Tag: Goods Transporters

اسلام آباد:وزیراعظم عمران خان نے چیک پوسٹوں پرگڈز ٹرانسپورٹ سےبھتہ وصولی کی شکایات کا کا نوٹس لے لیا، چیک پوسٹوں کی تعداد کم کرکے ملٹی ایجنسی چیک پوسٹیں بنانے کا حکم دے دیا۔

تفصیلات کے مطابق وزیر اعظم آفس کا کہنا ہے کہ کراچی طورخم اورکراچی چمن روٹ پرشکایات بڑھتی جارہی ہیں، وزیراعظم آفس نے متعلقہ حکام کو 5 اکتوبر تک عملدرآمد یقینی بنانے کی ہدایت کردی ہے۔

ذرائع کا کہنا ہے کہ وزیراعظم نے اس معاملے پر کہاہے کہ وصولی،بھتہ خوری کمزورنگرانی،چشم پوشی کی علامت ہے، اس سے قیمتوں میں اضافہ اورملک کی بدنامی ہوتی ہے۔

انھوں نے ان شکایا ت کے خلاف ہر حال میں عمل درآمد کرانے کی ہدایت کی ہے اور کہا ہے کہ عمل نہ ہونےپرگراؤنڈاسٹاف کےخلاف ایکشن لیا جائے گا اور ساتھ ہی ساتھ سپروائزری افسراورانتظامی سربراہان کے خلاف بھی کارروائی ہو گی۔

وزیراعظم آفس کا یہ بھی کہنا تھاکہ غیرقانونی کرایہ وصولی ایکسائزاینڈڈیوٹی قوانین پرسوالیہ نشان ہے،بادی النظرمیں بھتہ خوری سے حاصل رقوم حکام بالاتک جاتی ہے۔ انہوں نے اس معاملےپرسختی سےنوٹس لیتے ہوئے کہا ہے کہ چیک پوسٹوں سےمتعلق قوائدوضوابط میں تبدیلی کی جائے۔

انھوں نے یہ بھی کہا ہے کہ ملک بھرمیں چیک پوسٹوں کی تعدادکم کی جائے اور تمام ادارےملٹی ایجنسی مشترکہ چیک پوسٹیں قائم کریں۔متعلقہ حکام متحرک ہوکراحکامات پرعملدرآمدیقینی بنائیں، اور مقررہ وقت تک رپورٹ وزیراعظم آفس کوپیش کی جائے بصورت دیگرچیف سیکرٹریز،آئی جیز،ڈی آئی جیزکےخلاف کارروائی ہوگی۔