ARYNews.tv | Urdu – Har Lamha Bakhabar

Tag: geeta

  • گیتا: بھارتی حکام کو والدین نہ مل سکے مگر رشتے مل گئے، 25 لڑکے شارٹ لسٹ

    گیتا: بھارتی حکام کو والدین نہ مل سکے مگر رشتے مل گئے، 25 لڑکے شارٹ لسٹ

    نئی دہلی: پاکستان سے بھارت جانے والی قوت سماعت و گویائی سے محروم لڑکی کے   والدین تاحال  نہ مل سکے مگر حکومتی اشتہار کے بعد گیتا کے 50 رشتے ضرور آگئے۔

    تفصیلات کے مطابق گیتا نامی بھارتی لڑکی نے  غلطی سے سرحد پار کرلی تھی جس کے بعد پاکستانی حکام نے قوت گویائی و سماعت سے محروم لڑکی کو ایدھی فاؤنڈیشن کے حوالے کیا تھا۔

    گیتا نے اپنی زندگی کے 13 سال ایدھی ہوم میں گزارے اور وہاں اُس کی پرورش عبدالستار ایدھی و دیگر حکام نے کی ، مذکورہ لڑکی کو 2015 میں بھارت واپس بھیج دیا گیا تھا تاہم تین سال گزر جانے کے باوجود بھی بھارتی حکام اس کے والدین کو تلاش کرنے میں ناکام رہے۔

    بھارتی اخبار کے مطابق حکومت نے گیتا کی خواہش کو مدنظر رکھتے ہوئے اُس کی شادی کا اشتہار دیا  گیا تھا جس میں کہا گیا تھا کہ جو شخص بھی اس لڑکی سے شادی کرے گا اُسے سرکاری نوکری، گھر اور گاڑی حکومت کی طرف سے دی جائے گی۔

    مزید پڑھیں: عبدالستار ایدھی کی وفات نے بھارت کی گیتا کو بھی رُلا دیا

    گیتا سے شادی کے خواہش مند 50 لوگوں کے رشتے آئے جن میں سے 25 کو شارٹ لسٹ کر کے وزارتِ داخلہ نے مذکورہ امیدواروں کی جانچ پڑتال شروع کردی۔

    بھارتی ضلع اندور کے حکام کا کہنا تھا کہ 25 لڑکوں کی تصاویر اور معلومات گیتا کو دکھائی جائیں گی جس کے بعد وہ اپنی مرضی سے ہی شریک حیات کا انتخاب کرے گی جس کے بعد سرکاری خرچے پر مذکورہ لڑکی کی شادی کی جائے گی۔ گیتا پاکستان سے واپسی کے بعد ایک فلاحی تنظیم کے زیر نگرانی اپنی زندگی گزار رہی ہے۔

    واضح رہے کہ گیتا واہگہ بارڈر کے راستے سے آنے والے سمجھوتہ ایکسپریس سے پاکستان کی حدود میں داخل ہوئی تھی جسے پولیس نے فوری طور پر اپنی تحویل میں لے کر اسلام آباد منتقل کیا تھا تاہم کچھ عرصے بعد اُسے ایدھی فاؤنڈیشن کے حوالے کردیا گیا تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عبدالستار ایدھی کی وفات نے بھارت کی گیتا کو بھی رُلا دیا

    عبدالستار ایدھی کی وفات نے بھارت کی گیتا کو بھی رُلا دیا

    اندور : بھارت کی رہائشی گیتا بھی عبدالستار ایدھی کی وفات پر رو پڑی، اس کا کہنا ہے کہ ایدھی صاحب باپ کی طرح پیار کرتے تھے۔

    تفصیلات کے مطابق غلطی سے پاکستان آنے والی قوت گویائی اور سماعت سے محروم بھارت جانے والی گیتا بھی اپنے محسن عبدالستار ایدھی کی وفات پر آبدیدہ ہوگئی۔


    Indian girl Geeta fondly remembers father… by arynews

    بولنے سے قاصر اور لاوارث گیتا کو تین سال قبل ایدھی ٹرسٹ میں پناہ ملی۔ جہاں سے اسے گزشتہ دنوں بھارت بھجوا دیا گیا، گیتا آج کل بھارت کے شہر اندور میں ایک این جی او کے ساتھ رہ رہی ہے ۔ عبدالستار ایدھی کی وفات کی خبر سن کر گیتا کے آنسو بہنے لگے۔

    گیتا نے اپنے جذبات کا اظہار اشاروں کی زبان میں کیا، جس کا پریس نوٹ بھارتی این جی او کی سربراہ مسز کپور نے جاری کیا۔

