراعظم نے گھریلو صارفین کے گیس بلوں میں اضافے کا نوٹس لیتے ہوئے وزیر پیٹرولیم کو فوری طور پر انکوائری کی ہدایت کی تھی اور کہا تھا کہ عوام پرگیس کی قیمتوں کا اضافی بوجھ ڈالنا غیر مناسب ہے۔

    سندھ اور بالخصوص کراچی میں گیس کی قلت کے باعث سی این جی اسٹیشنز پر گیس کا بحران رہا جب کہ گھروں میں بھی تسلسل کے ساتھ گیس کی سپلائی نہیں کی جارہی ہے، گیس کی قلت کے باعث مکین ایل پی جی سلینڈر اور لکڑیوں پر کھانے پکانے پر مجبور ہیں۔

  • وزیر اعظم کی گیس اوور بلنگ پر تحقیقات تیز کرنے کی ہدایت

    وزیر اعظم کی گیس اوور بلنگ پر تحقیقات تیز کرنے کی ہدایت

    اسلام آباد: وزیر اعظم عمران خان سے وزیر پیٹرولیم غلام سرور خان کی ملاقات ہوئی جس میں وزیر اعظم نے عوام پر اضافی بوجھ ڈالنے والوں کے خلاف سخت کارروائی کے احکامات دیے۔

    تفصیلات کے مطابق وزیر اعظم عمران خان سے وزیر پیٹرولیم غلام سرور خان کی ملاقات ہوئی۔ وزیر اعظم نے وزیر پیٹرولیم کو اوور بلنگ پر تحقیقات تیز کرنے کی ہدایت کی۔

    وزیر اعظم نے عوام پر اضافی بوجھ ڈالنے والوں کے خلاف سخت کارروائی کے احکامات بھی دیے۔ وزیر پیٹرولیم غلام سرور خان کا کہنا تھا کہ زائد گیس بل وصولی کی ایک ایک پائی عوام کو واپس دی جائے گی، 30 جون تک صارفین کے کیسز کی تصدیق کی جائے گی۔

    انہوں نے وزیر اعظم کو یقین دہانی کروائی کہ اوور بلنگ کے ذمہ داران کو عوام کے سامنے بے نقاب کیا جائے گا، کڑی سزا کے عمل سے کوئی بھی بچ نہیں پائے گا۔

    سیاسی مخالفین کے بارے میں گفتگو کرتے ہوئے انہوں نے کہا کہ بلاول بھٹو اور آصف زرداری مودی کی زبان بول رہے ہیں۔

    خیال رہے کہ اس سے قبل وفاقی وزیر نے ایک تقریب سے خطاب کرتے ہوئے کہا تھا کہ ایل این جی سے متعلق سپریم کورٹ میں کیس چل رہا ہے، اس لیے وفاقی حکومت ان معاہدوں پر نظرِ ثانی کرے گی۔

    انہوں نے کہا تھا کہ ایل این جی ٹرمینل کا ایک معاہدہ 30 اپریل 2014 کو ہوا تھا، اس میں کل سرمایہ کاری 21 ملین ڈالر سے زائد تھی۔ ٹرمینل 2 جنوری 2018 میں شروع ہوا جب کہ معاہدہ یکم جولائی 2016 کو ہوا۔

    غلام سرور خان کا مزید کہنا تھا کہ حکومت ایل این جی ٹرمینل ٹو پر 2 لاکھ 45 ہزار ڈالر یومیہ ادا کرتی ہے، دیکھا جائے گا کہ ایل این جی اور 2 ٹرمینلز کے معاہدے بدنیتی پر مبنی ہیں یا نہیں، ان پر 44 فیصد ایکویٹی دنیا بھر میں کہیں نہیں۔

  • وزیر اعظم کے احکامات، گیس صارفین کو رقوم کی واپسی کا عمل شروع

    وزیر اعظم کے احکامات، گیس صارفین کو رقوم کی واپسی کا عمل شروع

    اسلام آباد: چیمبر آف اسمال ٹریڈرز کے سرپرست شاہد رشید بٹ نے کہا ہے کہ وزیر اعظم عمران خان کے احکامات کے بعد گیس کمپنیوں نے صارفین کو رقوم کی واپسی کا عمل شروع کر دیا ہے۔

