ARYNews.tv | Urdu – Har Lamha Bakhabar

Tag: GRAND OPERATION

  • کراچی میں تجاوزات کے خلاف گرینڈ آپریشن کرنے کا فیصلہ

    کراچی میں تجاوزات کے خلاف گرینڈ آپریشن کرنے کا فیصلہ

    کراچی: وزیرِ بلدیات سندھ سعید غنی نے کہا ہے کہ کراچی میں تجاوزات کے خلاف گرینڈ آپریشن بلاتفریق جلد شروع ہوگا۔

    تفصیلات کے مطابق وزیرِ بلدیات سندھ سعید غنی کی زیر صدارت سہراب گوٹھ ٹاؤن میں درپیش مسائل سے متعلق اجلاس ہوا جس میں تجاوزات، برساتی نالے سمیت دیگر مسائل کے حوالے سے تفصیلی گفتگو کی گئی۔

    اس اجلاس میں ایڈیشنل چیف سیکرٹری سندھ سید خالد حیدر شاہ، ٹاؤن چیئرمین لالہ رحیم، ڈپٹی کمشنر اور دیگر متعلقہ حکام نے شرکت کی۔

    اس موقعے پر سعید غنی نے کہا کہ علاقے کے عوام کو ریلیف فراہم کیلئے لائحہ عمل ترتیب دیا جائے، ڈی سی ایسٹ ٹاؤن انتظامیہ اور پولیس کی مدد سے لائحہ عمل مرتب کریں، برساتی نالے اور سیوریج کے حوالے سے ٹاؤن انتظامیہ اقدامات کو یقینی بنائے۔

    سعید غنی کا کہنا تھا کہ کسی جگہ سندھ حکومت کی مدد درکار ہوئی تو فراہم کریں گے، تمام ٹاؤنز میں تجاوزات خاتمے، نکاسی نظام کی درستگی کی کوشش کررہے ہیں، تجاوزات خاتمےکیلئے تمام اسٹیک ہولڈرز کو آن بورڈ لیا جائے گا جلد کراچی میں تجاوزات کے خلاف گرینڈ آپریشن شروع ہوگا۔

  • جنوبی پنجاب میں ہزاروں ایکڑ زمین قبضہ مافیا سے چھڑا لی گئی

    جنوبی پنجاب میں ہزاروں ایکڑ زمین قبضہ مافیا سے چھڑا لی گئی

    لاہور: وزیر اعظم عمران خان کی ہدایت پر جنوبی پنجاب میں ہزاروں ایکڑ سرکاری زمین قبضہ مافیا سے چھڑا کر پارکس اور ریزرو میں بدل دی گئی۔

    تفصیلات کے مطابق وزیر اعظم عمران خان کے سرکاری اراضی پر قبضے خالی کروانے کے مشن کے تحت، جنوبی پنجاب میں قبضہ مافیا کے خلاف کامیاب گرینڈ آپریشن کیا گیا۔

    مظفر گڑھ اور تونسہ شریف میں ہزاروِں ایکڑ سرکاری اراضی قبضہ مافیا سے واگزار کروا لی گئی۔

    مظفر گڑھ میں 30 ہزار ایکڑ سرکاری اراضی واپس لی گئی، خالی کروائی گئی اراضی جزیروں، شکار گاہوں اور جنگلات پر مشتمل ہے۔ بااثر افراد نے سرکاری زمینوں پر کئی سال سے قبضہ جما کر ذاتی شکار گاہیں بنا رکھی تھیں۔

    مذکورہ زمین کو خان پور وائلڈ لائف پارک میں بدل دیا گیا، خان پور وائلڈ لائف پارک اب 30 ہزار ایکڑ پر محیط ہوگا، وائلڈ لائف پارک کی حفاظت کے لیے مقامی نگہبان بھی بھرتی کیے جائیں گے۔