    گیتا کا کہنا ہے کہ ایدھی صاحب باپ کی طرح پیار کرتے تھے۔ گیتا نے بتایا کہ بلقیس ایدھی نے اسے بھارت سے مورتیاں لاکر دیں تاکہ وہ پوجا کرسکے۔

    گیتا نے بتایا کہ ایدھی صاحب اس سے اشاروں کی زبان میں بات کرتے تھے۔ وہ ناراض ہونے پر غصہ بھی کرتے تھے۔ ایدھی صاحب تہواروں پر اس کے لئے کپڑے جوتے اور مٹھائیاں بھی لاتے تھے۔ میں ان کا پیار کبھی نہیں بھلا پاؤں گی۔

     

  • گیتا کی واپسی: نریندرمودی، وزیراعظم پاکستان اورایدھی خاندان کے مشکور

    گیتا کی واپسی: نریندرمودی، وزیراعظم پاکستان اورایدھی خاندان کے مشکور

    نئی دہلی: بھارتی وزیراعظم نریندر مودی نے گیتا کی بحفاظت بھارت واپسی پروزیراعظم پاکستان میاں محمد نواز شریف اور ایدھی خاندان کا شکریہ ادا کیا ہے۔

    بھارتی وزیراعظم نریندرمودی اپنے ٹویٹر پیغام میں کہا ہے کہ وہ گیتا کی بھارت واپسی کو یقینی بنانے کے لئے پاکستانی وزیراعظم نوازشریف کے شکرگزارہیں۔


     

    نریندرمودی نےاپنے ایک اورٹویٹر پیغام میں گیتا کو بھارت میں خوش آمدید بھی کہا۔ انہوں نے یہ بھی کہا کہ گیتا کا بھارت واپس آنا ایک انتہائی خوشگوارموقع ہے اور انہیں گیتا کے ساتھ وقت گزار کر بے حد خوشی ہوئی۔

    اس موقع پر انہوں نے ایدھی خاندان کا شکریہ ادا کرتے ہوئے کہا کہ وہ گیتا کا خیال رکھنے پر بے حد شکرگزار ہیں اور ان کا
    یہ اقدام ان کی رحم دلی اور انسان دوستی کے اعلیٰ درجات پر ہونے کی دلیل ہے۔

    نریندر مودی نے اپنے ٹویٹ میں یہ بھی کہا کہ ایدھی خاندان نے گیتا کے لئے جو کچھ کیا اس کا نعم البدل نہیں تاہم میں اظہار مسرت کرنے کے لئے ایدھی فاوٗنڈیشن کو ایک کروڑ روپے رقم دے رہا ہوں کہ وہ اس قسم کے کارخیر کرتے رہیں۔

  • پاکستان میں زلزلے سے اموات، پاکستانی ہائی کمیشن میں گیتا کے اعزاز میں تقریب ملتوی

    پاکستان میں زلزلے سے اموات، پاکستانی ہائی کمیشن میں گیتا کے اعزاز میں تقریب ملتوی

    نئی دہلی: پاکستان سمیت جنوبی ایشیا میں آنے والے زلزلے سے ہونے والی اموات کے سبب نئی دہلی میں پاکستانی ہائی کمیشن میں گیتا نامی بھارتی لڑکی کے اعزاز میں رکھی جانے والی تقریب ملتوی کردی گئی۔

    قوم سماعت اور گویائی سے محروم گیتا 2003 میں لاہور ریلوے اسٹیشن پر لاوارث پائی گئی تھی اور تب ہی سے اس کے اہل خانہ کی تلاش جاری تھی اس عرصے میں گیتا پاکستان کی فلاحی تنظیم ایدھی فاوٗنڈیشن کے پاس قیام پذیرتھی۔

    گیتا کے خاندان کی تلاش کئی سال جاری تھی اور گزشتہ دنوں یہ تلاش زور پکڑ گئی تھی جس کے سبب ایدھی فاونڈیشن گیتا کواس کے خاندان سے ملانے میں کامیاب ہونے کے قریب ہے۔

    بھارتی میڈیا رپورٹس کے مطابق پاکستانی ہائی کمیشن کے ترجمان منظور علی میمن کا کہنا تھا کہ زلزلے کے سبب پاکستان میں ہونے والے بڑے جانی نقصان کے سبب گیتا کے اعزاز میں رکھی جانے والی تقریب ملتوی کی گئی ہے۔