    تفصیلات کے مطابق اپنے ایک بیان میں اسلام آباد چیمبر آف اسمال ٹریڈرز کے سرپرست کا کہنا تھا کہ سوئی ناردرن گیس کمپنی نے سوا گیارہ ہزار افراد کو پانچ کروڑ روپے واپس کر دئیے ہیں تاہم اس عمل کو تیز کرنے کی ضرورت ہے تاکہ عوام کو ان کا پیسہ جلد از جلد لوٹایا جا سکے اور وہ سکھ کا سانس لے سکیں۔

    شاہد رشید بٹ نے مزید کہا کہ بین الاقوامی اداروں کے دباؤ پر گھریلو صارفین کے لئے گیس مہنگی کرنے سے عوام کی پریشانی میں اضافہ ہو گا، جو پہلے ہی روزمرہ کی اشیائے ضروریہ کی قیمتوں میں اضافہ سے پریشان ہیں، گیس اور بجلی کی چوری مسلسل بڑھ رہی ہے، جس کا ملبہ عوام پر ڈالا جا رہا ہے۔

    وزیراعظم عمران خان نے گذشتہ دنوں گھریلو صارفین کے اضافی گیس کے بلوں کی رقم واپس کرنے کی ہدایت جاری کی تھی۔

    وزیراعظم عمران خان نے بڑا فیصلہ کرتے ہوئے گیس کے اضافی بلوں کی رقم واپس کرنے کے لیے وزارتِ خزانہ کو 50 کروڑ روپے مختص کیے اور ہدایت کی تھی کہ صارفین کو رقم جلد از جلد واپس کی جائے۔

    گیس صارفین کو اضافی ڈھائی ارب روپے واپس کیے جائیں گے، فواد چوہدری

    بعد ازاں وفاقی وزیر اطلاعات فواد چوہدری نے کہا تھا کہ گیس بل میں اضافے سے متعلق تحقیقات جاری ہیں، صارفین کو اضافی ڈھائی ارب روپے واپس کیے جائیں گے۔

  • کراچی میں گیس بحران، خواتین لکڑیوں پر کھانا پکانے پر مجبور

    کراچی میں گیس بحران، خواتین لکڑیوں پر کھانا پکانے پر مجبور

    کراچی: شہرقائد کے مختلف علاقوں میں گیس بحران سنگین ہوگیا، خواتین گھروں میں لکڑیوں پر کھانا پکانے پر مجبور ہوگئیں۔

    تفصیلات کے مطابق کراچی کے مختلف علاقوں گیس نہ ہونے کے باعث شہریوں کی زندگی اجیرن بن گئی، گھروں میں چولھے ٹھنڈے پڑ گئے۔

    کراچی کے علاقے اولڈسٹی ایریا، کلفٹن، ڈیفنس،صدر، گلشن اقبال اور گلستان جوہر ایف بی ایریا سمیت پورے شہر میں گیس نایاب ہے۔

    گیس نہ ہونے کے باعث خواتین لکڑیاں جلا کر کھانا پکانے پر مجبور ہیں، گیس کی قلت نے شہریوں کا سن ڈے بھی برباد کردیا۔

    خواتین کے ساتھ ساتھ مرد حضرات کی بھی چھٹی خراب ہوگئی، وہ بھی گھروں میں آتش دان کے لیے لکڑیاں جلاتے نظر آئے۔

    سندھ کی گیس سندھ والوں کو ہی نہیں مل رہی، مراد علی شاہ

    شہریوں نے مطالبہ کیا ہے کہ حکومت گیس بحران کا فوری حال نکالے تاکہ اس پریشانی سے جلد از جلد چھٹکارا حاصل ہو۔

    عوام کا کہنا تھا کہ بجلی کی لوڈ شیڈنگ کی طرح گیس کی بھی لوڈ شیڈنگ ہورہی ہے، کبھی چولھے پر گیس ہوتا ہے تو کبھی غائب ہوجاتا ہے۔

    گذشتہ روز وزیراعلیٰ سندھ سید مراد علی شاہ کا کہنا تھا کہ سندھ کی گیس سندھ والوں کو ہی نہیں مل رہی، دیس کی کمی کے باعث کراچی کے شہری بھی چھٹی کے دن گھر کا کا کھانا کھانے سے محروم رہے۔

