لاہور: مسلم لیگ ن کے سینئر رہنما حمزہ شہباز نے کہا ہے کہ یوٹرن حکومت آئی ایم ایف سے قرضہ لینے کی تیاری کررہی ہے، وفاقی کابینہ میں مشرف دور کے لوگ ہیں۔
ان خیالات کا اظہار انہوں نے میڈیا سے گفتگو کرتے ہوئے کیا، حمزہ شہباز کا کہنا تھا کہ عمران خان کہتے تھے ایسی ٹیم لاؤں گا قوم حیران ہوجائے گی، عمران خان قبضہ گروپ کو سینئر وزیر بنا کر واقعی حیران کر دیا۔
شہباز شریف کے صاحبزادے کا مخالفین پر تنقید کرتے ہوئے کہنا تھا کہ وفاقی کابینہ میں مشرف دور کے لوگ موجود ہیں، روز نیا تماشا اور ایک نئی فلم دیکھتے ہیں، حکومت ایک پل بنا کر اس کا نام یوٹرن خان رکھ دے۔
جہاں جاتا ہوں کہا جاتا ہے ہم نے شیر کو ووٹ دیا، حمزہ شہباز
ان کا کہنا تھا کہ کنٹینر پر عمران خان پروٹوکول کے تانے دیتے تھے، لوگوں نے آپ کا پروٹوکول اور 55 روپے لیٹر والا ہیلی کاپٹر بھی دیکھ لیا۔
حمزہ شہباز کا مزید کہنا تھا کہ سابق وزیر اعظم شاہد خاقان عباسی ہر دور میں نواز شریف کے ساتھ کھڑے رہے، 14 اکتوبر کو شاہدخاقان کو کامیاب کرانا ہے، ن لیگ دھاندلی سے پردہ اٹھا کر ہی دم لے گی۔
خیال رہے کہ گذشتہ دنوں حمزہ شہباز نے خطاب کرتے ہوئے کہا تھا کہ ضمنی انتخابات میں شاہد خاقان عباسی کو شان دار کام یابی دلائیں گے، لوگ ہم سے کہہ رہے ہیں کہ انھوں نے شیر کو ووٹ دیا۔