    واضح رہے کہ گیتا آج صبح ہی بین الاقوامی پرواز سے نئی دہلی پہنچی ہیں۔

  • گیتا بھارت پہنچ گئی، خاندان کی شناخت تاحال نہ ہو سکی

    گیتا بھارت پہنچ گئی، خاندان کی شناخت تاحال نہ ہو سکی

    کراچی : پندرہ سال پہلے غلطی سے سرحد عبور کرنے والی بھارتی لڑکی گیتا بالآخر اپنے وطن واپس پہنچ گئی، نئی دلی ائیرپورٹ پربھارتی حکام اورگیتا کے رشتے دار ہونے کے دعویداروں نے گیتا کا استقبال کیا، بلقیس ایدھی بھی گیتا کے ہمراہ ہیں.

    پندرہ سال بعد گونگی اور بہری بھارتی لڑکی گیتا واپس اپنوں میں پہنچ گئی، پی آئی اے کی پروازدلی ائیرپورٹ پہنچی تو جذباتی مناظردیکھے گئے۔

    برسوں پہلے خاندان سے بچھڑنے والی بھارتی لڑکی گیتا بلقیس ایدھی کے ہمراہ کراچی سے اپنے وطن روانہ ہوئی، بھارت روانہ ہونے سے قبل کراچی ائیرپورٹ پر گیتا نے پاکستانیوں کا شکریہ ادا کیا اوروطن واپسی پرخوشی اورمسرت کا اظہاکیا، ائیرپورٹ کیلئے روانہ ہونے سے پہلے سماجی کارکن فیصل ایدھی نے گیتا کے ہمراہ پریس کانفرنس کی۔

    فیصل ایدھی نے گیتا کو شناخت کرنے والے خاندان پر شکوک شبہات کا اظہار کیا، فیصل ایدھی کا کہنا تھا کہ بھارتی حکام نے گیتا کے والدین کی شناخت نہ ہونے صورت میں گیتا کے لیے مناسب بندوبست کی یقین دہانی کرائی ہے۔

    ائیرپورٹ پر خوشی و مسرت سے سرشار گیتا کو الوداع کہا گیا اور تحائف سے نوازا گیا، جس پر گیتا نے ہاتھ کے اشارے سے خوشی کا اظہار کیا۔

    گیتا پی آئی اے کی پرواز سے آٹھ بجکر بیس منٹ پربھارت روانہ ہوئی، بلقیس ایدھی اور صبا ایدھی بھی گیتا کے ہمراہ ہیں۔

    واضح رہے کہ گیتا بارڈر کے قریب مندر میں اپنے والدین کیساتھ آئی تھی، بھیڑ میں گیتا اپنے گھروالوں سے بچھڑ کر پاکستان بارڈر پار کر گئی، جہاں پولیس نے گیتا کو پکڑ کر ایدھی کے حوالے کردیا تھا، گیتا پندرہ سال سے ایدھی فاونڈیشن میں مقیم تھی، جہاں اس کا بھرپور خیال رکھا گیا ۔

    گیتا کی ایدھی ہوم میں بہت ساری سہیلیاں تھیں جن کیساتھ وہ اپنے سکھ دکھ بانٹتی تھی، گیتا کیلئے چھوٹا سا مندر بھی بنایا گیا تھا ،جہاں وہ پوجا کرتی تھی، کچھ روز پہلے گیتا نے اپنے خاندان کو تصویر میں دیکھ کر پہچانا تھا،۔

    گیتا کے خاندان ملنے کی تصدیق بھارتی وزیرخارجہ سشما سوراج نے بھی کی تھی سشما سوراج کا کہنا تھا کہ ڈی این اے ٹیسٹ کے بعد گیتا کواس کے خاندان کے حوالے کیا جائے گا۔

    بھارتی لڑکی گیتا کو اپنی بیٹی کہنے والے خاندان کی شناخت نہ ہو سکی، ایدھی سینٹر کراچی میں 13 سال سے رہائش پذیر بھارتی لڑکی گیتا اپنے دیس تو پہنچ گئی، لیکن اس کے والدین کے بارے میں شکوک و شبہات تاحال موجود ہیں۔

    گیتا نہ بول سکتی ہے اور نہ سن سکتی ہے لیکن اس کے باوجود دونوں ملکوں کےدرمیان انسان دوستی کی ایک علامت بن گئی ہے،گیتا کی سرپرستی کے دعویدار خاندان کی تصاویر میں ان کی شناخت معمہ بن گئی ہے