    توسنہ میں 7 ہزار ایکڑ اراضی واپس لے کر تونسہ بلائنڈ ڈولفن ریزرو بنا دیا گیا، 7 ہزار ایکڑ شامل ہونے سے تونسہ بلائنڈ ڈولفن ریزرو کا مجموعی علاقہ 61 ہزار ایکڑ ہوگیا۔ بااثر افراد نے لاشاری جنگل میں 7 ہزار ایکڑ پر مشتمل جزیرے کو نو گو ایریا بنا رکھا تھا۔

    مذکورہ آپریشن میں ضلعی انتظامیہ، مقامی پولیس، ممحکمہ جنگلی حیات اور وفاقی محکموں کی مدد لی گئی۔

    اس موقع پر وزیرِ اعظم عمران خان کے معاون خصوصی موسمیاتی تبدیلی ملک امین اسلم اور وزیر مملکت برائے ہاؤسنگ شبیر قریشی بھی وہاں پہنچے۔

    معاون خصوصی ملک امین اسلم نے آپریشن کا جائزہ لیا اور ضروری ہدایات جاری کیں، دونوں وزرا نے جزیرے کا بھی جائزہ لیا۔ وہاں موجود غیر قانونی ہٹس، فارم ہاؤسز اور رہائش گاہیں بھی حکومت نے اپنی تحویل میں لے لیں۔

    پنجاب اور وفاقی حکومت نے سرکاری زمین کو شہریوں کی فلاح کے لیے مختص کردیا ہے، ہٹس اور رہائشی کمروں کو فاریسٹ ڈپارٹمنٹ کی چوکیوں میں تبدیل کردیا گیا۔

    معاون خصوصی ملک امین اسلم کا کہنا ہے کہ واگزار زمین پر کوئی قبضہ نہیں کر سکے گا۔

  • کراچی، تجاوزات کے خلاف گرینڈ آپریشن، 63 بازاروں میں 9 ہزاردکانیں گرانے کی تیاری مکمل

    کراچی، تجاوزات کے خلاف گرینڈ آپریشن، 63 بازاروں میں 9 ہزاردکانیں گرانے کی تیاری مکمل

    کراچی: شہر قائد میں تجاوزات کے خلاف جاری گرینڈ آپریشن میں مزید تیزی لانے کا فیصلہ کیا گیا ہے.

    تفصیلات کے مطابق ایمپریس مارکیٹ کے اطراف کی تجاوزات کے خاتمے کے بعد انتظامیہ نے دیگر علاقوں‌ میں‌ کارروائی شروع کر دی، گلشن اقبال اور بزنس روڈ کی فوڈ اسٹریٹس میں غیرقانونی تعمیرات اور فٹ پاتھ پر قائم ریسٹورنٹس کو نشانہ بنایا گیا.

    صدر، اولڈ سٹی ایریا میں بھی بھاری مشینری سے سائن بورڈز، سن شیڈز گرا دیے گئے۔ کارروائی سے بچنے کے لیے دکان داروں نے بورڈ خود ہٹانا شروع کردیے.

    موصولہ اطلاعات کے مطابق مزید 63 بازاروں میں 9 ہزاردکانیں گرانے کی تیاری مکمل کر لی گئی، جس پر پیر سے شروع ہوجائے گا.

     اگلے مرحلے میں شاہراہوں کے اطراف میں‌ موجود غیر قانونی تعمیرات مسمار کی جائیں‌ گی، ایم اے جناح روڈ، سولجر بازار، لیمارکیٹ سے تجاوزات کا خاتمہ ہوگا. کھوڑی گارڈن سمیت دیگر شاہراوں سے بھی تجاوزارت ختم کرنے کا فیصلہ کیا گیا ہے.

    مزید پڑھیں: سپریم کورٹ کا کراچی سرکلرریلوے کے راستے سے تجاوزات ہٹانے کا حکم

    کے ایم سی کی جانب سے عدالت میں جمع رپورٹ کے مطابق انتظامیہ اب تک 1204 غیرقانونی دکانیں مسمارکرچکی ہے،  آرام باغ میں 300، لائٹ ہاؤس میں 450، جامع کلاتھ دوپٹہ گلی میں 250 دکانیں مسمار کی گئیں، ریمبو سینٹر سے اسٹوڈنٹ بریانی تک 122غیرقانونی دکانیں گرائی گئیں.

