Tag: gujranwala

گوجرانوالا: جائیداد کے تنازعہ پر سنگ دل دیور نے بھابھی اور اس کے پانچ بچوں کو کرنٹ لگا دیا، کرنٹ لگنے سے تین بچے جاں بحق جبکہ ماں اور دو بچے زخمی ہوگئے، جنہیں تشویشناک حالت کے پیش نظر ہسپتال منتقل کردیا گیا، وزیراعلی پنجاب شہباز شریف نے واقعہ کا نوٹس لے لیا۔

گوجرانوالا کے تھانہ صدر کامونکے کے نواحی گاؤں راجہ میں جائیداد کے تنازعہ پر بھائی نے اپنے ہی بھائی کے گھر قیامت ڈھادی، بھائی نے بھابھی اوراُس کے پانچ بچوں کو کرنٹ لگادیا ،کرنٹ کی شدت سے تین معصوم بچے موقع پردم توڑ گئے جبکہ ماں اوردو بچے زخمی ہوگئے۔

زرائع کے مطابق سنگدل ملزم رمضان جوکہ بچوں کا تایا بتایا جاتاہے نے اپنے کمسن بھتیجوں چار سالہ طیب ،سات سالہ ایمان فاطمہ ،پانچ سالہ مہک ،دوسالہ حسن اور نو سالہ منزہ اورا ن کی والدہ سکینہ بی بی کوسحری کے وقت نشہ آور چیز کھلا کر لوہے کی چارپائیوں کے ساتھ باندھ دیا اور بعدازاں بجلی کے ننگے تارلگا کر کرنٹ لگا   دیا، جس کے نتیجہ میں چار سالہ طیب ،سات سالہ ایمان فاطمہ اور پانچ سالہ مہک موقع پر ہلاک ہو گئے جبکہ دوسالہ حسن اور نو سالہ منزہ اور ان کی والدہ سکینہ بی بی کوتشویشناک حالت میں مرید کے ہسپتال منتقل کردیا گیا ہے، تھانہ صدر کامونکی پولیس نے مقدمہ درج کرکے تحقیقات شروع کردی ہیں۔

وزیر اعلیٰ پنجاب شہباز شریف نے واقعہ کا نوٹس لیتے ہوئے آرپی او گوجرانوالہ سے رپورٹ طلب کرلی اور ملزم کے خلاف سخت قانونی کارروائی کی ہدایت کی ہے۔ شہباز شریف نے کہا کہ زخمی خاتون اور بچوں کو ہسپتال میں علاج معالجہ کی بہترین سہولتیں فراہم کی جائیں۔