    دوسری جانب ایم ڈی سوئی سدرن کا کہنا ہے کہ گیس نہیں ہے سردی سے شارٹ فال دو سو ایم ایم سی ایف ڈی تک پہنچ گیا ہے، ہفتہ میں دو دن ہفتہ اور اتوار کو صنعتی زونز کو گیس کی فراہمی بند کرنا پڑے گی۔

  • جرمنی گیس کےلیے روس پر منحصر نہیں رہے گا، انجیلا مرکل

    جرمنی گیس کےلیے روس پر منحصر نہیں رہے گا، انجیلا مرکل

    برلن : جرمن چانسلر انجیلا مرکل نے  سلواکیہ میں خطاب کرتے ہوئے کہا ہے کہ جرمنی گیس کی ترسیل کے سلسلے میں روس پر انحصار نہیں کرے گا۔

    تفصیلات کے مطابق جرمن چانسلر انجیلا مرکل جمعے کے روز یورپی یونین کی سطح پر ہونے والی ووٹنگ سے قبل یورپی رہنماؤں کی حمایت حاصل کرنے کی کوشش کررہی ہیں۔

    غیر ملکی خبر رساں ادارے کا کہنا تھا کہ روس نارڈ اسٹریم ٹو منصوبے کے تحت بالٹک ریاستوں سے گیس پائپ لائن بچھانے پر کام کررہا ہے، جرمنی نے روس پر زور دیا ہے کہ نارڈ اسٹریم ٹو منصوبے کے لیے یوکرائن کو بطور ٹرانزٹ استعال کرے۔

    غیر ملکی خبر رساں ادارے کا کہنا ہے کہ پولینڈ، امریکا، اور بالٹک ریاستوں سمیت کئی یورپی یونین کے رکن ممالک نے جرمنی کو روس سے ایک اور گیس پائپ لائن منصوبہ شروع کرنے تنقید کا نشانہ بنایا گیا ہے۔

    امریکا، بالٹک اور یورپی یونین کے رکن ممالک کا کہنا ہے کہ روس سے بحیرہ بالٹک کے ذریعے برائے راست نارڈ اسٹڑیم ٹو گیس پائپ لائن منصوبہ شروع کرنے سے یوکرائن سے گزرنے والی گیس پائپ لائن بھی متاثر ہوگی۔

    ناقدین نے تنقید کا نشانہ بناتے ہوئے کہا کہ اس طرح توانائی کے حصول کےلیے یورپ کا روس پر انحصار بڑھ جائے گا، فرانسیسی وزارت خارجہ کا کہنا تھا جبکہ فرانسیسی حکومت نارڈ اسٹیم ٹو منصوبے پر نظر ثانی کی حمایت میں ہے۔

    مزید پڑھیں : جرمنی کو مکمل طور پر روس کنٹرول کررہا ہے، ڈونلڈ ٹرمپ

    اس سے قبل امریکی صدر ڈونلڈ ٹرمپ کا کہنا تھا کہ جرمن حکومت کی جانب سے روس سے درآمد کی جانے والی قدرتی گیس بہت بڑا سیکیورٹی خدشہ ہے۔

    غیر ملکی خبر رساں ادارے کا کہنا تھا کہ ڈونلڈ ٹرمپ نے تجویز پیش کی کہ جرمنی روس سے 70 فیصد قدرتی گیس در آمد کرے، جبکہ تازہ اعداد و شمار کے تحت جرمنی 50 اشاریہ 75 فیصد گیس درآمد کررہا ہے۔

  • کراچی کے مختلف علاقوں میں گیس بحران سنگین ہوگیا

    کراچی کے مختلف علاقوں میں گیس بحران سنگین ہوگیا

    کراچی: شہرقائد کے مختلف علاقوں میں گیس بحران سنگین ہوگیا، گھروں کے چولہے ٹھنڈے پڑگئے۔

    تفصیلات کے مطابق کراچی کے مختلف علاقوں میں گیس بحران کے باعث شہریوں کو شدید مشکلات کا سامنا ہے، گھروں میں چولہے ٹھنڈے پڑ ے ہیں۔

    گیس پریشر صفر ہونے کے باعث اولڈ سٹی ایریا سمیت دیگر علاقوں کے مکین پریشانی میں مبتلا ہیں، شہریوں نے مطالبہ کیا ہے کہ انتظامیہ فوری طور پر اس بحران کا حل نکالنے۔

