گرمی کی شدت میں اضافہ ہوتے ہی پشاور میں گوند کتیرا کے حکیمی شربت کی ڈیمانڈ بڑھ گئی ہے، گوند کتیرا کو حکیمی شاہی شربت اس کے افادیت بھرے اجزا کی وجہ سے کہا جاتا ہے۔
18 اشیا سے تیار کردہ یہ شربت صحت کے لیے انتہائی مفید ہے، اس میں کاجو، بادام، پستہ، اخروٹ، گاجر، کدو، آملہ، اسپغول، تخم ملنگا، تل، خشک سیب اور 5 سے 6 اقسام کے شربت کے عرق ڈالے جاتے ہیں۔
37 سال سے گوند کتیرا کا شربت فروخت کرنے والے بابا کا کہنا ہے کہ گرمیوں میں اس کی طلب بڑھ جاتی ہے، گرمی سے ستائے شہریوں کا کہنا ہے کہ گوند کتیرا کا شربت پینے سے ٹھنڈک کا احساس ہوتا ہے اور طبی اعتبار سے یہ شربت جگر اور خون کو صاف کرتا ہے۔
100 روپے میں صحت بخش اجزا سے بھرپور گوند کتیرا کا شربت گرمیوں میں کسی نعمت سے کم نہیں۔