  • گیتا کی کل بھارت روانگی کی تیاریاں مکمل

    گیتا کی کل بھارت روانگی کی تیاریاں مکمل

    کراچی : پاکستان میں ایک دہائی سے زیادہ عرصہ مقیم رہنے والی گیتا کا بھارت جانے کا انتظام ہوگیا، 22 سال کی گیتا پیرکے روز ایدھی کےپانچ رضاکاروں کے ساتھ بھارت کے لئے روانہ ہوگی۔

    تفصیلات کے مطابق بولنے اور قوت سماعت سے محروم گیتا کا بھارت جانے کا انتظام ہوگیا، بھارت جانے کا ٹکٹ مل گیا، گیتا کو اس کے اپنوں سے ملوانے کے لئے بلقیس ایدھی ، صبا ، سعد اور حمزہ ایدھی بھی اور بھارتی سفارت خانے کے ایک افسرپی کے جین بھی گیتا کے ساتھ بھارت جائیں گے۔

    گیتا کے رشتہ دار اس سے ملنے کے لئے دہلی پہنچ چکے ہیں ۔ ذرائع کے مطابق اگر گیتا کا ڈی این اے اس کے رشتہ داروں سے تعلق ثابت نہ کرسکا تو گیتا کے لئے کسی مناسب ادارے کا انتخاب کیا جائے گا،جہاں اسے رکھا جائے گا۔

    گیتا کو گیارہ بارہ سال کی عمر میں لاہور سے پکڑا گیا تھا جس کے بعد حکام نے اسے ایدھی فائونڈیشن کے سپرد کردیا گیا تھا، گیتا کواپنے گھر والوں کا پتہ نہیں تھا۔

    اس لئے اس بھارت نہیں بھیجا جاسکا تھا، کچھ دن پہلے گیتا نے بھارت میں موجود اپنے رشتہ داروں کی تصویر دیکھ کر انہیں پہچان لیا تھا۔


    Geeta set to leave for India by arynews

  • گیتا کی بھارت واپسی کی تیاریاں مکمل، 26 اکتوبر کو روانہ ہوگی

    گیتا کی بھارت واپسی کی تیاریاں مکمل، 26 اکتوبر کو روانہ ہوگی

    کراچی : گویائی اور سماعت سے محروم بھارتی لڑکی گیتا کی چھبیس اکتوبر کو بھارت روانگی کی تیاریاں مکمل کر لی گئیں، پندرہ سال سے پاکستان میں مقیم گیتاکاادھوراسفرپوراہوگیا۔

    آنکھوں میں خواب سجائےچھبیس اکتوبرکو وہ اپنےدیس روانہ ہوگی۔ بےقراراوراپنوں سے ملنے کی خوشی گیتا کی آنکھوں سےجھلکتی ہے۔

    ایدھی فاؤنڈیشن کے فیصل ایدھی کہا ہے کہ امانت پہنچانے بلقیس ایدھی خود انڈیا جائیں گی،گیتا کی رخصتی کیلئے بلقیس ایدھی نے سونے کا سیٹ بھی تیار کروالیا ہے۔

    پاکستان کی یادوں کےساتھ سونے کا سیٹ اور دیگرتحائف بھی گیتا کے ساتھ جائیں گے۔ بولنے اور سننے کی صلاحیت سے محروم گیتا اپنے محسنوں سے اظہار تشکر الفاظ میں تو ادا نہیں کر سکتی لیکن اُس کی آنکھوں سے اس کا اظہار ہوتا ہے ۔

    بولنے سے معذور گیتاپندرہ برس بعد ایک نئی زندگی شروع کرےگی لیکن پاکستان میں گزرے پل کبھی نہیں بھول پائے گی۔

    علاوہ ازیں بھارتی لڑکی گیتا نے اپنی شادی کے حوالے سے مبینہ والدین کے بیان کو مسترد کردیا ہے اور اشاروں کی زبان میں فیصل ایدھی کو بتایا ہے کہ وہ شادی شدہ نہیں اور نہ ہی اس کا کوئی بچہ ہے، جبکہ بھارت سے رابطہ کرنے والے والدین نے دعویٰ کیا تھا کہ وہ شادی شدہ ہے۔

    فیصل ایدھی کے مطابق گیتا پندرہ سال قبل پاکستان آئی تھی اور چھ سال سے ایدھی ہوم میں رہ رہی ہے اس وقت گیتا کی عمر تقریبا تیئس سال ہے ۔

    فیصل ایدھی مسلسل بذریعہ اسکائپ ویڈیو لنک کے ذریعے والدین سے رابطہ کرنے کی کوشش کررہے ہیں تاہم انڈیا کے پسماندہ علاقے میں دستیاب غیر معیاری انٹر نیٹ سگنل کے باعث رابطہ نہیں ہوپارہا اور بار بار منقطع ہوجاتا ہے۔

