گوجرانوالہ : وزیر اعظم کے مشیر انجینئر امیر مقام نے کہا ہے کہ عمران خان ملکی مفاد کا خیال نہیں کرتے اس لیے وہ وزیر اعظم نہیں بن سکتے ،انہوں نے غیر ملکی کھلاڑیوں کو پھٹیچر کہہ کر ملک کا بھی خیال نہیں کیا، دہشت گردی کی جنگ میں پختون سب سے ذیادہ متاثرہ ہوئے۔
ان خیالات کا اظہار انجینئرامیر مقام نے گوجرانوالہ میں پختون کنونشن سے خطاب کرتے ہوئے کیا، ان کا کہنا تھا کہ پی ٹی آئی کے چیئرمین عمران خان ملکی مفاد کا خیال نہیں کرتے وہ کس طرح وزیر اعظم بن سکتے ہیں انہوں نے کہا کہ عمران خان نے پی ایس ایل کے لاہور میں فائنل کی سخت مخالفت کی اور جب فائنل ہو گیا تو غیر ملکی کھلاڑیوں کو پھٹیچر کہہ دیا، ان کی یہ باتیں ملکی مفاد کے خلاف ہیں۔
انہوں نے کہا کہ جب بھی پاکستان پر مشکل وقت آیا پختونوں نے اس کا مل کر مقابلہ کیا، دہشت گردی کی جنگ میں سب سے ذیادہ نقصان پختونوں کا ہوا، پختون اپنے گھر چھوڑ کر آئی ڈی پیز بن گئے۔
امیر مقام کا کہنا تھا کہ نواز شریف ایک قوم یا ایک صوبے کے نہیں بلکہ پورے ملک کے وزیر اعظم ہیں اور ان کی سربراہی میں ملک ترقی کی منازل طے کررہا ہے اورجو لوگ قومیتوں کو لڑانے آتے ہیں وہ ظلم کر رہے ہیں اور کچھ لوگ عوام کو بھڑکا کراپنی سیاست چمکا رہے ہیں۔
امیر مقام نے کہا کہ وزیراعلیٰ پنجاب میاں شہباز شریف اور رانا ثنا ء اللہ کو پنجاب میں پختونوں کی مشکلات سے آگاہ کیا ہے اور کہا ہے کہ جب بھی کسی گھر کی تلاشی لی جائے گی تو اس میں لیڈی اہلکاروں کو لازمی ساتھ رکھا جائے گا۔
انہوں نے کہا کہ پورے ملک میں پختونوں کے شناختی کارڈ اور پاسپورٹ کا مسئلہ ہے اور ہم تمام مسائل کے حل تک پختونوں کے ساتھ کھڑے ہیں، قبل ازیں مشیر وزیراعظم انجیبئر امیر مقام نے سرکٹ ہاؤس میں پختونوں کے مسائل کے حوالے سے پولیس کے اعلیٰ افسران اور انتظامیہ کے نمائندوں سے بھی ملاقات کی۔
