کراچی : گورنر سندھ محمد زبیر نے کہا ہے کہ ملک میں امن و امان بہتر بنانے میں قانون نافذ کرنے والے اداروں کے اہلکاروں نے لازوال قربانیاں دی ہیں، آپریشن ضرب عضب اور رد الفساد کے باعث دہشت گردوں کی کمر ٹوٹ چکی ہے۔
ان خیالات کا اظہار انہوں نے کراچی میں مزار قائد پر پاکستان موٹر ریلی کی تقریب میں شرکت اور شرکاء سے خطاب کرتے ہوئے کیا۔
اس موقع پر وزیر اعلیٰ سندھ سید مراد علی شاہ اور کور کمانڈر فائیو کور لیفٹیننٹ جنرل شاہد بیگ مرزا بھی موجود تھے، مہمانوں نے تقریب سے قبل بابائے قوم کے مزار پر حاضری پر فاتحہ خوانی اور پھولوں کی چادر چڑھائی۔
گورنر سندھ نے کہا کہ یہ قیام پاکستان کی70ویں سالگرہ کے سلسلے کی سب سے متاثر کن تقریب ہے۔ اس ریلی کے انعقاد سے امن کا پیغام عام اور قومی یکجہتی میں اضافہ ہوگا۔
ان کا مزید کہنا تھا کہ دہشت گردی کے خلاف جنگ میں پاکستان نے ہراول دستہ کا کردار ادا کیا ہے، پوری قوم سیسہ پلائی ہوئی دیوار کی طرح اپنی مسلح افواج کے ساتھ کھڑی ہے، تمام مشکلات، دشواریوں اور دشمنوں کی سازشوں نے پاکستانی قوم کو متحد اور منظم کیا۔
گورنر سندھ نے کہا کہ اس طرح کے قومی ایوینٹس اس بات کا ثبوت ہیں کہ ہم نے اپنے دشمنوں کے ناپاک عزائم کو ناکام بنا دیا ہے۔ میں اس موقع پر عالمی برادری کا بھی مشکور ہوں جس نے دہشت گردی کے خلاف جنگ میں پاکستان کے کردار کو سراہا۔
مزید پڑھیں: پاکستان موٹرریلی رواں دواں، تصاویر اور ویڈیودیکھیں
واضح رہے کہ پاکستان موٹر ریلی21اکتوبر کو پاک چین سرحدی مقام خنجراب سے شروع ہوئی تھی اور گوادر پر اختتام پذیر ہوگی، ریلی میں 300 کاریں اور150موٹر سائیکل سوار شرکت کر رہے ہیں۔
کار اینڈ بائکس ریلی 29اکتوبر کوکراچی پہنچے گی۔ ریلی کے شرکاء تین ہزار کلو میٹر کا فاصلہ طے کریں گے، ریلی گوادر پہنچ کر اختتام پذیر ہوگی۔
تقریب میں معروف فنکاروں نے ملی نغمے پیش کئے، اس موقع پر تھری ڈی پروجیکشن کا بھی شاندار مظاہرہ کیا گیا۔
