کراچی : تین سالہ مندی کے بعد صرافہ مارکیٹ میں تیزی کی لہر آنے والی ہے، سونے مہنگا ہوجائے گا ماہرین نے خبردار کردیا۔
رواں سال سونے کی قیمت میں پچیس فیصد تک کا اضافہ ہوچکا ہے، ماہرین کے مطابق عالمی معیشت کی غیریقینی صورتحال کی وجہ سے سرمایہ صرافہ مارکیٹ کا رخ کررہے ہیں،جب کہ امریکی انتخابات کی وجہ سے بھی سونے کی قیمت میں اضافے کا امکان ہے۔
واضح رہے کہ عالمی مارکیٹ میں گزشتہ کاروباری ہفتے کے دوران سونے کے نرخ میں11ڈالر کی کمی دیکھی گئی جس کے بعد سونے کی فی اونس قیمت 1348 ڈالر سے گھٹ کر 1337ڈالر ہو گئی ، بین الاقوامی مارکیٹ میں سونے کے نرخوں میں کمی کے باوجود مقامی مارکیٹوں میں سونے کی قیمتوں میں اضافہ دیکھا گیا۔
آل پاکستان سپریم کونسل جیولرز ایسوسی ایشن کی رپورٹ کے مطابق 7 دن کے دوران صرافہ مارکیٹوں میں فی تولہ سونے کی قیمت میں 850روپے کا اضافہ دیکھا گیا جس کے بعد کراچی ،حیدرآباد، لاہور،ملتان،فیصل آباد، راولپنڈی ،اسلام آباد اور کوئٹہ کی صرافہ مارکیٹوں میں سونے کی فی تولہ قیمت50ہزار950روپے سے بڑھ کر51ہزار800روپے ہوگئی۔
معاشی تجزیہ کاروں کے مطابق عالمی مارکیٹ میں سرمایہ کاروں کی جانب سے ڈالر کی طلب میں کمی اور سونے کی مانگ میں اضافہ ہوا ہے جس کے باعث اس کی قیمتوں میں اضافہ ہوا۔