    ایس ایس جی سی نے گیس میں کمی پر گزشتہ شب سی این جی اسٹیشنز بھی بند کر دئیے تھے، کورنگی، سائٹ اور سپر ہائی وے کی صنعتوں کو بھی گیس کی فراہمی نہ ہونے کے برابر ہے۔

    پریشر نہ ہونے کی وجہ سے فیکٹریوں میں کام ٹھپ ہو کر رہ گیا، فیکٹریوں میں روزانہ کی بنیاد پر اجرت حاصل کرنے والے ملازمین ہاتھ پر ہاتھ دہرے بیٹھے ہیں۔

    خیال رہے کہ گذشتہ ہفتے وفاقی وزیراطلاعات فواد چوہدری نے گیس بحران کا ذمہ دار مسلم لیگ ن کو قرار دیا تھا۔

    فواد چوہدری کی وزیرِ اعظم کے خلاف نیب کیس پر تنقید، گیس بحران کا ذمہ دار ن لیگ قرار

    گیس بحران پر وفاقی وزیر اطلاعات نے کہا تھا کہ 2013 میں گیس پر کوئی بھی قرضہ نہیں تھا، شاہد خاقان آئے تو گیس پر قرضہ چڑھ گیا، اب حال یہ ہے کہ سالانہ 57 ارب گیس چوری کا سامنا ہے، محمد زبیر شاہد خاقان عباسی سے پوچھیں کہ گیس کیوں نہیں آرہی؟

    واضح رہے کہ کراچی میں گیس بحران دو ہفتے سے زائد عرصے سے جاری ہے، جس کے بارے میں گزشتہ دنوں انکشاف ہوا تھا کہ یہ مصنوعی بحران ہے، گمبٹ گیس فیلڈ کی خرابی کی خبر غلط تھی اور سندھ کی گیس پنجاب کو فراہم کی جا رہی ہے۔

  • کراچی:گورنرہاؤس میں گیس بحران پر قابو پانے کیلئے نئی حکمت عملی پر غور

    کراچی:گورنرہاؤس میں گیس بحران پر قابو پانے کیلئے نئی حکمت عملی پر غور

    کراچی: گورنرہاؤس میں گیس بحران پر قابو پانے کے لیے اہم اجلاس ہوا، جس میں اس بحران سے نمٹنے کے لیے نئی حکمت عملی پر غور کیا گیا۔

    تفصیلات کے مطابق گورنر ہاؤس میں ہونے والے اجلاس میں وفاقی وزیرپیٹرولیم غلام سرور، میاں محمدسومرو اور گورنرسندھ عمران اسماعیل سمیت صنعت کاروں نے شرکت کی۔

    اجلاس میں کیپٹو پاور پلانٹس کو 110 کے بجائے 50 ایم ایم سی ایف ڈی گیس فراہمی کی پیشکش کی گئی، اس دوران صنعت کاروں کو وفاقی نمائندوں نے اعتماد میں لیا۔

    گورنر ہاؤس اجلاس میں 7 صنعتوں کے چیئرمین اور کراچی چیمبر کے صدر نے بھی شرکت کی۔

    صدر کراچی چیمبر کا کہنا تھا کہ اجلاس میں کیپٹوپاور پلانٹ کو گیس فراہمی نئے فارمولے پر غور کیا گیا، سی این جی سے متعلق بھی نیافارمولا تیار کرنے کی کوشش ہے۔

    گیس بحران، وفاقی وزیر خزانہ اسد عمر ہنگامی دورے پر قطر پہنچ گئے

    ان کا مزید کہنا تھا کہ شہر میں کل شام تک سی این جی اسٹیشنز کھلنے کا امکان ہے۔

    دوسری جانب گیس بحران کے خاتمے کے لیے وفاقی وزیر خزانہ اسد عمر ہنگامی دورے پر قطر پہنچ گئے ہیں، جہاں وہ ایل این جی جہازوں میں اضافے کی درخواست کریں گے، پاکستان ہر ماہ قطر سے ایل این جی کے چھے جہاز منگواتا ہے۔