    رپورٹ کے مطابق 1204غیر قانونی دکانیں 16نومبرسے 21 نومبر کے درمیان مسمار کی گئیں، تجاوزات کے خاتمے کے لئے انتظامیہ کو پولیس اور رینجرزکی مکمل معاونت حاصل رہی.

  • ایمپریس مارکیٹ اور داؤد پوتہ روڈ پر 2500 غیر قانونی دکانیں مسمار: رپورٹ

    ایمپریس مارکیٹ اور داؤد پوتہ روڈ پر 2500 غیر قانونی دکانیں مسمار: رپورٹ

    کراچی: صوبہ سندھ کے شہر کراچی میں تجاوزات کے خلاف آپریشن میں ایمپریس مارکیٹ اور داؤد پوتہ روڈ پر 2500 غیر قانونی دکانیں اور2 منزلہ عمارت مسمار کی گئی۔ حکام نے سپریم کورٹ میں پیش کرنے کے لیے عملدر آمد رپورٹ تیار کرلی۔

    تفصیلات کے مطابق کراچی میٹرو پولیشن کارپوریشن نے سپریم کورٹ کے احکامات پر عملدر آمد رپورٹ تیار کرلی۔ 5 سے 15 نومبر تک کراچی میں کیے جانے والے گرینڈ آپریشن کی رپورٹ کمشنر کراچی کو ارسال کردی گئی۔

    رپورٹ کے ساتھ آپریشن کے بعد کی تصاویر بھی پیش کی گئی ہیں۔

    رپورٹ میں کہا گیا کہ ایمپریس مارکیٹ اور داؤد پوتہ روڈ پر 2500 غیر قانونی دکانیں مسمار کی گئیں۔ ایمپریس مارکیٹ کی بحالی کے لیے 6 آر سی سی بیسمنٹ اور 2 منزلہ عمارت بھی مسمار کردی گئی۔

    رپورٹ میں کہا گیا کہ سہراب خٹک روڈ پر 480 غیر قانونی دکانیں مسمار کی گئیں، سرمد شہید روڈ پر 150 تجاوزات، شارع عراق پر 450 ٹھیلے ہٹائے گئے جبکہ اکبر روڈ اور ملحقہ علاقے میں 7500 سن شیڈز توڑے گئے۔

    مزید پڑھیں: 50 سال بعد ایمپریس مارکیٹ کی دھلائی

    علاوہ ازیں کراچی کے دیگر علاقوں زیب النسا اسٹریٹ، میگزین لائن، عبداللہ ہارون روڈ، راجہ غضنفر علی روڈ اور میر کرم علی ٹالپر روڈ پر بھی تجاوزات مسمار کی گئیں۔

    رپورٹ میں کہا گیا کہ دیگر 6 اضلاع میں بھی تجاوزات کے خلاف کارروائی جاری ہے۔

    خیال رہے کہ سپریم کورٹ نے ٹریفک جام اور بدامنی کا باعث بننے والی تجاوزات کا 15 روز میں خاتمے کا حکم دیا تھا جس کے بعد کراچی کی مقامی انتظامیہ نے گرینڈ آپریشن شروع کیا۔

    آپریشن میں کراچی کی تاریخی ایمپریس مارکیٹ میں بھی کارروائی کی گئی جہاں غیر قانونی دکانوں اور تعمیرات نے اس تاریخی عمارت کے حسن کو گہنا دیا تھا۔

