راولپنڈی: آرمی چیف جنرل قمر جاوید باجوہ نے کہا ہے کہ سی پیک کی کامیابی کے لیے تمام اداروں کو بھرپور تعاون کرنا ہوگا، منصوبے کے حوالے سے ہماری صلاحیتوں پر کسی کو شک نہیں ہونا چاہیے.
آئی ایس پی آرکے مطابق این ایل سی کی جانب سے منعقدہ سی پیک لاجسٹک انٹرنیشنل فورم سے خطاب کرتے ہوئے ان کا کہنا تھا کہ سی پیک خطے میں بڑے پیمانے پر بہتری لائےگا، چین کا ون بیلٹ ون روڈ وژن پوری دنیا کے لیے ہے، منصوبہ پاکستان،مغربی چین اور خطے کے لیے گیم چینجر ہے۔
انہوں نے کہا کہ سی پیک کے لیے خطے میں امن و استحکام نہایت ضروری ہے، چین کی سرمایہ کاری سے پاکستان میں ترقی آئے گی، بطور قوم ہم اسی موقع سے فائدہ اٹھا سکتے ہیں۔
جنرل قمر جاوید باجوہ کا کہنا تھا کہ سی پیک کی کامیابی کے لیے تمام اداروں کو بھرپور تعاون کرنا ہوگا،تجارت اور سرمایہ کاری کے فروغ کےلیے موجود قوانین اور قواعد بہتر بنانے ہوں گے، منصوبے کے حوالے سے ہماری صلاحیتوں پر کسی کو شک و شبہ نہیں ہونا چاہیے.
انہوں نے مزید کہا کہ کوئی بھی رکاوٹ آئے انشااللہ سی پیک کو کامیاب بنائیں گے،سال 2030ء تک اقتصادی شراکت داری کامیاب کرنا ہمارا خواب ہے، این ایل سی کو سی پیک سے متعلق ایسے فورمز کا انعقاد کرتے رہنا چاہیے۔
