Tag: gaza

غزہ: فلسطین میں غزہ کے علاقے میں اسرائیلی بم باری سے ایک خاندان کی گندم کی فصل ضائع ہونے کے باوجود اہل خانہ نے بچا کچا گندم جمع کر کے اسے پکا کر ضرورت مندوں میں تقسیم کر دیا۔

تفصیلات کے مطابق غزہ میں ابو توائما کے خاندان نے ایثار کی بڑی مثال قائم کر دی، اسرائیلی ٹینک نے ان کے گندم کے کھیتوں کو نشانہ بنا کر سیزن کی بیش تر فصلوں کو تباہ کر دیا تھا، تاہم انھوں نے بچے ہوئے گندم سے دلیہ بنا کر ضرورت مندوں کے درمیان تقسیم کر دیا۔

خیال رہے کہ اسرائیل اور غزہ کے حماس حکمرانوں کے مابین 11 روزہ جنگ کے دوران 14 مئی کی گولہ باری میں کھیتوں کو بڑے پیمانے پر نقصان ہوا تھا، کیوں کہ گندم کی فصل تیار ہو چکی تھی اور اس کی کٹائی کی جانی تھی۔

ہزاروں کلو گرام گندم والے فصلوں سے تباہی کے بعد بدقسمت لیکن ایثار کیش خاندان محض 100 کلو گرام گندم ہی اکٹھا کر سکا، گندم کی بیش تر فصل اسرائیلی حملے میں خاکستر ہو چکی تھی۔

خان یونس میں کھیتوں کے مالک خلیل ابو توائما کا کہنا تھا کہ ہم ایک سرحدی علاقے میں رہتے ہیں، اسرائیلی فوج نے ہمارے گندم کے کھیتوں پر بمباری کی، ہم لوگوں نے بچی ہوئی فصل کو جمع کیا اور حریثہ یعنی گندم کا دلیہ پکایا، اور جنگ کے خاتمے کے بعد اسے ضرورت مند لوگوں میں تقسیم کر دیا۔

جنگ کے بعد بڑی تعداد میں لوگ ابو توائما کے خاندان کو بچ جانے پر مبارک باد دینے آئے، اور کئی کنبے ایسے تھے جنھیں خوراک میسر نہیں تھا، انھوں نے کھانا کھایا۔

واضح رہے کہ غزہ میں مقیم 250 سے زائد فلسطینی اسرائیلی بم باری میں شہید ہو چکے ہیں، وزارت زراعت کے مطابق جنگ کے دوران 490 زرعی سہولیات بشمول انیمل فارم، پلاسٹک زرعی مکانات، کنوئیں اور آب پاشی کی لائنوں کو نقصان پہنچا ہے۔

غزہ: اسرائیلی بم باری سے تباہ حال علاقوں میں نقصانات کا جائزہ لینے کے لیے اقوام متحدہ کی ٹیم غزہ پہنچ گئی۔

تفصیلات کے مطابق اقوام متحدہ نے اسرائیلی بم باری سے کھنڈر بننے والے غزہ کے علاقوں کی بحالی کے لیے عالمی برادری سے مدد کی اپیل کر دی ہے، جنگ بندی کے بعد متاثرہ علاقوں میں نقصانات کا جائزہ لینے کے لیے یو این ٹیم بھی غزہ پہنچ گئی۔

اقوام متحدہ کی عہدے دار لین ہیسٹنگز نے غزہ میں وحدہ اسٹریٹ اور دیگر علاقوں کادورہ کیا، انھوں نے بے گھر ہونے والوں سے بات کی، اور شہدا کے لواحقین سے اظہار ہم دردی کیا۔

یو این کی خاتون عہدے دار نے متاثرین کی ہر ممکن مدد اور ان کی جلد بحالی کے لیے ٹھوس اقدامات کی یقین دہانی بھی کرائی، لین ہیسٹنگز کا کہنا تھا کہ پائیدار امن ہی سے علاقے میں بحالی کے کاموں کو مکمل کیا جا سکے گا۔

یاد رہے کہ اس سے قبل اقوام متحدہ غزہ میں خوراک اور دواؤں کی فراہمی کے لیے عالمی برادری سے مدد کی اپیل کر چکا ہے۔

آج بھی یروشلم میں جھڑپیں ہوئی ہیں، تاہم اس کے باوجود اسرائیل اور حماس کے درمیان سیز فائر برقرار ہے، مسجد اقصیٰ میں گزشتہ روز اسرائیلی فورسز کی جارحیت سے زخمیوں کی تعداد 50 سے تجاوز کرگئی ہے، نیز کل سے اب تک پچاس فلسطینی گرفتار کیے جا چکے ہیں۔

غزہ میں ہر طرف تباہی کے مناظر ہیں، اسرائیلی بم باری نے 11 روز میں غزہ کا نقشہ بدل دیا ہے، 15 فیکٹریاں، 180 عمارتیں، 16 ہزار سے زیادہ گھر ملبے کا ڈھیربن چکے ہیں، 75 ہزار افراد بے گھر ہوئے، جن کی بحالی کے لیے اب اقوام متحدہ نے عالمی برادری سے مدد کی اپیل کر دی ہے۔

اقوام متحدہ کی ریلیف اینڈ ورکس ایجنسی کا کہنا ہے غزہ میں ہنگامی بنیادوں پر خوراک، ادویات کی ضرورت ہے اور بچوں کو ذہنی دباؤ سے نکالنے کے لیے جلد از جلد اقدام کرنے ہوں گے، امریکی وزیر خارجہ اینتھنی بلنکن نے فلسطینی صدر محمود عباس کو غزہ میں بحالی کے کام میں مدد کرنے کی یقین دہانی کرائی ہے، چین نے بھی بے گھر فلسطینیوں کے لیے دوبارہ تعمیرات کی پیش کش کی ہے۔