  • غیرقانونی فوڈ اسٹریٹ کیخلاف بھی گرینڈ آپریشن جلد کیا جائے گا، وسیم اختر

    غیرقانونی فوڈ اسٹریٹ کیخلاف بھی گرینڈ آپریشن جلد کیا جائے گا، وسیم اختر

    کراچی : میئر کراچی وسیم اختر نے کہا ہے کہ شہر میں تجاوزات کیخلاف کارروائی کے دوران کراچی میں مختلف مقامات پر قائم غیر قانونی فوڈ اسٹریٹس کیخلاف بھی گرینڈ آپریشن کیا جائے گا۔

    یہ بات انہوں نے کراچی کے پوش علاقے خالد بن ولید روڈ پر قائم درجنوں غیرقانونی تجاوزات کیخلاف آپریشن کے موقع پر میڈیا سے گفتگو کرتے ہوئے کہی۔

    وسیم اختر نے کہا کہ خالد بن ولید روڈ پر پارکنگ کے غیر قانونی ریمپس، سائن بورڈز سمیت تجاوزات کو ہٹا دیا گیا ہے، عدالتی احکامات پر عمل کرتے ہوئے تجاوزات ختم کرائیں گے، ہمارا کوئی سیاسی مقصد نہیں اور نہ ہی کسی قسم کا دباؤ برداشت کریں گے۔

    مزید پڑھیں : جہاں سے دکانیں ختم کرائیں ہیں وہاں پارک بنائیں گے‘ وسیم اختر

    واضح رہے کہ میئر کراچی وسیم اختر نے شہر قائد کے دیگر علاقوں میں بھی تجاوزات کیخلاف آپریشن کی ہدایت جاری کردی ہے، یوپی موڑ کے اطراف دکانوں کے باہر بورڈز اور شیڈ اتارنا شروع کردئیے گئے ہیں۔

  • ملتان میں تجاوزات کیخلاف کارروائی، دس ارب روپے کی سرکاری اراضی واگزار

    ملتان میں تجاوزات کیخلاف کارروائی، دس ارب روپے کی سرکاری اراضی واگزار

    ملتان : پنجاب حکومت کی ہدایت پر ملتان ضلعی انتظامیہ نے دس ارب روپے سے زائد مالیت کی 52 کنال سے زائد سرکاری اراضی واگزار کرالی۔

    تفصیلات کے مطابق وزیرِاعلیٰ پنجاب سردار عثمان بزدار کی ہدایات پر پورے صوبے میں قبضہ مافیا اور تجاوزات کے خلاف آپریشن کا سلسلہ جاری ہے، اس سلسلے میں ملتان میں تجاوزات کیخلاف گرینڈ آپریشن کیاگیا۔

    ملتان میں ضلعی انتظامیہ نے شہر کے وسط میں قائم ملتان کرکٹ کلب کی 52 کنال سے زائد سرکاری اراضی واگزار کرالی ہے جس کی مالیت دس ارب روپے سے بھی زائد ہے۔

    ڈی سی ملتان مدثر ریاض ملک نے بتایا کہ کرکٹ کلب میں بنائے گئے جم کو بھی خالی کرالیا گیاہے جہاں سے ممنوعہ ادویات بھی برآمد ہوئیں ہیں، اس موقع پر میڈیا سے گفتگو کرتے ہوئے کرکٹ کلب کے کپتان جاوید نے آپریشن کو غیر قانونی قرار دیا۔

    ضلعی انتظامیہ کے مطابق وزیراعلیٰ پنجاب کی ہدایت پر بلا تفریق کاروائیوں کا سلسلہ جاری رہے گا۔اس سے قبل

    مزید پڑھیں : ملتان ، تجاوزات کیخلاف آپریشن، بیس کروڑ روپے مالیت کی سرکاری زمین واگزار

    یاد رہے کہ وزیرِاعلیٰ پنجاب سردار عثمان بزدار نے انتظامیہ کو قبضہ مافیا کے خلاف آپریشن ایک ماہ میں مکمل کرنے کا ٹاسک دیا ہے، انہوں نے سختی سے ہدایات جاری کی ہیں کہ ہر صورت قبضہ مافیا کے خلاف آپریشن کو ایک ماہ میں مکمل کیا جائے۔