  • گیتا کے رشتے دار ہونے کے دعویدار4 خاندان سامنے آئے ہیں، سشما سوراج

    گیتا کے رشتے دار ہونے کے دعویدار4 خاندان سامنے آئے ہیں، سشما سوراج

    نئی دہلی : بارہ سال سے پاکستان میں مقیم بھارت کی گیتا کے گھر واپسی کے امکان روشن ہوگئے۔

    بھارتی وزیرخارجہ سشما سوراج نے سماجی رابطے کی ویب سائٹ پر ٹویٹ کرتے ہوئے بتایا کہ گیتا کے رشتے دار ہونے کے دعویدار چار خاندان سامنے آئے ہیں، جس کیلئے بھارتی وزیرخارجہ نے مقامی حکام کوتصدیق کرنے کی ہدایت کردی۔

    انھوں نے کہا کہ گیتا کے خاندان ہونے کے دعویداروں کا تعلق جھاڑکھنڈ،پنجاب، بہاراوریوپی سے ہے، گیتا نے بھارتی ہائی کمشنر کو اشاروں میں بتایا تھا وہ سات بھائی بہن ہیں، گیتا نے یہ بھی بتایا وہ اپنے والد کے ساتھ مندرجاتی تھی۔

  • گیتا کی ایدھی ہوم میں زندگی پرایک نظر

    گیتا کی ایدھی ہوم میں زندگی پرایک نظر

    ایدھی فاؤنڈیشن میں رہائش پذیرقوت گویائی اورقوتِ سماعت سے محروم گیتا کے آبائی شہرکی تلاش جاری ہے۔

    گیتا سب سے پہلے ایدھی سینٹر لاہور پہنچی تھی اور اس کے بعد اسے ایدھی سینٹرکراچی منتقل کیا گیا جہاں یہ لڑکی ایدھی فاؤنڈیشن کے روحِ رواں ڈاکٹر عبدالستار ایدھی کی اہلیہ بلقیس ایدھی کے کافی نزدیک آگئی اور انہوں نے ہی اس کا نام گیتا رکھا۔

    گیتا کا معاملہ پہلی بار 2012 میں منظرِ عام پر آیا تھا لیکن تب اسے کوئی خاطر خواہ پذیرائی نہیں ملی تھی لیکن اب کی بار بھارتی وزیرِ خارجہ نے دعویٰ کیا ہے کہ وہ گیتا کو اس کے گھر تک پہنچائیں گی۔

    یہاں ہم آپ کے ساتھ کچھ تصاویر شیئر کررہے ہیں جن میں دیکھا جاسکتا ہے کہ گیتا کراچی میں واقع بلقیس ایدھی فاؤنڈیشن میں کس طرح کی زندگی گزاررہی ہے۔

    geeta

    geeta

    geeta

    geeta

    geeta

    geeta

  • بھارتی لڑکی گیتا نے سرپرستی کے دعویداروں کو پہچاننے سے انکار کردیا

    بھارتی لڑکی گیتا نے سرپرستی کے دعویداروں کو پہچاننے سے انکار کردیا

    کراچی : اے آر وائی نیوز کی آواز پر گیتا کی شناخت کیلئے ایک بھارتی خاندان نے فیصل ایدھی سے رابطہ کر لیا۔لیکن گیتا نے مذکورہ خاندان کو پہچاننے سے انکار کردیا ہے۔

    اے آر وائی نیوز سننے اور بولنے سے معذوربھارتی شہری گیتا کی آواز بن گیا۔ گیتا کی کہانی آے آر وائی نیوزکی زبانی سننے کے بعد بھارت سے ایک خاندان نے ایدھی ہوم رابطہ کرلیا۔

    لیکن جب گیتا کو مذکورہ خاندان کے افراد کی تصویرِیں دکھائی گئیں تو گیتا نے پہچاننے سے انکار کردیا۔ امرتسر سے تعلق رکھنے والے اس خاندان کا دعویٰ ہے کہ ان کی بچی بھی بارہ سال پہلے لاپتہ ہوگئی تھی۔

    واضح رہے کہ اے آروائی نیوز کے مارننگ شو میں گیتا کو دیکھنے اور اُس کی کہانی سننے کے بعد بھارتی سرکار بھی جاگ اٹھی اور فوراً اپنے ہائی کمشنر کو کراچی بھیج دیا تھا۔