ARYNews.tv | Urdu – Har Lamha Bakhabar

Tag: Gun

  • عمان کے سلطان کے پاس دنیا کی مہنگی ترین بندوق

    عمان کے سلطان کے پاس دنیا کی مہنگی ترین بندوق

    عمان کے سلطان قابوس کے زیر استعمال رہنے والی قدیم بندوق کی تصاویر سوشل میڈیا پر وائرل ہیں، قدیم بندوق پر سابق عمانی سلطان قابوس کی تصویرنقش ہے۔

    عمانی سلطان قابوس بن سعید بن تیمور کی بندوق معروف سویڈش کمپنی ووفابن کی تیار کردہ ہے، کہا جارہا ہے کہ یہ دنیا کی مہنگی ترین بندوق ہے۔

    سویڈش کمپنی 1977 میں قائم کی گئی تھی جو راویتی بندوقیں بنانے میں عالمی شہرت کی حامل ہے، کمپنی کی تیارکردہ بندوقوں کے بارے میں کہا گیا ہے کہ یہ ہاتھ سے بنائی جاتی ہیں جن میں کسی قسم کا مشینی عمل دخل نہیں ہوتا اسی لیے اس کی قیمت عام بندوقوں سے بہت زیادہ ہوتی ہے۔

    سابق عمانی سلطان قابوس کی بندوق کی قیمت کا تخمینہ اس وقت 9 لاکھ 80 ہزار ڈالر لگایا گیا ہے، بندوق پر سلطان قابوس کی تصویر نقش ہے جس کی وجہ سے اس کی قیمت میں اضافہ ہوگیا۔

    سویڈش کمپنی انتہائی محدود پیمانے پر بندوقیں بنانے کے آرڈر لیتی ہے، کمپنی کی خاصیت یہ ہے کہ ایک آرڈر مکمل ہونے کے بعد دوسرا آرڈر لیا جاتا ہے۔

    کمپنی کی جانب سے متعدد عالمی رہنماؤں کے لیے بندوقیں تیار کی گئی ہیں جن میں سلطان قابوس، شیخ زاید ،شیخ محمد بن زاید، شیخ محمد بن راشد، شیخ حمد بن محمد بن راشد شامل ہیں۔

    سویڈش کمپنی نے سلطان قابوس کے انتقال کے بعد اپنے انسٹاگرام پیج پر بندوق کی تصاویر اپ لوڈ کی ہیں تاہم بندوق کے بارے میں مزید معلومات فراہم نہیں کیں جس سے معلوم ہو سکے کہ بندوق کس سال بنائی گئی تھی اور اس کی قیمت کیا تھی۔

  • کھانا فراہم کرنے سے انکار پر خاتون نے ریستوران عملے پر بندوق تان لی

    کھانا فراہم کرنے سے انکار پر خاتون نے ریستوران عملے پر بندوق تان لی

    امریکا میں ایک خاتون ریستوران کے کھانا فراہم نہ کرنے پر طیش میں آگئیں اور انہوں نے عملے کو گن سے دھمکانا شروع کردیا۔

    امریکی شہر فلاڈلفیا میں پیش آنے والا یہ واقعہ سرویلنس کیمرا میں ریکارڈ ہوگیا، ایک مال میں واقع ریستوران کی انتظامیہ کے مطابق عملے کی کمی کی وجہ سے وہ صرف آن لائن آرڈرز لے رہے تھے۔

    خاتون جب آرڈر دینے پہنچیں تو عملے نے ان سے معذرت کی جس پر پہلے تو وہ سیخ پا ہو کر مینیجر سے بات کرنے کا مطالبہ کرتی رہیں، اس کے بعد اچانک انہوں نے اپنے بیگ سے گن نکال لی اور عملے کو دھمکایا۔

    انتظامیہ کے مطابق گن دیکھتے ہی انہوں نے ایمرجنسی بٹن دبا دیا جس سے مال کی سیکیورٹی کو اطلاع مل گئی۔

    ایک شخص نے خاتون کا آرڈر لیا اور جلدی جلدی تیار کر کے ان کے حوالے کردیا جس کے بعد خاتون بندوق لہراتی ہوئی وہاں سے نکل گئیں۔

    پولیس نے واقعے کی فوٹیج جاری کرتے ہوئے لوگوں سے خاتون کی شناخت میں مدد کی اپیل کی ہے۔

  • روس نے جدید ترین پستول تیار کرلیا

    روس نے جدید ترین پستول تیار کرلیا

    ماسکو: روس کی کلاشنکوف کمپنی نے نیا اور جدید ترین پستول تیار کرلیا جس کی کامیاب آزمائشیں مکمل ہوگئیں۔

    روسی میڈیا کے مطابق کلاشنکوف گروپ کی جانب سے اعلان کیا گیا ہے کہ کلاشنکوف گروپ (اسٹیٹ ٹیک کارپوریشن روسٹیک) کی جانب سے تیار کردہ پستول لابیدیو ماڈیولر نے مختلف آزمائشوں کو کامیابی کے ساتھ پاس کیا ہے۔