  • نکاسی آب میں رکاوٹ : گجرنالے پر قائم مکانات اورباڑے مسمار

    نکاسی آب میں رکاوٹ : گجرنالے پر قائم مکانات اورباڑے مسمار

    کراچی : گجرنالے پر قائم تجاوزات کے خلاف گرینڈ آپریشن کا آغاز ہوگیا۔ انتظامیہ نے مکینوں کو گھرخالی کرنے کے لیے دو دن کی مہلت دے دی۔

    تفصیلات کے مطابق نکاسی آب میں رکاوٹیں درد سربن گئیں، کراچی میں گجر نالے پر تجاوزات کے خلاف گرینڈ آپریشن کے دوران نالے کے اطراف متعدد مکانات اور باڑے گرا دیئے گئے۔

    امکان ہے کہ دس ہزار سے زائد گھر آپریشن کی زد میں آئیں گے۔ گرینڈ آپریشن کے لئے ہیوی مشینری کو گجر نالے میں اتار دیا گیا۔

    ڈی سی سینٹرل فرید الدین مصطفیٰ کا کہنا ہے کہ نالے کو ساٹھ فٹ چوڑا کیا جائے گا، جس میں چھ مہینے لگیں گے، انہوں نے کہا کہ مذکورہ آپریشن وزیر بلدیات جام خان شورو کے احکامات پر کیا جا رہا ہے۔

    نالے پر تیس ہزار غیر قانونی گھرتعمیر ہیں جن میں سے دس ہزار سے زائد مکانات آپریشن کی زد میں آنے کا امکان ہے، انتظامیہ کے مطابق مکینوں کو گھر خالی کرنے کے لیے پیر تک کی مہلت دی گئی ہے۔

     

  • پشاور: ایئر پورٹ کے اطراف میں گرینڈ آپریشن

    پشاور: ایئر پورٹ کے اطراف میں گرینڈ آپریشن

    پشاور: باچا خان ایئرپورٹ کے اطراف سرچ آپریشن کے دوران افغان باشندوں سمیت سو سے زائد مشتبہ افراد حراست میں لے لئے گئے جبکہ مشتبہ افراد سے اسلحہ بھی برآمد ہوا۔

    ملک بھر میں قانون نافذ کرنے والے ادارے دہشتگردوں کیخلاف ایکشن میں دکھائی دیتے ہیں، ذرائع کے مطابق پشاور میں باچا خان ایئرپورٹ اور ملحق حساس مقامات کو دھمکیاں ملنے کے بعد پشاور باچا خان ایئر پورٹ کے اطراف میں پولیس فورس کے ساتھ پاک فوج کا مشترکہ آپریشن کیا گیا۔

    ایس ایس پی آپریشنز پشاور ڈاکٹر میاں سید کے مطابق آپریشن صبح 6 بجے شروع کیا گیا، سرچ آپریشن ایئر پورٹ کے اطراف کے علاقوں پشتہ خررہ، پاو کہ، سیفد ڈھیری اور ملحقہ باونڈی ایریا میں کیا گیا، کارروائی کے دوران علاقے کی مکمل ناکہ بندی کی گئی تھی۔

    آپریشن میں بم ڈسپوزل یونٹ سمیت سراغ رساں کتوں کی مدد بھی کی گئی، گھر گھر تلاشی کے دوران 228 مشتہ افراد کو حراست میں لیا گیا ہے، جن میں زیادہ تر تعداد غیر قانونی طور پر مقیم افغان مہاجرین کی ہے۔

    گرفتار افراد کے قبضے سے کلاشنکوف، پستول، ایم 16 گن اور سینکڑوں کارتوس بھی برآمد ہوئے۔

    یاد رہے کہ سانحہ پشاور کے بعد شہر میں دہشتگردوں کے گرد شکنجہ کس دیا گیا ہے، اب تک دہشتگردی کی کئی کارروائیاں ناکام بنائی گئیں جبکہ درجنوں دہشتگردوں کو گرفتار کیا گیا ہے۔

