اسلام آباد: آئی جی اسلام آباد محمد احسن یونس نے 37 پولیس افسران اور جوانوں کو اسلام آباد پولیس کے غازی ڈکلیئر کر دیا۔
تفصیلات کے مطابق اسلام آباد پولیس کے سینتیس اہل کاروں کو غازی کا اعزاز دیا گیا ہے، یہ جوان فرائض کی انجام دہی کے دوران جرائم پیشہ عناصر کی گولیوں سے زخمی ہوئے تھے۔
آئی جی اسلام آباد محمد احسن یونس نے ان غازیوں کے اعزاز میں ایک پُر وقار تقریب کا اہتمام کیا، جس میں انھوں نے اہل کاروں کو غازی کے بیجز لگائے۔
آئی جی اسلام آباد نے تقریب سے خطاب میں کہا میں نے غازیوں کے لیے ایک نظام بنا دیا ہے جو میرے جانے کے بعد بھی جاری رہے گا، خصوصی کمیٹی غازیوں کو مختلف ربنز کے حوالے سے سفارشات دے گی۔
ان کا کہنا تھا احتساب کے ساتھ ساتھ پولیس اہل کاروں کے جذبے کو سراہنا بھی ضروری ہے، اسلام آباد کے شہریوں کو بتانا ہے کہ یہ پولیس اہل کار آپ کے لیے جان کی قربانی بھی دے سکتے ہیں۔
آئی جی نے کہا ماڈرن ڈے پولیسنگ ٹیکنالوجی کے ساتھ میڈیا کے بغیر بھی مکمل نہیں، ہم میڈیا کے سامنے ہر غلط کام کے لیے جواب دہ ہیں، لیکن فورس اچھا کام کرے تو سراہا جانا چاہیے، اس بات کو سمجھیں یہ پولیس آپ کی ہے۔
انھوں نے مزید کہا کہ فورس کی اچھائیاں اور برائیاں کسی بھی دوسرے شعبے کی طرح ہو سکتی ہیں، اس محکمے کی نوکری ہم نے اپنی مرضی سے خود منتخب کی ہے، جہاں اپنی فورس کا خیال رکھنا میری اوّلین ذمہ داری ہے، پولیس بطور ایک فورس اور سرونٹ اپنے آپ کو شہریوں کے سامنے پیش کریں۔
آئی جی پولیس کا کہنا تھا کہ ہم پولیس اسٹیشن میں عام شہری کا تجربہ بہتر بنانے کی کوشش کر رہے ہیں، حکومت کی جانب سے دیا گیا بجٹ رولز کے مطابق استعمال کریں گے، ہماری خواہش ہے کہ تفتیش کی لاگت افسر کو ملتے ہی اسے شکایت کنندہ کو بھی میسج کے ذریعے بھیجا جائے۔