    گروپ کی جانب سے کہا گیا ہے کہ پستول کو نیشنل گارڈ کی ایک تکنیکی تفویض کے تحت آر وائیز تجرباتی ڈیزائن کے مطابق تشکیل دیا گیا ہے، اس توسیع شدہ ٹیکٹیکل صلاحیتوں کے حامل 19 بائی 9 ملی میٹر پستول کے لیے ایک ایڈوانسڈ پستول چیمبر تیار کیا گیا ہے۔

    مقامی میڈیا رپورٹ کے مطابق نیشنل گارڈ کی کمانڈ نے نئے پستول کی بے حد تعریف کی ہے۔

    فیڈرل نیشنل گارڈ ٹروپس سروس کے ڈپٹی ڈائریکٹر، نیشنل گارڈ ٹروپس کے کمانڈر انچیف الیکسی بیزوبیکوف کا کہنا ہے کہ پستول پر کام نیشنل گارڈ کی حکمت عملی، تکنیکی تفویض کے تحت سنہ 2017 میں شروع ہوا تھا۔ اب یہ کام مکمل طور پر انجام پایا اور اس کی آزمائش مثبت نتائج کے ساتھ پوری ہوئی۔

    گروپ کا مزید کہنا ہے کہ روس کے قومی کمیشن نے پستول کے ریاستی ٹرائلز کے نتائج کی منظوری دی اور سفارش کی ہے کہ اس ہینڈ گن کو نیشنل گارڈ میں خدمات کے لیے قبول کیا جائے۔

    اس کے علاوہ دیگر قانون نافذ کرنے والے اداروں، سیکیورٹی اور دفاعی اداروں سے بھی توقع کی جارہی ہے کہ وہ نئے پستول میں دلچسپی دکھائیں۔

  • پستول فروخت کرتے ہوئے تاجر کے ہاتھ سے گولی چل گئی، گاہک ہلاک

    امریکا میں آتشیں اسلحہ فروخت کرنے والے ایک شخص نے خریداری کے لیے آئے فائر مین کو پستول دکھاتے ہوئے گولی چلادی، فائر مین موقع پر ہی ہلاک ہوگیا۔

    امریکی ریاست فلوریڈا کی پام بیچ کاؤنٹی میں پیش آنے والے اس حادثے کے بعد اسلحہ فروخت کرنے والے کو گرفتار کرلیا گیا ہے۔

    ملزم کا کہنا ہے کہ مقتول اس کا جاننے والا تھا اور اپنی ڈیوٹی ختم کر کے اس کے گھر گن خریدنے کے لیے آیا تھا۔

    63 سالہ ملزم مقتول فائر مین کو گن دکھا رہا تھا کہ اچانک اس کے ہاتھ سے وہ چل گئی اور گولی فائر مین کے پیٹ میں لگی۔

    اسے فوری طور پر اسپتال لے جایا گیا جہاں ڈاکٹرز نے تصدیق کی کہ وہ موقع پر ہی دم توڑ چکا تھا۔ مقتول گزشتہ 21 سال سے کاؤنٹی کے فائر ریسکیو ڈپارٹمنٹ سے وابستہ تھا۔

    پولیس نے ملزم کو گرفتار کرلیا ہے، اس پر قتل اور اسلحے کی غیر محتاط نمائش کے الزامات عائد کیے گئے ہیں۔

  • نیوزی لینڈ میں مساجد پر حملہ : دہشت گرد کی بندوق پر مسلمانوں کونقصان پہنچانے والوں کے نام درج

    نیوزی لینڈ میں مساجد پر حملہ : دہشت گرد کی بندوق پر مسلمانوں کونقصان پہنچانے والوں کے نام درج

    ویلنگٹن : نیوزی لینڈ کی مساجد میں فائرنگ کرنے والے دہشت گرد کی بندوق پر مسلمانوں سے نفرت کااظہارکیا گیا اور ایسے لوگوں کے اور جنگوں کے نام سمیت تاریخیں درج ہیں ، جس میں مسلمانوں کا خون بہایا گیا۔

    تفصیلات کے مطابق مساجد میں حملہ کرنے والے دہشت گرد نے مسلمانوں کے خلاف نفرت کی انتہا کردی، دہشت گرد نے پہلے بندوق پر مسلمانوں سے نفرت کا اظہار کیا اور پھر اُسی ہتھیار سے مساجد میں نمازیوں کوشہیدکیا۔

    نیوزی لینڈ میں حملہ کرنے والے دہشت گرد کی گن پر ایسے نام اور تاریخیں درج ہیں، جب مختلف ملکوں میں ہونے والی جنگوں میں مسلمانوں کا خون بہایا گیا۔

    ترک ٹی وی نے اسلحے پر درج عبارت کی تشریح کردی۔

    اینٹون لنڈن پیٹرسن : یہ اس طالبعلم کا نام ہے جس نے سوئیڈن میں مہاجرین کے دو بچوں کو قتل کیا تھا۔

    الیگزینڈر بیسونیٹ : اس نے دو ہزار سترہ میں کینیڈا میں مسجد پر حملہ کرکے چھے افراد کوقتل کیا تھا۔

