جدہ: وزیرمذہبی امور نورالحق قادری کی سعودی وزیر حج ڈاکٹر صالح بن طاہر سے ملاقات ہوئی اس دوران حج تیاریوں سے متعلق تفصیلی گفتگو کی گئی۔
تفصیلات کے مطابق وزیرمذہبی امور نورالحق اور سعودی وزیرحج کے درمیان ملاقات سعودی شہر جدہ میں ہوئی، ملاقات میں حج کی تیاریوں اور انتظامات کے حوالے سے تبادلہ خیال ہوا۔
اس موقع پر نورالحق کا کہنا تھا کہ پاکستان کا حج کوٹہ بڑھانے پر خادم حرمین شریفین اور وزیر حج کا شکریہ ادا کرتے ہیں، پاکستان کو روڈ ٹو مکہ پراجیکٹ میں شامل کرنے پر بھی مشکور ہیں۔
وزیرمذہبی امور نے سعودی وزیرحج سے اسلام آباد کے ساتھ کراچی اور لاہور کو بھی روڈ ٹو مکہ پروگرام میں شامل کرنے کی استدعا کی۔
سعودی وزیرحج ڈاکٹر صالح بن طاہر کا کہنا تھا کہ حجاج کرام کے آرام اور سہولت کا خیال رکھنا ہمارے فرائض میں شامل ہے، پاکستان کے دیگر شہروں کا روڈٹومکہ میں شمولیت کا جائزہ لیا جائے گا۔
90 فیصد پاکستانی عازمین حج کی امیگریشن پاکستان میں ہوگی،ذرائع
خیال رہے کہ گذشتہ ماہ پاکستان کو روڈ ٹو مکہ منصوبہ میں شامل کرنے سے متعلق اہم پیش رفت سامنے آئی منصوبہ کے تحت رواں سال 90 فیصد پاکستانی عازمین حج کی امیگریشن پاکستان میں ہوگی، اس سلسلے میں 14 رکنی اعلیٰ سطحی سعودی وفد یکم اپریل کو پاکستان بھی پہنچا تھا۔
یاد رہے روڈ ٹو مکہ منصوبہ میں پاکستان کو شامل کرنے کا پہلے اعلان ہوچکا ہے۔ حکومت نے سرکاری اسکیم کے تحت حج قرعہ اندازی کر کے حج پر جانے والے ایک لاکھ 7 ہزار سے زائد خوش نصیبوں کے ناموں کا اعلان کیا تھا۔
