کراچی(9 اگست 2025): گورنرسندھ کامران ٹیسوری نے کہا ہے کہ زائرین کیلئے راستہ سیکیورٹی وجوہات پر عارضی طور پر بند کیا گیا ہے۔
تفصیلات کے مطابق گورنرسندھ کامران ٹیسوری نے ایم ڈبلیو ایم کے رہنماؤں سے ملاقات کے بعد کہا زائرین کیلئے راستہ سیکیورٹی وجوہات پر عارضی طور پر بند کیا گیا ہے۔
انہوں نے کہا کہ زائرین کیلئے راستے مستقل بنیادوں پر راستہ بند کرنےکی کوئی بات نہیں ہوئی، میری درخواست پر مارچ کو موخر کیا جس پر شکریہ ادا کرتا ہوں۔
گورنرسندھ کامران ٹیسوری نے مزید کہا کہ کمیٹی بنائی گئی ہے جو ایئر ٹکٹس اور دیگر معاملات پر کام کر رہی ہے، آئندہ اڑتالیس گھنٹے میں کمیٹی کے نتائج آنا شروع ہوجائیں گے۔
دوسری جانب گورنر سندھ کامران خان ٹیسوری نے اورنگی ٹاؤن میں معرکہ حق جشن آزادی تقریب سے خطاب میں کہا ہے کہ معصوم شہریوں کا خون بہانے والے درندے رعایت کے مستحق نہیں، ژوب میں 33 دہشتگرد ہلاک کرنے پر پاک فوج کو خراجِ تحسین ییش کرتا ہوں۔
انہوں نے کہا کہ پاکستان بنایا تھا پاکستان بچائیں گے، جب کمانا ہو، ووٹ چاہیے ہو تو مائی کراچی، لیکن جب اسکول، کالج، پانی چاہیے ہو تو کہا جاتا ہے وائی کراچی، ہم نے عزم کیا ہے اس شہر کو انصاف دلائیں گے۔
