کراچی : سانحہ صفورہ پر سندھ حکومت نے کل یومِ سوگ منانے کا اعلان کردیا ہے، ایم کیو ایم اور اے این پی نےعوام سے کاروبار بند رکھنے کی اپیل کی ہے۔
صفورہ چوک میں دہشتگردی کی بدترین کارروائی پر قوم سوگوار ہے، حکومت سندھ نےدہشتگردی کی سفاک کارروائی میں متاثرہ خاندانوں سے اظہارِ یکجہتی کے لئے کل صوبے میں یوم سوگ منانے کا اعلان کیا ہے۔
صوبائی اطلاعات شرجیل انعام نے واقعہ کی مذمت کرتے ہوئے کہا کہ دہشتگردی میں ملوث ملزمان کو کیفر کردار تک پہنچائیں گے۔
ایم کیوایم کے قائدالطاف حسین نے واقعے کی مذمت کرتے ہوئے یومِ سوگ کا اعلان کردیا۔
الطاف حسین نےکہا کہ دہشتگرد ڈاکٹرز ،پروفیسر ز ، انجینئرز ، علمائےکرام، تاجروں سمیت عام شہریوں کودہشتگردی کا نشانہ بنا رہے ہیں۔
عوامی نیشنل پارٹی سندھ کے صدر نے ردعمل دیتے ہوئے کہا کہ واقعےکی جتنی مذمت کی جائے کم ہے، سانحہ پر جمعرات کو کراچی میں سوگ منایا جائے گا۔
دہشتگردی کے واقعے پر قیمتی جانوں کے نقصان پر مجلس وحدت مسلیمن اور تحفظ عزاداری کونسل نے بھی کل سوگ منانے کا اعلان کیا ہے۔
