وینکوور: مشہور پنجابی گلوکار سدھو موسے والا کے قتل کے الزام میں بھارت میں قید گینگسٹر لارنس بشنوئی نے کینیڈا میں ایک اور مشہور پنجابی گلوکار گپی گریوال کے گھر پر فائرنگ کروا دی۔
بھارتی میڈیا رپورٹس کے مطابق کینیڈا کے شہر وینکوور کے علاقے وائٹ راک میں گزشتہ روز ہفتے کو گولیوں کی تڑتڑاہٹ نے ہلچل مچا دی تھی، معلوم ہوا کہ پنجابی گلوکار گپی گریوال کے گھر کو فائرنگ کا نشانہ بنایا گیا۔
فائرنگ کے واقعے کے بعد بدنام زمانہ گینگسٹر لارنس بشنوئی نے سوشل میڈیا پلیٹ فارم فیس بک پر اپنے اس مجرمانہ فعل کی ذمہ داری قبول کی، بشنوئی نے دعویٰ کیا کہ اس حملے کی منصوبہ بندی اسی نے کی ہے۔
Big Breaking: The Lawrence Bishnoi group claimed responsibility for firing at Punjabi Singer Gippy Grewal’s residence in Vancouver, Canada. Bishnoi stated that they took this action because Gippy Grewal is close to Salman Khan. He also issued a warning to Salman Khan, stating… pic.twitter.com/ApQXTGSC4c
— Gagandeep Singh (@Gagan4344) November 25, 2023
گینگسٹر نے اپنی پوسٹ میں لکھا کہ سلمان خان سے تمھارے قریبی تعلقات بھی تمھیں نہیں بچا سکیں گے، یہ تمھارے ’بھائی‘ کے لیے تمھارے دفاع میں قدم اٹھانے کا وقت ہے، یہ پیغام سلمان خان کے لیے بھی ہے، اور یہ سوچ کر بے وقوف نہ بننا کہ داؤد ابراہیم تمھیں ہماری پہنچ سے بچا سکتا ہے۔
لارنس بشنوئی نے مزید لکھا ’’تمھیں کوئی نہیں بچا سکتا، سدھو موسے والا کی موت پر تم نے جو بڑھ چڑھ کر ردعمل دیا تھا وہ ہماری نظر میں رہا، ہم اس کے کردار اور اس کے مجرمانہ روابط سے بخوبی واقف ہیں۔‘‘
واضح رہے کہ لارنس بشنوئی کو کئی مجرمانہ مقدمات کا سامنا ہے، جن میں بھتہ خوری اور قتل کے مقدمات شامل ہیں، پولیس حکام کے مطابق دنیا بھر میں تقریباً 700 مسلح افراد کے ساتھ اس کا رابطہ ہے۔
