Tag: Government

اسلام آباد: اسلام آباد چیمبر آف کامرس اینڈ انڈسٹری کے صدر احمد حسن مغل نے کہا کہ وزیراعظم عمران خان نے کنسٹریکشن شعبے کو انڈسٹری کا درجہ دینے کی اصولی طور پر منظوری دے دی ہے جو قابل ستائش اقدام ہے۔

اپنے ایک بیان میں احمد حسن مغل کا کہنا تھا کہ اس سے تعمیراتی شعبے کے مسائل بہتر طور پر حل ہوں گے، اس شعبے کی کاروباری سرگرمیوں میں تیزی آئے گی اور معیشت جلد بحالی کی طرف گامزن ہو سکے گی۔

انہوں نے کہا کہ تعمیراتی شعبہ اقتصادی سرگرمیوں کو فروغ دینے کی بھرپور صلاحیت رکھتا ہے لیکن حکومت نے کچھ ایسے اقدامات اٹھائے تھے جن کی وجہ سے اس شعبے کی ترقی میں اضافہ ہونے کی بجائے کمی واقع ہوئی ہے، جس سے معیشت کو کافی نقصان پہنچا ہے، لہذا اس بات کی اشد ضرورت تھی کہ حکومت کنسٹریکشن شعبے کیلئے سازگارماحول پیدا کرتی۔

انہوں نے اس امید کا اظہار کیا کہ حکومت کی طرف سے تعمیراتی شعبے کو انڈسٹری کا درجہ دینے سے اس شعبے کی بہتر ترقی کیلئے سازگار حالات پیدا ہوں گے جس سے کاروباری اور اقتصادی سرگرمیوں کو بہتر فروغ ملے گا۔

احمد حسن مغل نے کہا کہ بہت سی ذیلی صنعتوں کی ترقی تعمیراتی شعبے کی ترقی سے وابستہ ہے لہذا ضرورت اس بات کی ہے کہ حکومت کنسٹریکشن انڈسٹری کے چیدہ چیدہ مسائل کو ترجیحی بنیادوں پر حل کرنے اور اس کیلئے مزید سازگار پالیسیاں بنائے تاکہ یہ شعبہ بہتر ترقی کرکے معیشت کی ترقی میں فعال کردار ادا کر سکے۔

انہوں نے اس توقع کا اظہار کیا کہ تعمیراتی شعبے کو انڈسٹری کا درجہ دینے سے اس شعبے کے دیرینہ مسائل جلد حل ہوں گے اور معیشت کیلئے فائدہ مند نتائج برآمد ہوں گے۔