    یاد رہے گیس بحران کے معاملے پر وزیراعظم عمران خان نے سوئی ناردرن،سدرن گیس کے بورڈز آف ڈائریکٹرزکو فوری ہٹانے کا فیصلہ کرتے ہوئے کہا تھا ذمہ داروں کو کسی صورت معاف نہیں کیا جائےگا، گیس کامسئلہ بڑامسئلہ ہے، ہرصورت ختم کریں گے۔

  • سندھ: گیس کا بحران شدت اختیار کر گیا، سی این جی اسٹیشنزغیر معینہ مدت کے لیے بند

    سندھ: گیس کا بحران شدت اختیار کر گیا، سی این جی اسٹیشنزغیر معینہ مدت کے لیے بند

    کراچی: صوبہ سندھ میں گیس کی لوڈشیڈنگ شدت اختیار کر گئی، سی این جی اسٹیشن تیسرے روز بھی بند رہے ہیں، بحران مزید شدت اختیار کرسکتا ہے۔ 

    تفصیلات کے مطابق ایس ایس جی سی نے صنعتوں کو گیس کی فراہمی معطل کردی، تمام صنعتی کیپٹوپاورپلانٹس کی سپلائی کو غیرمعینہ مدت تک بند کر دیا، جس کے باعث سندھ میں سی این جی اسٹیشنزغیر معینہ مدت کےلیے بند کر دیے گئے۔

    [bs-quote quote=” شہرِ قائد کے کئی علاقوں‌ میں گیس کا پریشر انتہائی کم ہے، جس کی وجہ سے گھریلو صارفین شدید اذیت میں‌ مبتلا ہیں” style=”style-7″ align=”left”][/bs-quote]

    ایس ایس جی سی کے مطابق تمام انڈسٹریز بشمول زیروریٹیڈ، رائس ایکسپورٹرزکوگیس کی سپلائی بند رہے گی.

    سندھ میں آج دوسرے روز بھی سی این جی اسٹیشنز بند ہیں، جو بحران کی وجہ سے لگاتار تین روز بند رہے ہیں. یہ پہلا موقع ہے، جب سندھ میں مسلسل تین روز  سی این جی کی فراہمی معطل رہے گی.

    سردی آتے ہی گھروں کے چولہےبھی ٹھنڈے  پڑ گئے ہیں، محکمہ گیس کا کہنا ہے  کہ فنی خرابی کے باعث گھریلو اور کمرشل صارفین کوسپلائی میں دشواری کاسامنا ہے، پنجاب میں بھی ایک روزکےلیے گیس بند رہے گی۔

    یاد رہے کہ شہرِ قائد کے تین صنعتی زونز میں گذشتہ چار روز سے گیس کی فراہمی تعطل کا شکار ہے، گیس کا پریشر کم ہونے کی وجہ سے شہریوں‌ کو شدید پریشانی کا سامنا ہے۔

    کراچی میں کیپٹو پاور پلانٹ سے چلنے والے بڑے ایکسپورٹ کارخانے بند ہیں، ترجمان سوئی سدرن کے مطابق گیس فیلڈز  میں فنی خرابی پر صنعتوں کو فراہمی بند ہوئی۔

    احتجاج کی کال اور اپیل

    سی این جی کی مختلف ایسوی ایشنز نے  سی این جی بندش کے  خلاف احتجاج کی کال دے دی۔

    ایسوی ایشن کے رہنماؤں کی جانب سے کل صبح ساڑھے 9 بجے ایس ایس جی سی ہیڈ آفس کے سامنے احتجاج کا اعلان کیا ہے،  مظاہرین نے  شاہراہ فیصل بلاک کرنے کی بھی دھمکی دی ہے۔

    تاجر رہنماؤں نے بھی مسئلہ فوری حل کرنے کا مطالبہ کیا ہے۔ تاجر رہنما سراج قاسم تیلی نے وزیراعظم سے گیس بندش کا نوٹس لینے کی اپیل کی ہے۔

  • بلوچستان کے تیل اور گیس کے ذخائر ملک کی تقدیر بدل سکتے ہیں: دارو خان اچکزئی

    بلوچستان کے تیل اور گیس کے ذخائر ملک کی تقدیر بدل سکتے ہیں: دارو خان اچکزئی

    اسلام آباد: یونائیٹڈ بزنس گروپ کے رہنما اور ایف پی سی سی آئی کے صدارتی امیدوار دارو خان اچکزئی کا کہنا ہے کہ بلوچستان کے تیل اور گیس کے ذخائر ملک کی تقدیر بدل سکتے ہیں۔

