کراچی : پاکستان میں اپنے فرائض سے سبکدوش ہونے والے جرمن قونصل جنرل ہولگر زیگلر کو کراچی بھا گیا، ان کا کہنا ہے کہ اہلیان کراچی بہت محبت کرنے والے لوگ ہیں۔
یہ بات انہوں نے اپنی رہائشگاہ پر منعقدہ الوداعی عشائیے میں گفتگو کرتے ہوئے کہی، کراچی میں متعین سبکدوش ہونے والے جرمن قونصل جنرل ہولگر زیگلر کا کہنا تھا کہ کراچی ایک ملٹی کلچر شہر ہے۔
ان کا کہنا تھا کہ یہاں کے لوگ بہت محبت کرنے والے ہیں مجھے اور میری اہلیہ کو کراچی اور سندھ کے لوگوں نے بے پناہ محبت دی جو ہمیشہ یاد رہیں گی۔
جرمن قونصل جنرل نے کہا کہ میں ایک اچھی یادوں کے ساتھ یہاں سے رخصت ہو رہا ہوں میں نے اپنی مدت ملازمت میں کوشش کی ہے کہ سندھ کا ثقافتی ورثہ جو کہ بہت ہی قدیمی ہے اسے اجاگر کیا جائے، سندھ صوفیوں کی سرزمین ہے۔
ہولگرزیگلر کا کہنا تھا کہ سیلاب متاثرین کیلئے سندھ اور بلوچستان کی عوام کیلئے امدادی سرگرمیاں بھی جاری کی تھیں قدرتی آفات کے نتیجے میں تبادہی دیکھ کر دل بہت دکھا ہے۔
انہوں نے کہا کہ میرے جانے سے کراچی والوں کو میری کمی محسوس نہیں ہوگی کراچی میں جرمن حکومت کے تعاون سے کئی منصوبے مکمل کئے اور کچھ پر کام ہورہا ہے۔
اس موقع پر انہوں نے نئے قونصل جنرل روڈیگر لوٹزکا استقبال کیا اور انھیں جرمنی پرچم کے کلروں سے مزین سندھی ٹوپی پہنائی اور اجرک پیش کی ساتھ ساتھ ایک چھڑی دے کر کہا کہ میں قونصلیٹ کی کمانڈ تمہارے حوالے کرتا ہوں۔
اس موقع پر نئے قونصل جنرل نے خطاب کرتے ہوئے کہا کہ پاکستان اورجرمنی کے تعلقات کو فروغ دینے کیلئے وہ اپنا کردار اداکریں گے اور سابق قونصل جنرل کے مشن کو بھی آگے بڑھائیں گے۔
سبکدوش ہونے والے قونصل جنرل نے میڈیا کی کاوشوں کو سراہا، کراچی کے صحافیوں سے گفتگو کرتے ہوئے کہا کہ کراچی کے صحافیوں نے ہمیشہ میرا ساتھ دیا۔ تقریب میں جرمنی اور پاکستانی قومی ترانے بھی بجائے گئے۔