  • میرپور خاص: مقابلے کے دوران 4ڈاکو ہلاک، 5اہلکار شہید

    میرپور خاص: مقابلے کے دوران 4ڈاکو ہلاک، 5اہلکار شہید

    میرپورخاص: محمود آباد میں رات گئے ہونے والے مقابلے میں بدنام زمانہ ڈاکو چھوٹو ناریجو سمیت چار ڈاکو مارے گئے جبکہ مقابلے میں دو تھانیداروں سمیت پانچ اہلکار بھی شہید ہوئے۔

    میر پور خاص میں بدنام زمانہ ڈاکو چھوٹو سے پولیس کا بڑا مقابلہ ہوا، رات گئے میر پور خاص کا علاقہ محمود آباد گولیوں کی تڑ تڑاہٹ سے گونج اٹھا، علاقے میں چھوٹو ناریجو اور اس کے ساتھیوں کیخلاف پولیس نے گرینڈ ایکشن لانچ کیا۔

    مقابلے میں چار سو سے زائد پولیس اہلکاروں نے حصہ لیا، کئی گھنٹوں تک جاری رہنے والے مقابلے میں چھوٹو ناریجو سمیت چار ڈاکو ہلاک ہوئے جبکہ دو تھانیداروں سمیت پانچ پولیس اہلکار بھی شہید ہوگئے۔

    ڈی آئی جی ثناءاللہ عباسی کا کہنا تھا کہ چھوٹو ناریجو کے سر کی قیمت دس لاکھ روپے مقرر تھی، مارے گئے ڈاکو پورے سندھ میں دہشت کی علامت تھے، پولیس نے مارے گئے ڈاکوؤں کے گھر سے پندرہ سالہ لڑکا اور دو خواتین کو حراست میں لیا ہے۔

    جن کا تعلق ڈاکوؤں کے خاندان سے بتایا جاتا ہے، مقابلے میں شہید اور زخمی ہونے والے پولیس اہلکاروں کو حیدرآباد منتقل کردیا گیا ہے۔

  • نواز شریف کا استعفیٰ لئے بغیرنہیں جاؤں گا،عمران خان

    نواز شریف کا استعفیٰ لئے بغیرنہیں جاؤں گا،عمران خان

    اسلام آباد:تحریک انصاف کے چئیرمین عمران خان نےکہا ہےکہ وہ نوازشریف کا استعفیٰ لئے بغیر نہیں جائیں گے،نواز شریف نےفوج کوبدنام کرنےکی کوشش کی،جسٹس ناصر الملک کو انکا جج کہنا ناانصافی ہے۔

    بنی گالہ میں کچھ دیرآرام کرنےکےبعد عمران خان واپس دھرنےمیں پہنچ گئے،دھرنے کے شرکا سےخطاب میں عمران خان کا کہنا تھا کہ 18دنوں میں پاکستان بہت بدل گیا ہے،قوم جاگ چکی ہے۔.

    عمران خان کا کہنا تھا کہ جب انہیں معلوم ہوا کہ آج رات کریک ڈاؤن ہوسکتا ہے تو وہ کارکنوں میں واپس آگئے۔

    انہوں نے کہاکہ نوازشریف نےغیرقانونی کام نہ کرنےپرتین آئی جی تبدیل کردیے،جیو نیوز پرفوج کو بدنام کیا جارہا ہے۔

    انکا کہنا تھا کہ حکمرانوں نےکسی کونہیں چھوڑا،میڈیاپر بھی تشدد کیا،میڈیا کے لوگوں کو مارنا جمہوریت نہیں،آبپارہ تھانےمیں گرفتارکارکن چھوڑےنہیں گئےتوتھانےکا گھیرائو کرینگے،لیکن ہمیں ہرحال میں پرامن رہناہے،دشمنوں کو موقع نہیں دینا چاہتے۔