کراچی : گورنر سندھ عمران اسماعیل کا کہنا ہے کہ صدر پاکستان کہیں گے تو گورنر راج لگا یا جائے گا لیکن فی الحال ایسا کچھ نہیں ہورہا ، شیخ رشید نے وزیر داخلہ کی حیثیت سے تجویز دی ہے۔
تفصیلات کے مطابق کراچی میں مزار قائد پر حاضری کے بعد میڈیا سے گفتگو میں گورنر سندھ عمران اسماعیل نے کہا کہ ڈاکٹر عارف علوی میرے باس ہیں گورنر راج صدر پاکستان کی ایماء پر لگایا جاتا ہے اگر صدر پاکستان کہیں گے تو لگاؤ گا لیکن ایسا کچھ ہونہیں رہا۔
عمران اسماعیل کا کہنا تھا کہ ایم کیو ایم ، ق لیگ اور بلوچستان عوامی پارٹی اپنا فیصلہ کرنے میں آزاد ہیں، منحرف اراکین نے جو کیا میرے نزدیک وہ غداری ہے ایسی قانون سازی ہونی چاہیے کہ وہ ایسی جرات نہ کریں۔
گورنر سندھ نے کہا کہ مارچ بہت اہم مہینہ رہا او آئی سی کا بہت بڑا ڈیلیگیشن پاکستان آیا ہوا ہے، اسکوائش مقابلے ہوئے ، آسٹریلیا ٹیم پاکستان آئی ہوئی ہے، ہماری سیکورٹی ٹیم نے بہت اچھی سیکورٹی دی۔
کشمیریوں کے حوالے سے ان کا کہنا تھا کہ ہم آج کے دن کشمیری بھائیوں کو بھی نہیں بھولتے وہاں غیر انسانی سلوک روا رکھا جا رہا ہے دنیا کی آنکھیں بند ہیں ہماری خواہش ہے کہ دنیا ادھر بھی دیکھے۔