    سکندر برگ : البانیہ کے اس رہنما کا نام ہے جس نے خلافت عثمانیہ کے خلاف بغاوت شروع کی تھی۔

    انتونیو: یہ وینس کے اس فوجی افسر کا نام ہے جس نے ترک مغویوں کو قتل کیا۔

    دوسری جانب دہشت گرد کی بندوق پر صلیبی جنگوں کی تاریخ بھی درج ہے، جس میں مسلمانوں کو شکست ہوئی تھی، جن میں معرکہ بلاط الشہداء اور خلاف عثمانیہ کا ویانا کا محاصرہ شامل ہیں۔

    دوسری جانب نیوزی لینڈ کی مساجد میں دہشت گردی کرنے والے شخص نے بھی پورے واقعے کو ویڈیو گیم کی طرح فلم بند کیا، ایسی ہی گن فائٹ ویڈیو گیمز  میں ولن اکثر مسلمان دکھائے جاتے ہیں جس میں گیم کھیلنے والا بندوق تھامے شلوار قمیض پہنے اور داڑھی والے کرداروں پر گولیاں برساتا ہے۔

    ان ویڈیو گیمز میں خاص طور پر افغانستان اور عراق کا وار زون دکھایا اور مخصوص حلیہ بنا کر مسلمانوں کو دشمن دکھایا جاتا ہے، ایسے کئی ویڈیو گیمز میں  مسلمان ملکوں کے پرچم دشمن کے جھنڈے کی حیثیت سے دکھائے جاتے ہیں۔

    مزید پڑھیں : نیوزی لینڈ سانحہ : دہشت گرد نے پورے واقعے کو ویڈیو گیم کی طرح فلم بند کیا

    واضح ریے یاد رہے کہ نیوزی لینڈ کے علاقے کرائسٹ چرچ میں سفید فام شخص نے دو مساجد پر اُس وقت فائرنگ کی تھی کہ جب وہاں نمازِ جمعہ کی ادائیگی کے لیے مسلمانوں کا اجتماع شروع ہونا تھا۔ فائرنگ کے واقعے میں 49 مسلمان شہید جبکہ متعدد نمازی شدید زخمی ہوئے، ملزم نے اپنے گھناؤنے عمل کی ویڈیو سوشل میڈیا پر براہ راست نشر کی۔

  • ریلی میں بھگدڑ، ڈونلڈ ٹرمپ پستول کا نام سن کر خوفزدہ ہوگئے

    ریلی میں بھگدڑ، ڈونلڈ ٹرمپ پستول کا نام سن کر خوفزدہ ہوگئے

    واشنگٹن : امریکی صدارتی امیدوار ڈونلڈ ٹرمپ ریلی کے مجمعے سے لفظ ’’گن‘‘ کاشور سن کر خوفزدہ ہوگئے، سیکیورٹی گارڈز نے فوری طور پر ان کو اپنے گھیرے میں لے کر باہر نکال کرایک مشکوک شخص کو گرفتار کرلیا۔

    تفصیلات کے مطابق امریکی ریاست نواڈا میں ریپبلکن پارٹی کے صدارتی امیدوار ڈونلڈ ٹرمپ ایک ریلی سے خطاب کررہے تھے کہ اچانک مجمعے سے لفظ ’’گن‘‘ کاشور اُٹھا، جسے سنتے ہی ڈونلڈ ٹرمپ کے ہوش اڑ گئے۔

    trump-post-01

    اس دوران ٹرمپ کے ایک مخالف شخص نے اسٹیج کی طرف بڑھنے کی کوشش کی۔ تقریب میں موجود لوگوں میں بھی بھگدڑ مچ گئی۔

    غیرملکی خبر رساں ادارے کے مطابق سیکرٹ سروس کے اہلکاروں نے فوراً ٹرمپ کو اپنے حصار میں لے لیا اور اسٹیج سے لے گئے اورگڑبڑ کرنے والے شخص کو بھی گرفتار کر لیا گیا۔

    آسٹن نامی مشکوک شخص کی تلاشی لینے پر اس کے قبضے سے اسلحہ برآمد نہیں ہوا، اس کا کہنا تھا کہ میرے پاس پستول نہیں تھی، صرف احتجاج کر رہاتھا۔

    trump-post-02

    مجمعے میں لوگوں نے شور مچایا اور مجھے تشدد کا نشانہ بھی بنایا گیا، آسٹن نے کہا کہ میں یہ پیغام لے کر آیا تھا کہ ریپبلکن پارٹی کے لوگ ٹرمپ کے سپورٹر نہیں۔

    اس نے کہا کہ میں ریپبلکن کا سپورٹر ہوں ڈونلڈ ٹرمپ کا نہیں، مخالف شخص کی گرفتاری کے بعد جب حالات قابو میں آئے تو ڈونلڈ ٹرمپ تقریر کرنے واپس آئے۔

    انہوں نے بر وقت کارروائی کرنے پر سیکرٹ سروس کا شکریہ ادا کیا۔ ان کا کہنا تھا کہ میں نے کبھی نہیں کہا کہ میری جدوجہد آسان ہے۔