    تفصیلات کے مطابق اپنے جاری کردہ بیان میں ایف پی سی سی آئی کے صداراتی امیدوار دارو خان اچکزئی کا کہنا تھا کہ پاکستان کے آئل اینڈ گیس سیکٹر میں سرمایہ کاری کا بڑا پوٹینشل موجود ہے۔

    انہوں نے کہا کہ اس پوٹینشل سے مقامی اور غیر ملکی سرمایہ کار فائدہ اٹھا سکتے ہیں، قدرتی وسائل سے مالا مال صوبہ بلوچستان کے تیل اور گیس کے ذخائر غیر ملکی توانائی پر انحصار کم کرنے، آئل امپورٹ بل بچانے اور معیشت کو مستحکم کرنے میں اہم کردار ادا کر سکتے ہیں۔

    ان کا کہنا تھا کہ ملک میں گیس کے ذخائر کم ہو رہے ہیں، جس کی وجہ سے مہنگی گیس درامد کی جا رہی ہے اور گیس صارفین کے مسائل میں اضافہ ہورہا ہے۔

    دارو خان اچکزئی کا موقف تھا کہ مہنگی گیس سے کاروباری لاگت بڑھی ہے ، جس سے برامدات بھی متاثر ہو رہی ہیں ، جس کا حل ملکی سطح پر آئل اور گیس کی تلاش کو ترجیح دینے اور اس شعبہ میں سرمایہ کاری بڑھانا ہے۔

  • گیس لوڈ شیڈنگ کا شیڈول جاری

    گیس لوڈ شیڈنگ کا شیڈول جاری

    اسلام آباد: موسم سرما کے 3 ماہ کے لیے گھریلو صارفین کو گیس لوڈ شیڈنگ کا سامنا ہوگا تاہم صبح و شام کے اوقات میں گھریلو صارفین کے لیے گیس لوڈ شیڈنگ نہیں ہوگی۔

    تفصیلات کے مطابق سردیوں کے لیے گیس لوڈ مینجمنٹ پلان تیار کرلیا گیا۔ ذرائع کے مطابق گھریلو صارفین کو دن کے اوقات میں گیس لوڈ شیڈنگ کا سامنا رہے گا۔

    ذرائع کا کہنا ہے کہ دن کے اوقات میں گیس لوڈ شیڈنگ کی جائے گی تاہم صبح و شام کے اوقات میں گھریلو صارفین کے لیے گیس لوڈ شیڈنگ نہیں ہوگی۔

    ذرائع کے مطابق درآمدی صنعتوں کو 3 سو ایم ایم سی ایف ڈی گیس فراہم کی جائے گی، دیگر صنعتوں کو سردیوں میں گیس کی فراہمی بند رہے گی۔

    مذکورہ گیس لوڈ مینجمنٹ پلان کا نفاذ 3 ماہ یعنی دسمبر سے مارچ تک کے لیے ہوگا۔

    خیال رہے کہ چند روز قبل آئل اینڈ گیس ریگولیٹری اتھارٹی (اوگرا) نے گیس کی قیمت بڑھاتے ہوئے ماہانہ گیس فکسڈ چارجز میں 300 فیصد سے زائد اضافہ کیا تھا۔ یہ گیس کی قیمت میں ایک ماہ کے دوران دوسری بار اضافہ تھا۔

    اوگرا نے سرکاری دفاتر، اسپتالوں، مسلح افواج کے میس اور تعلیمی اداروں، رہائشی کالونیوں، کیپٹو پاور پلانٹس سمیت فلاحی اداروں کے لیے بھی گیس مہنگی کردی تھی۔

    قیمتوں میں اضافے کے بعد گیس کے ماہانہ فکسڈ چارجز 1 ہزار 53 روپے سے بڑھ کر 4 ہزار 680 روپے ہوگئے تھے۔

    علاوہ ازیں کمرشل صارفین، آئس فیکٹریوں، ہوٹلوں اور تجارتی مراکز کے لیے بھی گیس مہنگی کردی گئی تھی۔ ان صارفین کے لیے فکسڈ چارجز 1 ہزار 225 روپے سے بڑھا کر 5 ہزار 880 روپے کر دیے گئے تھے۔