لاہور : وزیراعلیٰ پنجاب عثمان بزدار کا کہنا ہے کہ پاکستان اور ترکی کے عوام کے دل ایک ساتھ دھڑکتے ہیں، پاکستان کےعوام ترک قوم کی طرح پاکستان کو عظیم ملک بنائیں گے۔
تفصیلات کے مطابق وزیراعلیٰ پنجاب عثمان بزدار نے ترکی کےقومی دن کی مناسبت سے ترک عوام اور حکومت کو مبارکباد دیتے ہوئے کہا پاکستان اور ترکی میں باہمی احترام کا مضبوط رشتہ موجودہے، پاکستان اور ترکی کے عوام کے دل ایک ساتھ دھڑکتے ہیں۔
عثمان بزدار کا کہنا تھا کہ ہر گزرتے لمحے پاکستان اور ترکی کی دوستی مضبوط تر ہو رہی ہے، ترک صدر نے محنت کےساتھ اپنے عوام کی بے لوث خدمت کی ہے۔
وزیراعلیٰ پنجاب نے کہا کہ پاکستان کے عوام ترک قوم کی طرح پاکستان کو عظیم ملک بنائیں گے، ترکی کی حکومت اور عوام نےعالمی سطح پر پاکستان کے موقف کی تائید کی ہے۔
یاد رہے پاکستان کے سربراہ مملکت ڈاکٹر عارف علوی نے ترکی کے یوم جمہوریہ کے موقع پر ترک صدر طیب اردوگان اور عوام کو مبارک باد کے پیغام میں ترکی سے اظہار یکجہتی کیا۔
صدر مملکت ڈاکٹر عارف علوی کا کہنا تھا کہ ترکی کا بھائی اور گہرے دوست کی مانند احترام کرتے ہیں، آج کا پر وقار دن ترکی اور ترک عوام کی ترقی اور خوشحالی پر گامزن ہونے کا دن ہے۔
دوسری جانب پاکستان کے وزیر اعظم عمران خان نے بھی ترکی کے یوم جمہوریہ پر ترک عوام و طیب اردوگان کو ہدیہ تبریک پیش کرتے ہوئے کہا تھا کہ پاکستان اور ترکی کی دوستی بے مثال اور کامیاب رہی۔
وزیر اعظم پاکستان نے اپنے پیغام میں کہا تھا کہ ترک قوم بھی ہر مشکل اور چیلنج میں ہمارے شانہ بشانہ رہے، باہمی تعاون کی میراث تاریخی، مذہبی اور ثقافتی اعتبار سے گہری ہے، پاکستان اور ترکی نے مشترکا طور پر کئی محاذوں پر اکٹھے کام کیا ہے
